2011
04302250薰--毋通食
薰--毋通食
甲：歡歡喜喜來上台，看著大家笑咍咍，這擺阮若拔頭彩，刣豬屠羊倩恁來。
乙：＊ ＊ ＊（喔—ōo-sē）【嘴掩掛著咧】
甲：喂！無禮貌！佮人講話煞免「脫口罩（華語）」！
乙：墓仔埔放炮—驚死人！佮人講話就愛「脫褲走」！
甲：講啥？
乙：你若欲臺語華語偛偛做一伙，定定都會鬧笑詼。
甲：我看你也是佮嘴掩掛回去，才袂遐厚話。
乙：這嘛感冒當時行，阮毋才會共嘴掩掛咧行。
甲：老師有咧講，流行感冒誠厲害，為著大家的健康，踮厝歇睏才應當。
乙：若是按呢我先走。
甲：奉送啟程
乙：不用。
甲：該然！
乙：喂！
甲：好啦好啦，莫受氣，若無你，今仔日的金牌是欲按怎mo̍oh返去？
乙：這嘛才知影我的重要，猶袂慢！
甲：「兩人答喙古，卡贏一人喝i-o」。
乙：嗯！烏矸仔貯豆油—無底看！
甲：毋是我膨風，無論是天文、地理、社會、---
乙：擋咧！擋咧！人講：「膨風水雞刣無肉」。
甲：你看我霧霧！竟然毋知我的真工夫。
乙：工夫是萬底深坑，無考，欲若會知影你有偌濟！
甲：「真金不怕火」！做你來！
乙：這嘛上時行！
甲：消費劵！（華語）
乙：今仔日無欲講錢！正月十一！
甲：喔！我知！公共場所全面禁薰。
乙：嗯！有咧關心社會問題！
甲：啥叫咱們是後擺的大柱
乙：請問這支大柱，對「食薰」的感覺。
甲：若講到「食薰」，我就「氣」！
乙：你這个囝仔屁，講著食薰你就「去」。
甲：我是咧受氣，阮兜一枝老薰管。
乙：嗯！時機bái bái，giâ去古物商，換現金卡實在。
甲：毋閣，毋捌聽講，有人共阿公當做古董掠去賣！
乙：啊！歹勢！原來彼枝老薰管，是恁阿公喔。
甲：正是規欉好好--「無剉」
乙：「食薰薰嗽，食久肺會àu」，伊敢會毋知影？
甲：老人囝仔性，佮他有理講袂清，叫他改薰毋答應。
乙：伊是po̍ok偌大？
甲：一工四支分階段。
乙：按怎分？
甲：透早po̍ok一枝，心涼脾吐開。
乙：嗯！有騰雲駕霧的感覺。
甲：中晝po̍ok一枝，頭暈目暗攏無去。
乙：嗯！下晡的氣力嘛攏傳便哪！
甲：暗頭仔po̍ok一枝，閒閒無代看電視。
乙：嗯！做頤糧（gì-niū）！
甲：欲睏進前po̍ok一枝，心情輕鬆好落眠。
乙：嗯！一醒到天光。
甲：所以，伊講
乙：「食薰-改—毋好」。
甲：正是--！
乙：嗯--，恁阿公有咧買基金喔？
甲：這佮買基金有啥關係？
乙：一工、四枝--「定期」閣「定額」（華語音），無加無減無走閃。
甲：你當做一月日khiām三千，食老會當領現金喔！
乙：按呢嘛袂bái
甲：我看你是皮膚咧過敏
乙：啥物！
甲：皮咧癢啊！
乙：有淡薄啊啦！是講--，恁阿公食薰，敢袂去礙著人的鼻？
甲：聽過「洗面礙著鼻」，毋捌聽講「食薰會去礙著人的鼻」？
乙：「二手菸」（華語音）啊！
甲：òo！伊講：「我的歲頭一大把，歡喜過日卡實際，伊才毋管遐邇濟」。
乙：毋閣，食薰歕風，了錢閣害健康。
甲：唉！阮嘛「和尚划船—無法度」。
乙：無法度嘛著度，返去苦勸恁阿公。
甲：是，我知，欲返進前嘛報人知
乙：「公共場所，全面禁薰」
甲：咱們著照phín閣照行
乙：才有健康的身軀通車拼。
甲：不通食薰吃佮出問題。
乙：性命了掉就討債。
甲：大聲喝予逐家聽。
乙：薰—毋通吃。
甲：欲共逐家說再會。
乙：有閒才來阮兜坐。
合：下台行禮。
(轉去主目錄)
沒有留言:
張貼留言