2011
03132032天冊
664民間故事
佇古早時陣，有一个足善良的人。天公捌派in查某囝來嫁予伊，了後有生一个後生叫做董碩。
時間過了誠緊，這對翁仔某做伙生活七冬足快樂的日子。彼冬，大概是天公派in查某囝佇凡間的時刻到矣，就共董碩的老母叫倒轉去天頂。
自按呢了後，董碩煞變做無老母的囡仔，定定去予in仝勻(ian5)的欺負佮侮辱。聽候伊較大漢的時陣就去讀冊矣，有一工，伊就問in老師講伊是按怎會無老母。
in老師就隨掀桌頂一本足厚的冊，就共伊講：「按照冊內面的記載，恁老母是天公的查某囝，佇七夕彼工會佮七个姊妹仔來河邊釣魚。」
就佇七夕早起，董碩猶未等到天光就走去河邊揣老母。真正有影呢，in老母毋知對佗位來的，就出現佇伊的面頭前，嘛和伊耍甲足歡喜的，一直到欲離開的時陣，就予伊一捾炮仔講：「阿碩也，你明仔載去讀冊，就共遮的炮仔點點咧囥佇恁老師的冊面頂。」
隔轉工，董碩就按照in老母的吩咐(c.f.交代)，共炮仔點著囥佇老師的冊面頂，炮仔火一下仔就共袂少冊燒了了去。
聽講，古早時陣有關係著記天理佮地理的冊有一百二十本，因為彼改的炮仔火就共講天理的六十本冊燒了了。自按呢了後，咱人就無法度知影天頂的代誌矣。
參考資料來源：吳瀛濤《臺灣民俗》臺北市：眾文圖書，1992。
回應
古早天冊百二本
炮仔火燒六十本
共天講理燒了了
無法知天毋知本
現代科學知天機
故事譀譀屬趣味
萬項代誌著懷疑