2011
05211829我會驚呢！
我會驚呢！
甲：拜託ㄟ！比賽就卜開始，汝猶呣緊出來，是佇遐咧變什麼魍(蚊)？(著急的表情)擱呣較緊咧。
乙：我會驚呢！
甲：汝是咧驚啥？「人講驚驚是勿會得等」，有我予汝靠，免驚。
乙：人是頭一每上台，「呣捌做過大家¬」當然嘛是會「皮皮搐」啊！
甲：唉！講徦汝hoo3實在是chau7勿會 出門。
(對觀眾講)歹勢，俗語講了誠實在，今仔的表演對伊來講是頭一每，麻煩逐个噗仔聲佫再催一擺，鼓勵伊勇敢來上台。（家己人佇台仔骹製造噗仔聲，乙歹勢歹勢行入來）
甲：今也主辦單位來安排，予阮呰个機會來上台。
乙：人今仔日上台是頭一每，講了無好恁就勿愛見怪。
甲：唉！人講：「種著痞田望後冬，生著痞囝一世人」。
乙：佮我做夥上台恐驚是「火燒罟寮全無望，擔沙囤海無彩工」。
甲：講實在的，老師是安怎叫汝來比賽，緣由是啥kau3 旦阮嘛猶呣知。
乙：可能是「目睭花花，瓠仔看做菜瓜」。(開玩笑的感覺)
甲：是講無要緊啦！咱今仔日既然就上台，「頭剃了，無洗嘛勿會使」。
乙：這嘛是有影啦！管伊是「瓠仔看做菜瓜」，抑是「鳳梨看做西瓜」，
反正「頷頸生瘤—拄著啊」，咱嘛只好「甘草準做高麗」，「戆牛當做千里馬」。
甲：ㄟ！汝真正是「黑矸仔儲豆油—沒地看」，押韻搭句擱講了真好聽。
乙：無法度啊！今仔既然踦佇茲，當然嘛愛「十二月屎桶—盡拚」。
甲：著著著！人講「運命是三分天註定，七分靠扑拚。愛拚則會贏」！
乙：只要咱「少年就來扑拚，食老一定會有好名聲」。
甲：老師定定共阮講：「捷啉酒勿會 醉，捷見官勿會 畏」。
乙：「捷講喙會順，捷做手勿會 鈍」。
甲：咱拄著代誌呣免驚，只要願意試一下仔鹹淡，雙手搰力來扑拚，就會當爬上成功的迄粒山。
乙：「沒剉(錯)，規叢好好」。呣管是做什麼代誌攏仝款，(國語)「一回生，二回熟，三回就會變高手」。
甲：人講：「人不可貌相，海水不可斗量。」就算是「荏荏馬嘛有一步踢。」
乙：人講：「天生我材必有用」，只要咱勿愛放棄希望，「小卒有時嘛會變英雄」。
甲：無呣著！咱呣通「目睭皮無漿泔」，當做別人『貓仔無點』。
乙：嘛呣通想講家己無經驗，逐个機會攏讓予別人。
甲：雖然「萬事起頭難」，呣擱若是有「艱苦頭」，就會有「快活尾」。
乙：只要咱共「食苦當做食補」，呣驚艱苦。
甲：做代誌「有好頭嘛有好尾」，堅持到底。
乙：把握每一擺的機會，「戲棚骹踦久就是咱的」。
甲：所以講：(扑竹板或捲軸)人生世事百百項，酸甜苦澀攏無仝
乙：勇敢主動捷振動，呣管好歹攏愛試驗。
甲：搰力扑拚呣驚悿，把握機會學經驗，
乙：堅持到底落苦工，前途光明有希望啊有—希—望。
甲：今仔日阮佇茲「賣茶講茶芳，賣花講花紅」！
乙：望逐个「菜脯根，罔咬鹹」，呣通相棄嫌。
※※※※※※※※※※※※※※※※※※※※※※※※※※※
甲：啊汝擱會驚勿會 ？
乙：我猶擱足驚的呢？
甲：已經講了啊，汝擱咧驚啥？
乙：驚後壁迄个啊？
甲：佗一个？
乙：校長啊！
甲：校長有啥好驚ㄟ？
乙：伊講我若沒得名，等一下勿會 當上車，我哪會呣驚！
※※※※※※※※※※※※※※※※※※※※※※※※※※※
(轉去主目錄)
沒有留言:
張貼留言