2011
05211831答喙鼓─來去學台語
答喙鼓─來去學台語
人物：甲 乙
甲：嘿！○○也，聽講社區有咧教台語，咱來去報名學台語！
乙：阿台語汝都會曉矣，閣卜學啥mih4？
甲：汝安爾算會曉講喔？無，我問汝，咱的台語攏總有幾調？
乙：(想一下)m3知呢！
甲：八聲七調啦！聲調若是講m3著，就笑破人的喙喔！
乙：按怎講！
甲：我講予汝聽。有一位阿篤仔教授，歇睏的時，學生摕一粒白煠的卵予食，阿篤仔教授咬一喙講：「無閹是卜按怎食？啥mih4人卜予我閹？」學生聽一下笑甲東倒西歪。阿篤仔教授感覺足奇怪，就問講：「恁哪會一直咧chio1？有啥mih4好chio1的？」
乙：chio1！一直chio1！一直chio1！(細聲唸，歹勢款，用葵扇半遮面。)
甲：汝mai3一直chio1！好無！汝若一直chio1「落去」，咱的戲就免搬矣！
乙：人我是咧「笑」，不是咧chio1─！(chio1音拉長)
甲：台語的聲調若是講m3著，敢是會笑破人的喙leh？
乙：m3─有影都著！
甲：不但安爾，台語的八聲七調，予咱講話哪咧唱歌詩，押韻鬥句閣世喙，包你聽甲醉醉醉！
乙：mai3臭彈，人攏嘛講咱的台語，是土言土語，予人看be7起。
甲：唉唷唷唷唷！講即款話的人，真正是無常識閣兼不捌字，inn2 onn3閣愛開喙。咱的台語，有咱祖先的智慧，已經流傳二千外年，只是家己不知機。
乙：無擱我讀的中國冊內底，嘛有真嫷的話語呢。
甲：我不是講中國話文無夠嫷，不過咱的台語一點仔都無輸伊！
乙：阿無汝舉一個例來聽看覓咧！
甲：好，汝敢知影詩經內底按怎形容美女？
乙：(想一下)不知呢！
甲：這是因為伊不是汝的母語，所以汝不知機。
乙：阿無汝講一個來分聽！
甲：伊講：「手如柔夷chiu2 ju5 jiu5 i5，膚如凝脂hu1 ju5 ging5 ci1，頸如蝤蠐am7 ju5 chiu5 ce5，齒如瓠犀khi2 ju5 pu5 se1，螓首蛾眉cin5 siu2 go5 bi5，巧笑倩兮kha2 chio3 chian3 he0，美目盼兮bi2 bok8 phan3 he0。(台語)(慢慢)(問台仔跤的聽眾：請問各位來賓，恁敢聽有？)
乙：？！X ＃％＆(聽無的款)啥mih4是柔魚，啥mih4 是蟾蜍？
甲：不是啦！伊的意思是講迄個查某囡仔的手，親像拄發出來的茅hm5仔草，皮膚親像堅凍的豬油，頷管仔親像桑仔蟲赫爾白，喙齒親像白白的瓠仔籽，頭額親像一款細隻的白蟲，目眉那親像gia5仔的兩支鬚。
乙：唉唷啊！那咧講一隻蟲咧！驚死人！迄款嫷查某囡仔，我還是閃卡邊leh卡好。
甲：汝敢知，咱台語是安爾講也，「即個小姐是二八青春，面那桃花免抹粉，眉那新月初出雲，跤穿弓鞋縛三寸，雙手白白真幼嫩，特別是咧看人的時陣，目尾一下摔，喙一下呅，唉唷！un2 ku1 的看著be7 伸侖，缺喙的看著be7含唇，舵公看著be7駛船，師公看著be7引魂，阿若是箍桶的看著喔！就be7箍面桶盆。」
乙：「哇─哇─哇─哇！敢真正有遐爾嫷的美人？」
甲：我哪會知！
乙：真正心適閣趣味，阿台語是按怎講bai2查某囡仔？
甲：伊講：「即個查某是齴食兼貧惰，衫褲歸年不捌換，弓鞋橫比三寸半，頭殼一粒米斗大，目睭那酒盞，喙那八角碗，鼻栱那彰化迄粒八─掛─山，唉唷！真正是蟳看哱phu7瀾，蝦看倒彈，鬼仔看著流凊汗，田蛤仔看著跳過岸，阿若是予汝看著喔，一定是歸箍人痞痞掣，倒卜予人拖。」
乙：唉唷，驚死人，卡緊走。
甲：走赫緊卜創啥？
乙：鬼仔看著都流汗矣，我若無緊走，等咧乎摔sut4著，我毋ciun7啊十七兩翹翹。
(乙回頭看甲)講實在的，汝雖然講了有卡ham3大，不過聽起來是真紲拍。
甲：阿若講著紲拍，台語會當講一大綰。
乙：hio3？阿無汝閣講寡仔來分聽！
甲：好！（清喉嚨），「有量啊，頭家啊！來贊助啊！」
乙：「好心啊！阿嬸啊，來疼痛啊」，「呸！呸！呸！我煞綴tue3汝咧做乞食！」
甲：卡早的乞食嘛無好做呢！
乙：ka1 ci3 啊揹咧，手伸出去就好矣！
甲：無赫爾仔簡單喔！古早連乞食，嘛愛靠家己的本領趁食，若無三兩部策仔，四句聯若無飽飽飽，就免想卜討食。
乙：阿無汝捌講濟，講來鼻香咧！
甲：無問題，四句聯佇喜事的時，上好用。
「來食一杯新娘茶，予汝明年生雙個，一個手裡抱，一個塗跤爬」。
乙：毋通，毋通，一擺生雙個，我育(io1) be7來！
甲：我bo5咧叫汝生，汝咧煩惱啥！
乙：阮即碼拄買新厝，汝嘛共阮講兩句啊。
甲：沒問題，來，聽乎詳細！
「聽講恁兜起新厝，叫我愛來唸四句，萬事如意逐項有，添丁發財年年富(bu3)。」
乙：感謝，感謝，勞力，勞力，憑汝即句，我佮汝來去報名學台語，後擺才會當講足嫷的台語。
甲：安爾好！咱做伙來去報名學台語！
最後祝逐家身體健食百二，事事項項皆如意！
○○○ ○○○ 落台一鞠躬
(轉去主目錄)
沒有留言:
張貼留言