2010
08111213犧牲--記蓮蕉花
259心路篇
蓮蕉花的生命期其實真短，等伊完成傳宗接代的任務了後就會使講到生命的終點。
阮兜的邊仔有幾若欉蓮蕉花，頭起先，無去注意，總是in不管時就有固定五六欉生佇遐。叫是in的生命足長的，會使相連紲(sua3)活幾若年。
我毋知影遐當時種蓮蕉花，反正就佇遐有幾號(lo7)冬矣。
這兩三冬，阮查某囝毋知按怎就想著欲收集蓮蕉花的子(tsi2)。嘛因為按呢，我才開始注意著，蓮蕉花的壽命無長。
原來，等伊的花期開甲完矣，無花通仔閣開的時，最後的種子熟矣了後，伊就開始沓沓仔結束家己的生命。對上頂懸開始死亡。一直到規欉死去為止。這个過程其實無幾工(OS:另工愛來注意到底維持幾工的生命)。
新欉的生長速度嘛足緊的，一兩禮拜無去注意著，就已經頂替原來的所在。莫怪我攏會感覺in的生命足長的，原來是新欉換舊欉。我想舊欉會遐緊就結束著家己的生命，是為著欲予伊的親情五十有閣較濟的生存空間。
最近這一兩個月，開始發現蓮蕉花的葉仔一空一空。舊年猶無這款現象。這是今年才有的。
我毋知影到底是啥物來食去的。總是蓮蕉花犧牲伊家己的葉仔，猶原維持著伊自然界應該有的使命—繼續傳宗接代。
伊犧牲伊的葉仔，毋知飼活偌濟自然界的生命。只要遮的生命會當生存，代表咱人的生命嘛猶會使生存落去。咱的環境這三十冬來已經破害甲咱人無好生存的地步矣。自然界的生命是咱人類的生命指標。in無法度生存的所在，咱人嘛無法度閣生存偌久。敢毋是？
回應
毋免說謝，是刊物愛多謝恁的創作，予刊物的內容較豐沛，予較濟人有機會通讀著好的文章。
另外，關係另外投稿的係項，是按呢，BONG 報的編輯政策，有要求 BONG 報干焦刊別个台文刊物猶未刊過的作品，所以，我並無意思講你袂使另外投稿，是獨獨就這篇文章，希望佇咧 BONG 報刊出進前，先莫予佇別个刊物出現，按呢，才袂違反編輯政策 ^^
一來二去，遮个文章，攏是你用心計較寫出來的，著作權是你的，你在水會當決定欲按怎使用。
以上說明，希望你毋通誤會，閣一擺感謝！希望你繼續寫作，予我會當一直來遮抾寶。