2011
04302246媽祖的指示
媽祖的指示
甲：※※啊！最近汝是走去佗位覕鬚？若會走徦無看見人！是咧無盈啥？
乙：煞呣知影，我咧無盈頂个月上紅的大代誌。
甲：汝是講：「故宮南院卜變做花市，汝逮人去抗議是否？」
乙：無啦！我雖然想卜去，抑呣佫我只是一个囡仔粃，阮阿母若有可能放我去！
甲：若無敢是「范蘭欽」的代誌，汝也逮人去網路揣伊的文章掠證據？
乙：講著伊逐个就氣徦規腹火，無彩咱國家開錢共伊栽培，伊煞寫文章共咱出賣，真正是「飼鳥鼠咬布袋」，迄種人根本就是「食碗內，洗碗外」！
甲：無法度啦！人講：「歹年冬，厚痟人」，拄著呰款人算咱較衰啦！
乙：唉！我最近就真正有夠衰！
甲：無是按怎，汝嘛講來予我聽看mai7咧。
乙：唉！「人若咧衰，種瓠仔就會生菜瓜」，我落雨天一出門就雨傘開花，行路無代無誌就跋落去水溝仔底，恁講我有衰抑無衰。
甲：按呢有影較衰尾！
乙：所以，頂个月人咧夯鬧熱，我嘛逮人去，看會當改運否！
甲：汝是講：汝為著卜改運，溫若逮人咧「三月痟媽祖」哦！
乙：這嘛無法度啊！人講：「有食補有行氣，有燒香就有保庇」，既然卜求平安順序，上山落海嘛愛逮人去！
甲：啊，汝是去「扶鑾」抑是去「鑽轎跤」？
乙：唉！好康的哪輪會著我，「扶鑾」咱是「排無十二生相」，卜「鑽轎跤」人是插插插，抑是香罔拜，金罔燒，棓罔搏！
甲：按呢汝呣就加走一迮？
乙：無noo3！我揭三萬的香共媽祖（模仿動作）講：「媽祖啊！我有燒香、汝就有保庇，求汝予我平安無代誌」！
甲：是「揭香慢、點香慢、插香嘛慢」！
乙：搏棓三擺，（模仿動作），則求著「三張籤詩」！
甲：有準否？
乙：三張籤詩，攏講徦對對對！
甲：媽祖敢真正遮靈聖？汝到底問什麼？
乙：我問媽祖卜按怎改運。
甲：媽祖按怎共汝指示？籤詩寫什麼汝敢會記得？
乙：迄三句話我一直攏記椆椆。
甲：汝嘛講來予逐个(比觀眾)參考看mai7咧？
乙：算恁好運，我今仔日拄啊好有扎來，我挈出來予恁看mai7咧。
甲：逐个「目睭扒予金」，跤尾煞予在，聽阮※※捯捯啊解釋來。
乙：第一張籤詩講：「一紙書來只為牆，讓他幾尺又何妨。長城萬里今猶在，不見當年秦始皇。」
甲：哦！我知！我知！媽祖的意思是叫汝：「做人呣通傷計較，若無會朋友親情走了了」。
乙：汝若會知影？
甲：這阮阿嬤有講過：「相讓食有賰，相搶食無份」，無計較則會改運！
乙：第二張籤詩講：「花開嘛無百日紅，人無千日的勇壯，扑拚敢會予人笑戆，欲食呣賺真勿會 通」！
甲：媽祖應該是咧講：「花無百日紅，人無千日好」！
乙：無呣著啊！媽祖交代我講：「咱做人做事勿會 當gang7想卜『食好做輕可，卜食佫無討趁』，『食若牛，做若龜』，『做無一湯匙，食卜規畚箕』，只有『少年就來扑拚，食老則有好名聲』」！
甲：就是講呣，人講：「年頭若無飼雞栽，年尾若有通做月內」，咱就愛「一步一跤印」，「有艱苦頭，則會有快活尾」。
乙：這啥人教汝的？
甲：當然是這阮兜上有智慧的阿嬤啊！啊，第三張籤詩咧？
乙：第三張籤詩是寫：「人生運命咱安排，扑拚奮鬥則實在，艱苦若盡甘自來，光明前途為汝開」。
甲：媽祖的意思是講：「只有跤踏實地來扑拚，則會當改變咱未來的運命。」
乙：著著著！
甲&乙：所以講：運命是(唱)「三分天註定，七分靠扑拚，愛拚則會贏」。
(轉去主目錄)
沒有留言:
張貼留言