2011
04302256聖誕老公公欲減肥
聖誕老公公欲減肥
郭祖仁98/3/2修正版
聖誕老人：阿鹿仔兄！走卡緊咧。舊年送到即馬，擱送勿會了。唉！這隻鹿仔，平常時，吃若牛，吃遮濟。做若龜，誠敖(gau5)趖。
小朋友：聖誕老公公，騎車烏白撞，撞甲鼻仔紅貢貢，實在有夠戇！實在有夠戇！
聖誕老人：囡仔！小等一下！
小朋友：咦，啥人佇叫我？
聖誕老人：囡仔！是我啦，你佇唱啥？
小朋友：哈啊！這你也毋知，你聽，這就是聖誕老公公的歌。
聖誕老人：我有聽過英文，法文，北京話，擱毋捌聽過有人按呢唱！
小朋友：你有夠俗，這是台語的KUSO。
聖誕老人：KUSO！咳咳嗽？按呢，趕緊來食「龍角散」。
小朋友：啊！講到你捌，喙鬚好拍結。
聖誕老人：喙鬚？囡仔人那有喙鬚？
小朋友：真正是鴨仔聽雷，無愛佮你講啦。
聖誕老人： 哼，你敢知影我是啥人？
小朋友：你，你就是苦毒動物的大歹人！
你遮大叢，鹿仔遮細隻，那拖你會行！
聖誕老人：烏白講！阮嘛是走假若飛咧！
小朋友：看你穿紅衫，戴紅帽，紅鼻仔，白喙鬚，擱有鹿仔…..
你是….你是….
實在是火燒豬頭…
聖誕老人：死囡仔，你講我是豬頭！
小朋友：無啦，我是講火燒豬頭………面熟，面熟。
聖誕老人：誠失禮。耳空重，聽勿會清。
毋過，你若捌我，我就送你獎品。
小朋友：我知，我知，
你是-假的-聖誕老公公！
聖誕老人：囡仔人，講話無斬節，我是正港的聖誕老公公！
小朋友：歹勢，我目睭花花，匏仔看作菜瓜，毋過你比卡早擱卡…擱卡…。
聖誕老人：唉！話若欲講透枝，目屎就揮勿會離。
最近小可仔走路，就足喘；
坐無幾分鐘，就欲盹龜。
小朋友：擱有，擱有，
就是食老三項歹：第一哈唏流目屎，第二放尿厚尿滓，第三放屁兼滲屎。嘻嘻！
聖誕老人：唉，連你囡仔嘛笑我醜！
小朋友：真歹勢。
按呢，你就趕緊去檢查身體，佮會知。
聖誕老人：有啊，毋過無做無代誌，做了卡慘死。
小朋友：那會按呢？
聖誕老人：做檢查彼个醫師一看到我，就叫我要減肥。
實在是家己無肉，怨人大尻川。
小朋友：毋過「大個，只是好看頭」！
聖誕老人：嘛有人講：「頭大面四方，肚大居財王」。
小朋友：我看是「頭大若獅，肚大貯屎」。
聖誕老人：囡仔人，好話加減講，歹話莫出喙。
小朋友：歹勢，我是講爽笑
聖誕老人：好啦，好啦，我嘛知影要減肥。
你看我的檢查報告，佮我的鼻子仝款紅吱吱！
彼个醫師擱講我是三高！
小朋友：瘦猴？你那有瘦！
聖誕老人：囡仔人，有耳無喙，烏白湊。毋是瘦猴，是三高。
三高是講血糖高、血壓高、膽固醇高
我嘛知影要減肥，毋過，毋知影欲按怎做卡好？
小朋友：我知，我知，人若欲減肥，吃食要注意，嘛要注重運動，你甘知影3-3-3?
聖誕老人：3-3-3 ? 遐是啥物？
小朋友：就是：頭一個3是作運動勿會使懶散，要認真！
第二個3是作運動勿會使三心兩意，要專心！
上尾一個3是--是--啊!--作運動要穿名牌的POLO衫！
聖誕老人：敢是按呢，我會記得醫生毋是按呢講？
小朋友：歹勢，歹勢，我是講爽笑
頭一個3是一禮拜要運動3拜
第二個3是一拜要參拾分鐘
上尾一個3是心跳要維持一百三(130)
聖誕老人：我嘛有運動啊。
小朋友：按呢，你一禮拜運動幾拜？
聖誕老人：哈！哈！我甲一冬的運動，佇聖誕節彼一瞑就做了了呢，
你看我有足巧無？
小朋友：哈啊！遐那是做運動，按呢是會過勞死呢！
聖誕老人：好啦，我會改。
囡仔，我欲去減肥囉!這規袋的物件攏送予你啦！再會啦！
小朋友：小等一下！小等一下！聖誕老公公！
你勿會使走啦！物件要送予人啦！
真正走啊！
哇！這聲卯死啊！這規袋的物件攏是我的。
Bye！Bye！
(轉去主目錄)
沒有留言:
張貼留言