2010
12041040爸仔囝---極短篇小說: 原作 帥安; 夢生 譯
289譯品篇
這幾工的拍拚最後失敗矣。葉董的猶是決定取消伊家己落的訂單，予我白白了三十萬。去接查某囝轉來厝的路裡，我的心情有淡薄仔鬱卒鬱卒，佮金色的日頭光相對，感覺就是袂合(hah8)。
「欲去咱的秘密通道無？」我共伊問。
「秘密通道，耶！」伊伸出兩枝短短的指頭仔，比出"Y"的手勢。
我小可仔催油咧，足緊就來到阮的祕密通道―溪仔墘。順石坎(gam2)仔peh起去了後，伊共我的二指(ji7-tsainn2)放開，兩个人面向溪仔水，並(phing7)做伙徛(khia7)咧。
「準備好袂？」我細聲仔共伊問。
「嗯！」
「一，二 ，三，討厭(ia3)你…」阮同齊用上大的音量喝(huah)出來。然後坐佇坎仔頂。涼風吹咧吹咧。過誠久……
「爸比，其實我拄才心肝內想的是你！」我想袂到伊煞會第一改公佈答案。
「哦？」我用目神共伊問原因。
「因為你講欲tshua7我去看bang2 gah的電影又閣白賊，老師講按呢會變成大箍呆！」伊咧怨我講話無算話。
「歹勢啦，因為爸爸這幾工有代誌。」我心肝底濆(bun3)出來一絲仔的歹勢。
「毋過，你逐工暗時都攏佇厝啊，我看你都攏無代誌啊！」
「彼是因為......」真正是毋知影欲按怎共伊講才好。
伊看我講袂出喙，雄雄peh起來仆(phak)佇我的尻脊骿，佇我的耳空邊講:「毋過，爸比，我嘛是足愛你的。」
「......」我的心肝頭，有一港像溫泉仝款的感動，直直濆……(字數489字)欣賞原作品
回應
有一個共同消thau2情緒的方式
袂bai2