2011
04302153讀冊愛知影變竅
讀冊愛知影變竅
甲：(台語吟詩出場：觀書有感)
半畝方塘一鑑開，（pùan bóo ‧hong tiông‧ it kàm khai）
天光雲影共徘佪。（thiān kong ‧hûn íng ‧kiōng bâi hâi ）
問渠那得清如許，（būn kû‧ ná tik ‧ching jû hú ）
為有源頭活水來。（ūi iú ‧gûan thôo ‧ hua̍t tsúi lâi ）
乙：喂！喂！喂！三八雲阿，汝是咧唸啥物貨？
甲：衰尾俊阿！汝甘沒看到我在吟詩？
乙：今仔日咱是來答喙鼓，毋是來吟詩比賽呢！汝今嘛是咧發燒囉！
甲：我無咧發燒，甘那小寡仔感著爾爾。
乙：有去看醫生無？
甲：有啦！
乙：有食藥仔無？
甲：無啦！我驚食藥仔會馬西馬西！無法度上台。
乙：若愛看醫生毋食藥仔，共醫生的相片提轉來看看咧就好，加開錢。
甲：汝有影「愛講（公）笑」。
乙：我擱「嬤生孫」咧，汝吟詩佮咱个主題敢有關係。
甲：「無剉(錯)—規叢好好」。
乙：到底是啥物關係？
甲：我若講予汝知，驚汝會倒頭栽！
乙：免驚！我「樹頭若徛乎在, 毋驚樹尾作風颱」。
甲：這首詩是宋朝朱熹寫的叫做：『觀書有感』，詩的內容用「活水」來比論讀冊愛讀活冊。
乙：「換水」欲創啥？「換現金」毋是卡實在？
甲：「活水」、「活水」，毋是「換水」，汝一字讀毋著，意思是「一丈差九尺」。
乙：歹勢啦！不知影汝這呢啊-有學問。
甲：到「擔」汝才知，讀冊知影變竅的人頭殼好，拄到問題無煩惱。
乙：按怎拄著問題無煩惱？汝就講看覓。
甲：汝跤尾suà 予在，我就講予汝知。
乙：好，作汝來。
甲：有兩个成績誠好的查某囡仔，一个六年的，一个五年的，有一工放學行過甘蔗園--。
乙：喔！我知，īn欲偷遏（at）甘蔗，彼（he）叫做「有成績，無道德」。
甲：遏汝的頭啦！īn是拄到一个騎oo- tóo- bái 的「豬哥」，雄雄衝出來，共（kā）遐的六年的拖去甘蔗園。
乙：啊！害阿！絕對不是欲遏甘蔗，救人喔！救人喔！
甲：莫（mài）擱喊阿啦！甘蔗園闊茫茫，「狗吠火車」無路用。
乙：失禮！失禮！我傷緊張，汝繼續講。
甲：遐的五年的看到 oo- tóo- bái 的鎖匙無pue出來，卡緊共伊騎轉來討救兵。
乙：唬！遐的五年的無駕照。
甲：「虎」、虎佇深山內啦！無駕照，好佳哉伊知影變竅。
乙：變竅？變竅了後咧？
甲：了後歸庄的人，扁擔、鋤頭、菜刀攑咧，共甘蔗園圍起來。
乙：圍起來？遐隻「豬哥」敢有掠到？
甲：有阿！遐隻「豬哥」「目睭看粿，跤踏到火」煞去踢著甘蔗尾，摔落去溝仔底。
乙：恐怖！恐怖！一、二、三、四、驚著無代誌，遐的六年的查某囡仔敢有去予耍去？
甲：無啦！安啦！遐的六年的查某囡仔是學校「走標」的選手，足gâu走的，伊對甘蔗園走轉來，速度袂輸 oo- tóo- bái。
乙：呰件代誌汝那會知？敢是恁遐班咧？
甲：毋是啦！是老師上課共阮講的。
乙：我都知，汝「一隻虱母,膨到水牛大」，害我驚kah咇咇掣（phī phī tshuah），。
甲：喂！汝莫黑白講，老師是提真正的代誌作比例，教阮讀冊愛知影變竅。
乙：喔！按呢我-我-真正「栽」（知）阿！
甲：汝知通驚honn！今嘛汝是愛「活水」猶是愛「現金」？
乙：愛「活水」，愛「活水」，阿這首詩汝敢會當共我教？
甲：無問題，算汝捌貨，來！來！來！對我唸。
「半畝方塘一鑑開，天光雲影共徘徊」
乙：「拍某雄雄倒頭栽，天公派人共我刣」
甲：擋咧！莫家己假gâu黑白改！咱先落台才擱班頭仔來。
乙：我是緣投阿-俊
甲：我是妖嬌阿-雲
合：落台行禮，感謝大家，擼力！
(轉去主目錄)
沒有留言:
張貼留言