2011
04302248花 食 露 水，人 食 喙 水
花 食 露 水，人 食 喙 水
乙：唉！「人若咧衰，種瓠仔就會生菜瓜」
甲：誒？到底是發生啥物代誌？若哪會「未啉假醉，未講就大心氣」，「一句話，三斤六重」？
乙：攏嘛阮阿姊害的。伊本成就大箍，昨昏去鉸頭毛，閣鉸一个「胡蠅戴著龍眼殼」的頭鬃轉來。
甲：啥物是「胡蠅戴著龍眼殼」？
乙：啊就「崁(蓋)頭崁面」！足像電視廣告迄个膽固醇小姐（華語），我就叫伊膽固醇小姐，伊煞見笑轉受氣，講我是「龜笑鱉無尾」！
甲：無啦（滾爽笑的口氣），汝是「鱉笑龜粗皮」！
乙：閣罵我是「大紅花毋知禾黑，圓仔花禾黑 毋知」，汝家己則是大箍呆！
甲：哈哈哈！（滾爽笑的口氣）「大箍呆炒韭菜，燒燒一碗來，冷冷我無愛」。
乙：旦汝是好抑未？我逆（gik8）著tsuah佇眠床頂雄雄予伊一个拳頭。
甲：hannh5！啊恁阿姊有按怎無？
乙：結果伊煞跋落床頭，跩著肩頭，石告著尻川頭，tsuah按呢……
甲：按怎？
乙：哭徦哀爸叫母，走去共阮阿母投，害我予阮阿母罵徦强欲臭頭。
甲：啥人叫汝「好話毋出門，歹話脹破腹肚腸」，勿會 曉講話佫愛厚話！
乙：我抑毋是啞口，哪會勿會 曉講話？
甲：話著愛講了予人佮意聽，毋則是gau5講話。
乙：汝是欲叫我講心肝倒反的話喔？
甲：當然嘛毋是，講話愛誠心誠意，勿會使喙唇皮相款待。
乙：什麼意思？
甲：人講：「話講會得出，收勿會 得入」，「話是三角六尖，尖尖傷人」，歹聽話抑是莫講出喙較勿會 惹禍上身。
乙：敢有遮嚴重？
甲：我講一个古予汝聽，有一个皇帝，暗暝眠夢著一个怪夢，伊就叫一个大臣來共伊解夢，迄个大臣頭殼ting7石告石告，勿會曉轉踅。
乙：伊是講啥物？
甲：「皇帝也！汝真不幸，汝會活憑汝的囡兒序細閣較久，汝食老會變老孤khut8。」伊話一講煞，隨予人拖出去斬頭。
乙：hannh5！遮恐怖喔！
甲：皇帝又閣揣另外一个大臣來解夢，迄个大臣就較巧，伊講：「皇帝汝實在誠有福氣，汝會比汝身軀邊所有的親人閣較長歲壽，皇帝萬歲萬歲萬萬歲！」伊的話一講了，就隨升官。
乙：哎呀呀呀！仝款意思，兩個人的遭遇哪會天差徦地咧。
甲：咱人咧講話，「好嘛一句，歹嘛一句」，俗語講：「花食露水，人食喙水」，好喙勿會蝕本。
乙：莫怪阮阿母罵我是「一條腸仔透尻川」，伊定定教示我「好話出喙免吞忍，歹話離喙忍三分」。
甲：「規叢好好～無剉」，「會曉講好話，較贏汝開錢做交陪」。
乙：汝講了是誠有道理，毋閣話愛按怎講則會媠氣閣勿會漏氣？
甲：話欲講進前，愛先想一下則通講，毋通大舌興啼，別人看汝喙仔一開，連鞭就走徦離離離！
乙：嗯！有道理！講話進前抑是愛想好則出喙，則勿會像一个新聞記者佇火災現場講：「各位觀眾，今嗎咱來看火燒厝精彩的畫面」
甲：俺娘喂！火燒厝就咧悽慘啊，閣會精彩喔？
乙：著是講m7！話講傷緊，凸槌無打緊，無定著閣會予頂司剝一層皮。
甲：著啊！除了這，咱嘛愛有內才，講話毋則會精彩。
乙：啊若肚臍我是真大khian啦！內才好禾黑 我就無啥知？汝嘛教看按怎有內才？
甲：冊著愛加讀寡，閣愛定定學一寡智慧名言，吸收別人的巧句變做家己的，古早人咧講「讀詩千首，不作自有」，學問若滿腹內，出喙自然好口才。
乙：汝毋但有智慧，人範閣好，莫怪逐个攏共汝呵咾。
甲：嗯！真敖變竅，旦仔教汝就隨會曉，今嗎就會曉講好話啊！
乙：按呢，我毋則會有肚臍閣有內才。
甲：所以講：「花食露水，魚食流水」，咱「人(就愛)食喙媠」，
甲&乙：望逐个口出蓮花，捷講好話，囡仔古錐敖讀冊，大人錢水愈趁愈濟，厝邊隔壁不時來相揣，親情朋友攏會佮汝來交陪，予台灣成做一个快樂的社會。
(轉去主目錄)
沒有留言:
張貼留言