2010
11181835缺欠(khueh-khiam3)----小說, 原作 帥安 夢生譯
180譯品篇
王董的一踏入去派出所，就看著in查某囝坐佇所長的事務桌仔頭前，佮所長兩个人面對面坐咧。伊緊咧三步做兩步行倚過，就隨tu一張me2 si3予伊，面仔笑笑仔講：「你好，我是之瑜in老爸。」
「王先生你好，請坐。」所長的意思是愛伊坐佇in查某囝的邊仔。就隨紲落去講：「拄才，之瑜佇咧店裡，有一寡物件袂記得納錢。我是想欲請你來了解一下……」
「你這个囡仔……」猶袂等所長講煞，王董的一下手就欲按in查某囝的面巴(pa)落去。
「王先生……」所長跤手誠猛(me2)，就共伊的手搝(giu2)牢咧。
「自細漢到大漢，我逐項攏予你上好的，我有予你欠過啥物無？你煞共我去偷提物件！」伊那講那氣，看著in查某囝雄雄共頭越過另外一爿，性地就閣夯起來，大聲喝講：「你這啥態度？」嘛想欲共所長的手用予開來繼續教示in查某囝。
這个時陣所長的手機仔敢若是來咧解圍的款霆(tan5)起來矣。
「歹勢！」所長那講那共伊的雙手硩(teh)落來，愛王董的冷靜落來。嘛共手機仔開開。
「……」
「有！」所長無張持就做出徛甲挺挺挺的姿勢。
「……」
「歹勢啦，臨時有代誌嘛。」
「……」
「我嘛足想你的啊。」
「……」
「足緊足緊就好矣。你先去睏，我明仔載早起用早頓予你食好無？」
「……」
「來頓印仔。這馬有一个姊姊揣無路通轉去，我欲共伊鬥相共揣轉去厝的路，你趕緊佮媽媽去睏嘿。」
「……」
「再會。」
所長共手機仔收起來，煞去發現查某囡仔的面流兩行(ling5)目屎，足細聲仔一直咧講：「你攏毋捌按呢，你攏毋捌按呢……」(575字)原作品欣賞
回應
念缺欠嗎