2011
04302241巧 新 婦
創作高年級組---巧 新 婦
阿母：日頭曝著尻川啊，猶無早頓通食，我枵甲大腸告小腸，阿花仔你緊出來啦！
阿花：一步行、兩步行、三步到大廳，看著阿母徛佇遐，趕緊叫一聲：阿母欲創啥？
阿母：真正是「一頓久久，兩頓相拄。」你緊去買魩仔魚轉來煮。
阿花：阿母，魩仔魚欲買幾尾？
阿母：「苦瓜燉鰱魚」可憐喔！
阿花：啊！我知、我知，咱兜六个人，買一尾腸仔肚撏撏咧，頭仔尾仔刴掉，佫切做六垛，拄仔好一人食一垛。
阿母：敢安呢？
阿花：著啦、著啦！我會閣叫頭家鱗拍予清氣。
阿母：你真正是「外甥仔娶某」。
阿花：阿母！嘿是啥麼意思？
阿母：了然哦！連魩仔魚生做圓抑扁，你就呣知。
阿花：啊無---阮阮來去買六尾，一人食一尾。’
阿母：哼！「牛牽到北京嘛是牛」，魩仔魚免買囉。
阿花：安呢---欲買啥？
阿母：免買閣免煮啊，我氣飽矣啦！規去，你佮恁阿嫂攏轉去外家歇熱。
阿花：莫啦、莫啦！我無愛轉去外家歇熱啦！
阿母：轉去、轉去！莫看才袂倒彈。
阿花：無，佟時欲予阮轉來？
阿母：汝…五日節轉來，欲轉來的時，愛挈「紙包風」轉來。
阿花：阿嫂咧？
阿母：恁阿嫂七月半轉來，欲轉來的時，愛挈「紙包火」轉來。
阿花：阿母！汝講啥？我那聽甲霧霎霎。
阿母：猶佫有咧，恁兩个愛佇仝一工轉來！
阿花：啥麼？五日節佮七月半明明就無仝日，是欲安怎仝一工轉來？
阿母：家己想辦法啦！
阿花：阿母！「台刂魚台刂到腮，講話講透機」，請阿母明示！
阿母：老人食紅蟳──講（管）無效啦！
阿花：這---這欲如何是好？---啊！有啊！
阿母：有影無？有影才通講呢！
阿花：啊，五日節就是肉粽節，迄工愛縛肉粽，我捾一捾肉粽轉來，就代表五日節囉！
七月半愛炊粿，阿嫂挈一垛鹹粿轉來，就代表七月半囉！
阿母：嗯，gau5、有gau5、有影gau5。
阿花：葵扇佮古仔燈攏是紙糊的，葵扇搧著有風，古仔燈有點火，我挈葵扇轉來、阿嫂挈古仔燈轉來，就代表「紙包風」佮「紙包火」囉！
阿母：嗯，巧、有巧、有夠巧。
啊，恁若轉去歇熱，欲佇佗一工轉來？
阿花：日日攏是好日，我佮阿嫂仝一工轉來就好。
阿母：哈、哈、哈---阮tshua7著一个巧新婦囉！
阿母：大家新婦蹛作夥。
阿花：有孝搰力閣khinn5家。
阿花＆阿母：請恁有閒來這坐。
阿花＆阿母：土豆瓜子配好茶。
阿花＆阿母：再會、再會！
註：拼音部份全部採用台羅拼音。
斜體字用英語發音。
用字採用教育部公布300字建議用字。
(轉去主目錄)
真好 寫得真好