2011
04302243講臺語了不起
講臺語了不起
甲：我是紅豆餅。
乙：我是綠豆膨。
甲&乙：上臺行禮！
甲：人講：「三年一閏,好痞照輪」食徦即大漢，今仔日上揚氣。
乙：看汝丹田真飽滇，講話有元氣，無掛金旆鍊、金手指，汝有啥乜好揚氣？
甲：阮阿母知影我佇遮會去講著伊，透早對我好微示，千吩咐萬交代，叫我就愛「賣茶講茶芳，賣花講花紅」，講伊親像天上的仙女、古早的西施，溫柔體貼、樂善好施，厝邊頭尾…。
乙：小等一下，汝無看著逐家的目睭掠汝金金看，「膨風水雞刣無肉」。
甲：喔！我知！我知！恁掠準我咧臭彈，呣佫我見講見對，「有聽著，九斗換一石；無聽著，心肝會礙虐」。
乙：人bái佫厚話屎，呣知汝是咧講啥乜碗糕。
甲：喂！偌bái！阮阿母講：「人散袂當怪政府，人bái袂當怪父母」。
乙：按爾講，恁阿母是排第三兮。
甲：第三兮？按怎講？
乙：俗語講：「一舉、二運、三本事」，看起來恁阿母是排第三坎。
甲：「本事」排第三坎！無要緊，有一件了不起的代誌，佇遮一定要提起。
乙：是啥乜了不起的代誌？
甲：當然嘛是學臺語。
乙：笑死人！臺灣人就佫愛學臺語？有啥乜好學的？
甲：愛學！愛學！誠要緊，阮阿母就是認真學臺語，佮阮阿媽足麻吉，佮阿爸的感情糖甘蜜甜。
乙：無影無跡！阮阿爸佮阮阿母若相罵，嘛是用臺語佇咧拚生死。
甲：唉！「講徦予汝捌，喙鬚好扑結」、今仔日算汝「捌人，較好捌錢」，汝敢呣捌聽過一條歌「家後」，伊是按爾唱的：「幸福就是吵吵鬧鬧」。
甲&乙：啊！福氣啦！
乙：嚶—呰每﹝mái/pái﹞我一定愛出聲，「有錢烏龜坐大廳，無錢秀才是人人驚」，人講：「無米摃鼎，無錢摃子」。
甲：阿娘喂！三千六的「消費劵」呣是拄仔領過爾爾，喝無錢！
乙：「消費劵」？郵局的阿姨講我「未成年」三千六攏佇阿母的橐袋仔底，叫我認真讀冊，後每三頓則會無問題。
甲：呣對！呣對！「做雞著筅，做人著反」做學生讀冊學本領！親像阮阿舅，誠本事爻飼豬佫爻飼牛，嘛去美國挈博士，伊人有長志，成功嘛卜轉來咱嘉義。
乙：啊恁阿舅轉來嘉義頭路食啥乜？
甲：講來嘛是一件了不起的代誌，伊去中正大學考試，八十外个「博士博」卜拚「老師」一位。
乙：我知！我知！今也﹝tsit-má﹞博士踢倒街！「老師」的份無恁个。
甲：我無講汝呣知，拚到尾仔賰兩个，教授問阮阿舅，汝猶佫會曉啥乜本事？阿舅雄雄共應講：「英語、日語、西班牙語我攏會、我佫會曉用臺語教冊。」
乙：哦！媠啦！愛拚！愛拚！拚到底！看是卜死豬哥，抑是卜死豬母！啊，尾仔是椆佗一个？
甲：當然嘛是阮阿舅，因為伊會曉用臺語教書，算來學臺語有前途，會曉臺語較好找頭路。
乙：講了敢有影？「好酒是沉甕底、好戲是佇後尾」。
甲：來！來！來！後尾咱做伙來！
甲&乙：感謝阿爸阿母共阮成，
答喙鼓講臺語真好聽，
「蕃薯呣驚落塗爛、只求枝葉代代湠」
地球村內攏有臺語聲，
臺灣的經濟一定贏啊一定贏！
甲：紅豆餅。
乙：綠豆膨。
甲＆乙：落臺行禮。
(轉去主目錄)
2011-05-02 22:56:41VTL 前往VTL的日誌
