2011
04302238一醉解千愁？
一醉解千愁？
乙：(行路顛顛倒倒，入場了後扑一个嗝)(唱：酒國英雄)明知自己無酒量，偏偏飲甲這呢兇，因為我有滿腹心事無地講，則來酒國做英雄。(向台跤的觀眾講)來啦！予焦啦！(講了後佫扑一个嗝)
甲：(雄雄走入場) 好啊啦！好啊啦！毋通佫啉啊啦！
乙：汝來上拄好，我猶佫咧揣無酒伴咧！(扑嗝)來啦！陪我啉二杯啊！
甲：拜託下！毋通佫啉啊啦，規工啉徦醉茫茫，敢會看口ci8！
乙：來啦！三八啊，啉就啉，若就佫講茲濟！
甲：汝毋通按呢天天醉、醉天天，逐工啉徦醉茫茫，後擺日子是卜按怎過？
乙：人講「時到時擔當，無米則煮蕃薯湯」，橫直先啉落去就著啊啦！(捾酒卜佫繼續啉落去)
甲：(共乙的酒搶過來)汝已經燒酒醉啊！毋通佫啉啊啦！
乙：(唱：醉後的心聲) 我無醉、我無醉、無醉，請汝毋免同情我。酒若落喉，痛入心肝。傷心的傷心的我，心情無人會知影，只有燒酒瞭解我。
甲：(共觀眾講)騙痟仔！啉徦連行路就顛顛倒倒，佫講伊無酒醉！笑死人！
乙：啊汝佇遐踅踅唸是咧唸啥？咧講我的歹話hoo7！
甲：無啦！無啦！(停一下則笑笑共觀眾講) 逐遍燒酒啉落腹肚底，就開始烏白講話亂亂花。唉！真正是「了然」！
乙：啥！(半醒半醉共甲講)汝佇我尻川後共我偷罵，汝毋通想講我啉酒醉啊無聽去，我共汝講—我猶佫足清醒的！
甲：毋是啦！毋是啦！(歹勢歹勢笑笑啊講)我是講汝嘛小寡撙節一下！啉淡薄啊就好啊！
乙：啊汝若勿會 輸咧「澎湖菜瓜—雜唸」，比阮阿母較敖唸！
甲：我是講無什麼代誌，若就啉茲雄！
乙：(唱：買醉)「買醉，是為著愛情不如意，一時則來想勿會 開」，無什麼代誌！汝講無什麼代誌！我予女朋友放摋，汝佫講無代誌！汝講毋著話，罰三杯！
甲：(搐一趒，衰尾無辜的表情)我、我、我、我愛罰三杯！ (共觀眾講)我若會「公親變事主」！
乙：啉就啉啦，若就佫講茲濟！
甲：毋佫就算是心情勿會 爽快，嘛毋免啉徦茲爾濟啊！代誌就已經到茲來啊，啉佫較濟嘛勿會 當解決問題！
乙：汝煞無聽過：「一醉解千愁」！我若啉予醉茫茫就無感覺啊！
甲：抑毋佫，人講：「酒醉心頭定，酒痟是會無性命」ne7！
乙：呸呸呸！汝迄支「烏鴉喙，胡蛻蛻」，哪會「未啉假醉，未講就大心氣」，無代無誌佇遐咒讖我早死。
甲：「做人勿愛 鐵齒，若卜逐工啉酒醉，傷肝傷心佫傷胃，性命連鞭嘛休休去。」汝千萬毋通「七月半鴨仔呣知死」！
乙：啊你若會「一句話，講徦三斤六重」，勿會 輸我的後半世人已經是「火燒罟寮全無望（網），擔沙囤海無彩工」。
甲：人講「食著藥，青草一葉；食呣著藥，人蔘一石」。
乙：汝是講：「方法若毋著，效果是『一丈差九尺』」？
甲：著著著！心情鬱卒的原因百百項，解決的方法攏無仝，啉酒逃避（是）若眠夢，扑醒心情是愈沉重。工課做來勿會 輕鬆，若扑痞身體是一世人。
乙：汝愈講我愈驚！走揣快樂愛按怎？汝嘛開破予阮聽。
甲：人講：「啉酒若會當解憂愁，世間若會有自殺的理由」！
乙：汝是講：「啉酒無法度解憂愁，若無就勿會 有人自殺啊」？
甲：著啊！其實，快樂是咱家己想，平平一件代誌，無仝人來處理就有無仝款的結果。
乙：汝是講：「一个人敢會快樂是「心」的問題，煩惱其實攏是家己揣？」
甲：無毋著！咱若共「食苦當做食補」，就算是「跋一倒嘛會當抾著一隻金雞母」。來啦！換啉呰味上屆好！(挈一罐歡喜茶予乙)
乙：歡喜茶？(驚一趒的表情)按呢我知啊啦！(歡喜的表情)
甲&乙：所以講：ㄟ！(扑竹板)「好禾黑 是咱家己想，啉酒勿會 當解憂愁。拄著問題揣朋友，逐工就快樂無煩憂啊無—煩—憂。」
(轉去主目錄)
沒有留言:
張貼留言