2011
04302203答喙鼓：喙甜甜，朋友伴身邊
答喙鼓：喙甜甜，朋友伴身邊
男：志明 女：春嬌
男女：上台行禮
女：看你上台一鞠躬，阿無穿西裝，我來挈（hiannh） 一領予你攏，按咧看起來遮相當。
男：外省仔麵－免免免，我才無像你~遐愛展。
女：哼！好心予雷唚（tsim）。
男：莫安呢啦！刺耙耙。
女：走啦!(推志明)看著你這個gong7志明，就無好心情。
男：阿娘~！(跌倒)
女：喂～乖囝的，媽媽撫撫，阿娘惜惜honnh。
男：唬！你真正是食我夠夠夠。
女：食你夠夠，就食你夠夠，無~是欲按怎?
男：我毋敢共你按怎啦!只是、、、只是、、、。
女：是按怎毋？
男：想欲招你來~看電影？
女：你?佮我?
男：嗯!
女：咱兩個?
男：嗯!敢會使?
女：你~ ~趴咧趴咧~較祙著槍，枵狗數想豬肝骨，哼!
男：莫受氣啦!我知影、、、我gong7-gong7、呆呆、槌槌 、、、予我一擺機會啦!
女：予你機會？（吊他胃口）
男：真的喔!行、、(以為真的，開心的模樣，要拉她的手)
女：ka~ ~簡單！(用手甩他)
男：阿無是擱按怎?(壓低聲音，有點失望)
女：你看我講話，媠否?
男：當然嘛媠。(盯著對方看，表情不以為然，但又想約她)
女：若孫悟空做投手咧-豬哥神，是咧看啥?
男：我講你媠，媠媠，媠媠媠。
女：人我是講~我講的台語，「媠」否?
男：講台語喔?桌頂拈柑啦!
女：遮臭屁!台語!啥袂曉講，愛講了媠氣，才祙漏氣!
男：這嘛、、、，菩薩講(比蓮花指)
女：講啥物?(好奇)
男：ok啦！(比蓮花指)
女：愛擱共我褒哦!
男：喔！愛講好聽的話，我上gau5。
女：好！來啊!
男：春嬌啊穿插奅奅奅（phann7-phann7-phann7）。
女：當然喏!啥像你，穿徦倯倯倯（song5- song5- song5）。
男：我共你褒，你毋著共我呵~，哪會~ ~(無言，用表情)
女：歹勢，照品照行。
男：mh！你頭毛黑sim3-sim3，目睭金金大大蕊，共我電一下~ka-lun2-sun2。
女：hannh！你陷眠喔!(開心，卻故作討厭狀)
男： 乞食揹葫蘆~ ~假仙(向觀眾偷偷講)
女：你共我偷罵honnh?
男：無啦!無啦!我是講你鼻仔啄啄啄，頭仔khok-khok-khok。
女：hng！你講我khok頭?
男：喂！你毋捌聽人講~前khok金，後khok銀，前khok的做夫人喔!
女：哼!安呢毋遮差不多。
男：擱來！擱來哦!體格~無懸無低拄拄好，毋過平平平(對觀眾講)。
女：你講啥? (靠過去聽，聽完拉他的耳朵)
男：無啦!我是講、、、塗跤~平~平平，平~平平~。
女：擱硬拗!
男：哪有~ ~人你生做古錐古錐，予人看”著”心花開，咱兩個若徛（khia7）做堆、、、
女：按怎?
男：雙雙對對，萬年富貴。
女：你這支嘴糊瘰瘰（lui3-lui3），啥人欲佮你雙雙對對，萬年富貴。
男：就是你呀!
女：予你呵咾甲按呢，我敢真正遐迷人?
男：迷人!迷人!當然嘛迷人!咱會當來看電影矣honnh?
女：好!行!
男：褒褒挲挲講台語(gu2)，輕輕鬆鬆來比喻。
女：語言文化久久久，好言好語好功夫。
男：志明
女：春嬌
男女：落台行禮
(轉去主目錄)
沒有留言:
張貼留言