2011
04302244王祿仔先的心事
王祿仔先的心事
乙：（敲鑼三下）「台仔頂銅鑼響三聲，好康的報恁逐个聽；今仔小弟來到（kau3）貴寶地，有心卜佮逐个來交陪，祖傳的祕方、獨門的藥劑，今仔佇茲俗俗啊賣！」
甲：(從旁邊行出來，目睭從甲的頭看徦腳)欸！我看汝「火燒豬頭—面熟面熟」，汝敢是迄个迄个…「頂港有名聲，下港有出名」，阮賣藥仔界的祖師爺--「王祿仔先」？
乙：「規叢好好--無剉(錯)」！
甲：祖師爺！汝已經食徦呰个歲數，別人早就連鎖店開徦幾百間，挺好佇厝內清閒，若就佫親身出馬來遮咧喝賣？
乙：唉！我已經食老勿會 哺塗豆啊啦！「坐咧就哈唏，倒咧佫睏勿會 去，講過就隨勿會 記」，逐種老人的症頭就攏有。
甲：(斡頭笑笑啊共觀眾講)猶佫有「見講就講過去」！
乙：想起迄當時，我王祿仔先是「名聲暢京城」，逐工門跤口卜買藥的人客就排徦落落長，連掛號就愛排隊三個月。
甲：(偷偷啊共觀眾講) 「一開喙就咧講過去」！真正是老啊！(斡轉來正經共王祿仔先講)祖師爺！汝較早賣藥仔遮chia7 iann7，錢水早就趁徦飽飽飽，後半世人應該會當翹跤捻喙鬚啊則著！
乙：唉！（唱：心事無人知）「心事若無講出來，有啥人會知？有時陣想卜訴出，滿腹的悲哀！」
甲：（唱：你是我的兄弟）「愛情不如意就愛看予開，事業勿會 順序重頭起，什麼問題--請汝講出喙，我若知影，會來幫助汝」！
乙：唉！自從全民健保來實施，人人身體勇健有本錢，加減嘛影響賣藥仔的生理！
甲：咱做人勿會 使gang7想卜趁錢，好的政策咱嘛愛支持。
乙：加上今嘛無景氣，像恁呰種連鎖藥店佫一間一間開，逐間就企業化來管理，叫我卜按怎做生理！
甲：今嘛呰个時代，做生理的方法無改變敢會使？
乙：結果恁逐个「仙拚仙」，煞「拚死」我呰隻「猴齊天」！害我逐工就講徦喙角全波，佫佇電台扑廣告，藥仔猶是賣勿會 出去！
甲：呣是我「賣茶講茶芳，賣花講花紅」，雖然我賣藥仔則二三冬，毋佫生理是做徦真輕鬆！
乙：人講：「別人呵咾一蕊花，家己呵咾是爛冬瓜」，共汝褒一下，汝就臭屁徦按呢！
甲：阮就毋是「胡蠅戴著龍眼殼—蓋頭蓋面」咯，敢佇祖師爺汝呰个「關公 (手比王祿仔先) 的面頭前弄大刀」。
乙：講徦恁hoo7！真正是「目睭皮無漿泔」，看阮「貓的無點」。五十年前，我開始賣藥仔的時陣，恁就猶毋知影佇佗位咧！
甲：(偷偷啊共觀眾講) 「見講就講過去」！老人的症頭佫揭起來啊！
乙：我看恁遮的人攏是「北港媽祖--興外地」，騙人無捌賣過藥仔！
甲：祖師爺！話毋是按呢講的！時代進步徦按呢，賣藥仔若卜有人客，專業則是上重要的問題。
乙：今嘛賣藥仔愛有什麼專業，毋就講來予逐个參考看mai7咧！
甲：其實，藥仔卜賣嘛愛有規矩，民眾毋則會佮意。
乙：賣藥仔愛有什麼規矩？
甲：（共藥仔搶過來，叫乙斟酌看）汝看汝看（手指藥包），汝的藥仔頂懸什麼攏無寫，呣知影內底(成份)是匟啥？人客根本毋知影，食了到底會按怎？
乙：勿會 啦，勿會 啦，我攏嘛匟維他命爾爾！
甲：祖師爺！賣藥仔是勿會 使「無牛使馬」，「無布袋戲尪仔則咧弄傀儡」。凊凊彩彩就想卜共準過，按呢人客是會走徦無半个。
乙：人講：「平時做好代，較贏食早齋」，賣藥仔愛注意什麼則會使，汝呣就講予我聽看mai7。
甲：買賣的藥仔愛有「GMP」，若無人客是勿會 佮意！
乙：汝是講：「藥仔若無GMP，佫較俗嘛賣勿會 出去！
甲：無呣著！而且藥仔使用的方法佮時機，佇包裝頂懸愛有清楚的標示。
乙：汝是講：用藥仔的方法按怎是，步步攏愛有規矩，飯前飯後愛著時，卜食卜抹著細膩。
甲：著啊！人客食了若適序，汝後擺毋則有生理。
乙：按呢我知影啊啦！
甲：人講：「食著藥，青草一葉」。
乙：「食呣著藥，人蔘一石」
甲：「健康」是人生上重要的本錢！
乙：「食藥仔」嘛愛認明藥仔的標示，呣通無病亂投醫。
甲&乙：望逐个身體勇健有本錢，快快樂樂食百二。
(轉去主目錄)
沒有留言:
張貼留言