2011
04302155一丈差九尺
一丈差九尺
乙：(先上台用絃仔【二胡】扭幾个音)
甲：一尺也！汝當時變徦遮有氣質？也逮人咧學扭絃仔。
乙：煞毋知影咱學校的音樂會連鞭就卜開始啊，人我嘛想卜上台表演一下。
甲：汝明明猶佫無半丿，也想卜上台表演，我看汝抑是「睏罔睏，勿愛 眠夢」！
乙：抑汝真正是「目睭皮無漿泔」，看我『貓的無點』。
甲：汝哦，「食老則想欲歕鼓吹」，「看一个影，就欲生一个囝」，今嘛旦仔咧學「扭絃仔」，就卜參加音樂會，我看汝抑是「鴨卵撣(tio3)過山—看破」啊。
乙：什麼「鴨卵撣(tio3)過山—看破」？汝真正是「胡蠅戴著龍眼殼—蓋頭蓋面」。汝敢知影我是佗一間學校的？
甲：我「用肚臍想嘛知」！汝就「頂港有名聲，下港有出名」的「民族國小」啊！
乙：算汝猶佫有淡薄仔理解，無將「珍珠當做貓鼠仔屎」！
甲：是講汝「扭絃仔」，佮「民族國小」有啥關係？
乙：「講予汝捌，喙鬚就好扑結」！我共汝講，阮學校的國樂團已經有四十二冬的歷史啊，我逐工透早、中晝攏嘛聽in1咧練習，就算「勿會 曉唱歌，嘛會曉扑拍」！
甲：聽汝咧「蟾蜍展氣功—膨風」，什麼聽久就會曉？我看hoon7，這恐驚是「一丈差九尺」！
乙：敢有差遮濟？
甲：「屁話減講寡，做落就知影」，汝嘛扭一條仔予逐个聽看mai7咧？
乙：勿愛 啦！勿愛 啦！人遮爾濟，我會歹勢呢！
甲：汝「頭剃落去啊，無洗敢會 使」？
乙：好啦！好啦！今仔日「頷頸生瘤—拄著啊」，我嘛只好「十二月屎桶—盡拚」。
甲：著著著！人講「運命是三分天註定，七分靠扑拚」。「愛拚則會贏」！
乙：(絃仔扭一段音樂，演奏了後開始臭屁)啥款？毋是我咧「賣茶講茶芳，賣花講花紅」，我扭了袂歹hoo7？
甲：拜託咧！（嘲弄的語氣）扭徦離離落落，若像咧「刣雞，割無斷頷頸」，也想欲上台表演，笑死人。
乙：我敢有赫離經？
甲：人講：「別人呵咾一蕊花，家己呵咾是爛冬瓜」，你扭徦「不逐不逸」，離上台表演的水準根本就猶佫「一丈差九尺」！
乙：汝誠實是「坐轎的毋知影扛轎的艱苦」，我的水準敢有遮爾禾黑 ？
甲：無，換我扭一段仔予汝鼻芳一下。(坐落椅仔頂扭一條曲)
乙：萬丈也！汝當時變徦遮厲害，真正是「烏矸仔儲（te2）豆油--無地看」。
甲：講徦汝hoo7，「袂曉挨絃仔顧絞(捲)線，袂曉唱曲顧噴瀾」，俗語講的無呣著，「無迄號尻川，就呣通食迄號瀉藥」。
乙：人我只不過是想卜上台爾爾，汝嘛毋免講徦遮歹聽。
甲：汝哦，「食無三把蕹菜，也想卜上仙天(西天)」，明明「無三寸水，佫想欲扒龍船」，真正是「了然」哦！
乙：莫怪人講：「台仔頂表演五分鐘，台仔跤就愛有三冬的修行」！
甲：俗語講：「年頭若無飼雞栽，年尾若有通做月內」，今年的節目已經來安排，今嘛則練已經逮袂著時代。
乙：我看我抑是緊落台，欣賞表演較實在，今年轉去練看mai7，明年出師則佫來。
甲： 萬丈也
乙：一尺也！
甲＆乙：落台行禮！
(轉去主目錄)
沒有留言:
張貼留言