2011
05041550阿公的教示
阿公的教示
(乙一面上台、一面扑「噴嚏」)
甲：誒！(看一下乙)汝是按怎？若會鼻水管管流，一上台就扑「噴嚏」佫兼「咳嗽」？
乙：啊就前幾工去感(寒)著！(一面講佫一面扑「噴嚏」)
甲：汝是有要緊抑無？有去予先生(醫生)看無？
乙：免啦！這小寡感冒爾爾，應該無啥要緊啦！便藥食食咧就好啊！
甲：無什麼代誌就好啦！汝就愛較保重咧！
乙：多謝汝的關心！我呰幾工加歇睏寡應該就會使啊！
甲：呣佫，無是我愛講汝，汝明明就知影咱今仔日卜上台來比賽(表演)，若會無較細膩的？
乙：無啦！煞呣知影前一暫仔，我看日頭赤炎炎，想講春天到啊！我就共一寡寒人的衫仔褲攏共收收起來，哪知影前二工仔無張無持佫變天，我呣則會去寒著。
甲：啊汝敢呣捌聽人講：「春天後母面」？
乙：「春天後母面」？這春天佮後母是有什麼牽連？
甲：人講春天旦仔到个時陣，天氣變化猶未穩，勿會 輸後母咧發性底是有時有陣，佟時卜變天是按算勿會 準。
乙：呰句話啥人共汝教的？
甲：阮阿公也！阮阿公佫講：「未食五月節粽，破裘呣通放」！
乙：「未食五日節粽，破裘呣通放」？這什麼意思汝呣就開破予阮聽。
甲：阮阿公講猶未食五日節粽進前，天氣猶佫無穩定，寒天的厚衫加減猶著穿，呣通收傷緊則來喝冷。
乙：這種代誌汝呣就量早共我講，按呢我就勿會 去寒著啊！
甲：呣是我愛講汝，現此時就卜比賽啊，汝則來咧感冒身體虛。汝老師若會「揀啊揀，揀著汝呰个賣龍眼(手比對乙的身軀)」，害我呰隻「勇勇仔馬縛佇將軍柱」。
乙：汝真正是「澎湖菜瓜--雜唸」！咱既然就已經上台，「頭剃了，無洗嘛勿會使」。
甲：唉！人講：「種著痞田望後冬，生著痞囝一世人」。看汝呰个扮勢，今仔日咱若卜得名，恐驚是「火燒罟寮全無望，擔沙囤海無彩工」。
乙：人講「無牛嘛會當使馬」，「無布袋戲尪仔嘛只好弄傀儡」。橫直就「頷頸生瘤—拄著啊」，汝嘛較忍耐咧。
甲：這嘛是有影啦！今仔日我嘛只好共「甘草準做高麗」，「戆牛(手比乙)當做千里馬」。
乙：無汝嘛共逐个講汝阿公佫教汝啥？
甲：阮阿公講：做代誌勿會 當「只顧目睭前，無看尻川後」！
乙：老師呣是講：今仔上台愛顧面頭前的觀眾，汝阿公叫咱看尻川後是卜創啥？
甲：呣是啦！汝真正是「十二月風吹-痟徦無尾」，聽無清楚，佫烏白扳話。
乙：無恁阿公是什麼意思？
甲：阮阿公講：「『花無百日紅，人無千日好』，『好天就存雨來糧』，拄著歹天則免憂愁。足濟事誌卜來是無張無持，咱平時就愛有準備，則勿會 拄著代誌，煞呣知影卜按怎處理。」
乙：著啦！著啦！像咱今仔上台呰件代誌，是先就愛有準備，則勿會 踦佇遮緊張徦半小死，按呢就無啥麼意義。
甲：誒，勿會 禾黑 哦！我講話頭，汝就知話尾汝真正是「黑矸仔儲豆油—沒地看」。
乙：今仔既然來徦茲，當然嘛愛「十二月屎桶—盡拚」。
甲：阮阿公嘛講：「『捷啉酒勿會 醉，捷見官勿會 畏』，『捷講喙會順，捷做手勿會 鈍』。」
乙：咱拄著代誌呣免驚，只要願意試一下仔鹹淡，雙手搰力來扑拚，就會當爬上成功的迄粒山。
甲：著著著！人講「運命是三分天註定，七分靠扑拚。愛拚則會贏」！
乙：只要咱「少年就來扑拚，食老一定會有好名聲」。
甲&乙：所以講：「誒！阿公的話語有智慧，咱序細愛聽大人教示，發揚文化有意義，經驗傳承靠俗語啊靠--俗--語」。
(轉去主目錄)
沒有留言:
張貼留言