2011
04302253行行出狀元
行行出狀元
甲：（一面唱燒肉粽，一面出場）自悲自嘆歹命人，父母本來真疼痛，予我讀書幾偌冬，出業頭路無半項，暫時來賣燒肉粽，燒肉粽啊燒肉粽，賣燒肉粽！(口白)燒肉粽喔！好食的燒肉粽喔！
唉！呰tsam仔生理誠歹做，無彩我唱徦嘴角全沫，嘛是無半隻胡蠅蠓仔來交關。
乙：頭拄仔若親像有聽著人在喝「燒肉粽」，欲中晝仔我的腹肚腸仔嘛開始咕咕叫，共伊買二粒仔，塞一下仔喙箍咧。頭家也！燒肉粽欲按怎賣？
甲：細粒的二十，大粒的三十，買一粒佫送兩粒，人客汝欲買偌濟？
乙：我欲買……誒，頭家，我看汝若像咧「火燒豬頭--面熟面熟」！汝是………？
甲：(較緊頭犁犁，掩掩揠揠-遮遮掩掩，無愛予人看著伊的面)無啦！無啦！可能是汝「目睭花花，瓠仔當做菜瓜」，認了毋著人啦！
乙：汝是迄个迄个………「頂港有名聲，下港有出名，轟動桃仔城，驚動城隍爺」的－祝— 好— 額！
甲：啊！--汝是啥人？
乙：歹勢！煞忘記跟大家請安問好：大家好！我是祝好額的同窗的--「秦—散—赤」。
甲：（從頭到跤規身軀相一遍，則斡對邊仔共觀眾講）規身軀掛徦金光閃閃，明明就是出來展予人看，若會叫做「秦—散—赤」？
乙：按怎？汝勿會 認得我啊哦！
甲：汝呰个型看起來（比乙的外型），就知影家賄賰勿會 少，號做「秦散赤」根本就是咧滾爽(sng2)笑！
乙：喂！喂！喂！我是迄个「體格散(瘦)徦有皮無肉，罵人上屆赤」的「秦散赤」，毋是厝內真散赤！
甲：按呢嘛較差不多！
乙：是講，我較早毋是聽講汝是一個「食愛山珍海味，穿愛綾羅香絲，出門有賓士佮司機」的大頭家，今嘛若會佇遮咧賣肉粽？
甲：唉！煙火好看無偌久，「人若咧衰，種瓠仔就會生菜瓜」！
乙：無要緊啦！汝嘛講來予阮參考看mai7咧！
甲：(唱)「話若卜講透枝，目屎就撥勿會 離……」，這講起來是話頭長，如此如此，這般這般………。
乙：人講「若卜出頭天，嘛愛拄著好時機」，今嘛大環境無景氣，失敗勿會 當總怪汝。
甲：毋佫，gang7做呰款小生理，佟時則有扳身的日子？
乙：ㄟ！人講：「好額散，免怨嘆」、「三百六十行，行行攏會當出狀元」！
甲：毋佫gang靠賣肉粽敢會好額？
乙：汝看我按呢(手比規身軀的手指帔鍊)！敢有偌歹過？
甲：汝的意思是講………
乙：我嘛咧賣肉粽啊！
甲：「平平做肉粽的買賣，穿紮若會差則濟」(手比二个人的衫褲)！
乙：人講：「一枝草，一點露」，天無絕人之路，若是「甘願做牛，免驚無犁通拖」！
甲：無汝嘛共我教一寡成功的撇步！
乙：（唱—翁立友堅持）「成功的背後，毋知有偌濟苦楚，阮選擇的路，一定堅持到成功」。
甲：汝是講：「毋管是做佗一途，攏有in1的艱苦，只有堅持到底，有『艱苦頭』，則會當享受『快活尾」！」
乙：著著著！人講：「一粒米，百粒汗」，成功就愛用認真扑拚來交換，「年頭若無飼雞栽，年尾若有通做月內」。
甲：汝是講：「『有落種則會有收成』」？
乙：無毋著！咱食頭路呣免比憑身分的高低，嘛呣免計較薪水偌濟，只要咱堅持到底，「戲棚跤踦久，就一定是咱的」！
甲：按呢我知影啊啦！
甲&乙：（唱—翁立友堅持）「毋驚失敗慢慢向前行，運命不是天註定，只要用心來扑拚，一定唱出阮的名」。望咱逐个做夥來扑拚，共「食苦當做食補」，為咱的前途，行出一條光明的路。
甲：祝好額
乙：秦散赤
甲&乙：落台行禮！
(轉去主目錄)
沒有留言:
張貼留言