2011
05211837答喙鼓----逐家做伙學台語
閩南語答喙鼓
題目：逐家作夥學台語
撰稿人：韓滿
學校：嘉義市育人國民小學
甲、乙：一、二、三、四笑咪咪，逐家作夥學台語。
甲：阿安也，汝是走去佗？手機仔也呣開，害我撽幾落擺，攏無人。
乙：喂喂喂，汝臭誕免本錢乎！手機仔我攏嘛紮咧，無我挈予汝看啦！ (對囊袋仔挈……)
甲：哈哈哈，汝目睭花花，瓠仔看做菜瓜，共電視的按機仔看做是手機仔。
乙：嗐！痞勢，痞勢!汝的台語講徦即爾老，汝教我講台語好否？
甲：無問題!咱台灣人攏嘛愛講台語。
乙：是啊！咱逐家撞死台灣人，攏嘛愛講台語。
甲：呸呸呸！咱逐家攏是台灣人，呣是撞死台灣人。
乙：台語我學腫腫兩粒奶頭，猶佫學曉。
甲：啥麼咧腫兩粒奶頭，汝腫三粒奶頭嘛曉，
是汝學兩年矣，來，逮我講一遍：「我學兩年矣！」
乙：是，我學兩年矣，唉啊！台語即爾痞學，我敢學會曉？
甲：學台語靠智慧，智慧靠啥麼？啊！靠呰粒啦! (用手指頭)衝！衝！衝！
乙：好! 衝！衝！衝！著啦，昨下昏我咧唱歌，阮阿母問我迄條歌叫啥麼名，我共伊講「青春無愛老爸」。
甲：唉!唉!唉!汝呰个不孝子，恁老母定著誠受氣。
乙：汝真正是阮老母腹肚底的蛔蟲呢！ 阮老母講：「汝大漢矣，翅股頭凋矣，卜飛矣！連老爸就無愛囉！」
甲：青春不要留白(唱、跳)…歌名是叫做「青春無愛留白」啦！
乙：乎！是「青春無愛留白」呣是「青春無愛老爸」哦，莫怪阮母也赫爾受氣。
甲：烏矸仔貯豆油！看出，汝愈來愈（gau5）矣哦！
乙：頂个月，我逮我阿爸去美國逸陶，有誠好爽的代誌哦！
甲：啥代誌？汝呣著緊講來予阮聽看咧！
乙：我佇路裡看著兩台車相撞，美國警察自按爾走來問我。
甲：關公啉燒酒，看出哦，汝佟時仔赫爾（gau5）。會曉佮美國警察講話。
乙：我就共伊講：「one car come, one car go ,two car kiss 碰碰，嗚(oonn)嚶(inn) 嗚(oonn)嚶(inn)。」
甲：汝講啥？
乙：美國警察嘛聽徦霧煞煞，呰陣，有一个台灣來的少年家仔聽著，替我講徦清清楚楚。
甲：哦！好佳哉！好佳哉！啊若無著誠實笑死人囉！
乙：聽講誠濟台語攏嘛有音無字，按爾是卜如何是好咧？
甲：攏嘛有字，來！佗一字有音無字，汝講看。
乙：狗仔 （kainn ） （kainn）叫的 kainn卜按怎寫？
甲：石頭仔掔（khian）著狗仔，狗仔就會 （kainn），所以頂懸一字石，下骹一字犬叫做 （kainn）。
乙：哇！誠心適哦。
甲：我問汝，石頭揕入去古井裡，有啥麼聲？
乙：「丼」一聲！
甲：著！著！著！井中一點叫做丼，井中的迄點就是石頭仔。
乙：哇！好爽好爽。
甲：門裡有一橫柴共門鎖起來，就叫做閂，所以門字裡底寫一橫叫做閂。
乙：按爾 按怎寫？
甲：門裡有一直柴共門拱（king）起來，就是 （tu2），所以門字裡底寫一直畫叫做 （tu2）。
甲：開兩爿門扇板的聲，叫做 （inn） （uainn）。
乙：哦！原來汝即爾仔有學問，按爾我佫問汝，起厝的水泥，是按怎叫紅毛塗，呣叫黑毛塗抑是白毛塗。
甲：嘿是荷蘭人引進入來的，因為荷蘭人的頭毛是紅的，所以就共荷蘭人起厝的塗叫做紅毛塗。
乙：哦！學台語即爾仔好爽，佫會捌足濟代誌，按爾我卜開始認真學台語囉。
甲、乙：逐家作夥來學台語。
台語實在有夠媠
逐句攏嘛誠趣味
字底包含真情意
語中佫較有智慧
台語實在有夠媠
逐家做夥學台語
向望開花佫結籽
予伊流傳萬萬年
甲、乙：祝逐家身體健康食百二。
(轉去主目錄)
2011-05-22 15:50:36AA email給AA 前往AA的日誌
一工跑百二公里
