2011
04302158歡喜唸歌詩
歡喜唸歌詩
阿心：牀前明月光，疑是地上霜。 (用鹿港調吟唱)
舉頭望明月，低頭思故鄉。
(李白 靜夜思 鹿港調改編 )
好聽！好聽！我那會遮呢賢！
阿嬌：阿心，你搖頭撥耳，踅踅唸，親像佇起乩。
阿心：地動，驚死人，阿嬌，咱就趕緊來藏覓。
阿嬌：實在是鴨仔聽雷，聽攏無，我是說你佇唸啥物？
阿心：歹勢，歹勢，我佇唸唐詩。
阿嬌：誠厲害，唐詩會使按呢唸，毋過，有幾字佮平常說話的音，無三同？
阿心：講到你捌，喙鬚好拍結。我唸的是讀冊音，擱叫做孔子白，當然無同款。
阿嬌：你實在是黑矸仔貯豆油，無底看。
毋過，我看你假若會曉這首詩？
阿心：我會曉一拖拉庫，你要企乎在，斟酌聽‧袂使皮皮剉。
阿嬌：我企真在，擱袂剉。
阿心：目賙扒互金，耳空掖互利。
阿嬌：真煩，你到底有要唱無？
阿心：歹勢，歹勢，我先培養情緒。
來了…… (用黃梅調吟唱)
松下問童子，言師採藥去。只在此山中，雲深不知處。
(賈島 尋隱者不遇 黃梅調)
阿嬌：咦，這聽起來，親像阮阿嬤唱的「梁山伯佮祝英台」的黃梅調。
阿心：規叢好好，風吹未倒 ------ 無剉。
阿嬌：你實在有二步七仔。
阿心：我擱有足濟步，既然你有誠意，我用宜蘭酒令的調，擱唱一首，
予你鼻香，你要斟酌聽。 (用宜蘭酒令調吟唱)
空山不見人，但聞人語響。返景入深林，復照青苔上
(王維 鹿柴 宜蘭酒令)
ㄉㄨㄞ，ㄉㄨㄞ (敲頭)
阿嬌：你那會使扣我的頭，我嘛會曉唱。
阿心：敢有影，我看你一箍槌槌，親像豬頭皮…
阿嬌：你講我是豬！
阿心：我是講豬頭皮 ------ 煎無油！
阿嬌：你實在看人無目地，按呢，我唱遊子吟這首詩，予你臆啥物調。
慈母手中線，遊子身上衣。臨行密密縫，意恐遲遲歸。
誰言寸草心，報得三春暉。誰言寸草心，報得三春暉。
(孟郊 周杰倫 聽媽媽的話) (用周杰倫 聽媽媽的話吟唱)
阿心：這…這實在是考倒我。
阿嬌：臭屁未起來乎，荏荏馬嘛有一步踢。
我佮你講這是周杰倫的歌：聽媽媽的話。
阿心：哈啊，你實在是烏白湊，刁工來亂的。
阿嬌：誰教你遮臭屁！
你會曉唸古調，我會曉唱新曲，而且即馬無人愛聽老古板的調。
阿心：實在是氣死人，好，頭洗落去，無拼袂使。
好膽你佮我一句綴一句。
阿嬌：來啊！
阿心：去年今日此門中 (用歌仔戲南光調吟唱)
阿嬌：人面桃花相映紅
阿心：人面不知何處去
阿嬌：桃花依舊笑春風
(崔護 題都城南莊 歌仔戲南光調)
ㄉㄨㄞ，ㄉㄨㄞ (敲頭)
阿心：你那會使扣我的頭！
阿嬌：教你做人要謙虛。
阿心：好，擱來拼，斟酌聽：
逐工逐工來唸歌詩 予我心涼嘛脾土開。 (用RAP 4/4拍)
阿嬌：台語是母語 袂使甲伊放袂記
阿心：唸著歌詩用台語 擱卡趣味 嘛好記 考試嘛會著第一
阿嬌：你的功夫擱袂歹
阿心：YEH 到旦你才知 咱來繼續觸
阿嬌：好膽做你來
阿心：時間即欲到 老師老師的面臭臭 哦 擱一直佮咱青
阿嬌：咱就緊唸煞 腳底抹油 旋喔
阿心，阿嬌：才才 才才 才袂 壞
(轉去主目錄)
沒有留言:
張貼留言