2011
04302221中秋暝
中秋暝
甲：「八月十五中秋暝，家家戶戶來團圓，柚子好食正當時，月餅芳甜好滋味」！
乙：「烘肉食濟會變肥，體重控制愛細膩，放炮煙火著注意，則袂歡喜變狼狽。」。
甲：我是「秦健康」！
乙：我是「祝快樂」！
甲&乙：祝逐个健康佫快樂。
甲：中秋節了後，我看你的身材是愈來愈有份量啊。
乙：哪有法度啦！日時看著甜甜甜的月餅，暗時鼻著芳芳芳的烘肉，當然嘛會加減食二喙仔，若有可能攏無食。
甲：我看你是「看著物件若無食，喙箍就會一直搐，講欲叫你減食寡，袂輸是咧愛你的命」。
乙：你若袂輸咧我「腹肚內底的蝒(蛔)蟲」，連遮你也知！
甲：我看hoo7！你根本就是「喙飽目睭枵」，無食會擋袂著。
乙：你嘛毋通共我漏氣！
甲：本來你的身材是「泰山的體格」，今嘛煞袂輸是「豬八戒的身體」，你嘛小控制一下。
乙：敢有差遮濟？
甲：猶佫有咧，過一個中秋節，你毋爾身材變足濟，連呰波頭毛嘛變徦若「貓王」咧。
乙：你是講呰粒「爆炸頭」是否？
甲：著啊！就算逮人時行，嘛愛會看口ci8！
乙：這你誤會啊啦，我當時有遮虛華，會去逮人時行。
甲：若無是按怎？
乙：這講起來是「話頭長」。
甲：無要緊啦！今啊時間無屆趕，你捯捯啊解說予逐家聽。
乙：（唱歌—行船人的純情曲曲調）「八月十五彼一工，阮兜規家去蘭潭」。
甲：我嘛有去呢！
乙：（繼續唱）「規个潭邊攏是人，若欲烘肉就愛先揣空」！
甲：迄暝我嘛去遐放炮呢。
乙：（繼續唱）「當欲傳肉落去烘，炮仔彈著我頭殼」！
甲：你迄暗予炮仔彈著？
乙：（繼續唱）「隨時爆炸燒頭鬃，送去病院已經變黑人」！
甲：迄工予人送去病院的就是你哦！（大吃一驚的樣子）
乙：著啊！你嘛知影喔？
甲：（唱歌—為什麼曲調）「為什麼？為什麼？為----什麼？」
乙：你是按怎？敢講汝是……汝是……？
甲：（唱歌—桃花過渡曲調）迄暝阮嘛去蘭潭，拿著炮仔就一直放，無細膩來去彈著人，扮勢毋著我就緊踉港啊(伊就)緊踉港。
乙：你……你……你就是害我著傷的迄個人？
甲：歹勢啦！歹勢啦！
乙：你敢毋知影蘭潭袂使放炮？
甲：敢有影？
乙：嘉義生活的用水，攏是蘭潭來過濾，水源若是汙染去，欲來搶救就袂赴市。
甲：你講按呢真正有影，環境若欲來保護，水源就愛先照顧。
乙：著著著！環境保護愛細膩，糞埽（垃圾）毋通烏白揖（丟棄），蘭潭風景若維持，生活就快樂佫舒序啊佫舒序。
甲：「秦健康」！
乙：「祝快樂」！
甲&乙：祝逐个健康佫快樂。再會！
(轉去主目錄)
沒有留言:
張貼留言