2010
08012255哺骨頭
「哇！嫂--仔，你燖(tim7)的雞實在有夠好食閣有夠爛的，連骨頭就會當哺落去！」較早聽著人按呢講，攏共伊當做滾耍笑的，是咧呵咾人煮了好食。毋過，一直到有一工，代誌就毋是滾耍笑的爾爾。
彼是拄入去讀研究所的代誌，有一工，我和室友佮樓友三个人佇宿舍餐廳食暗頓。拄好，三个人攏有叫雞排。毋知按怎開講的，樓友就去講著：「這雞排足好食的，連骨頭就會當哺落去。」
室友見機會來矣，就佮樓友相輸講：「咱兩个人來相輸，就真正共骨頭哺落去！」
「唉呀！滾耍笑，就毋是狗講，連骨頭就欲哺落去！」我心內按呢咧想。毋過，看室友足有信心的範勢。我的心嘛起懷疑：「這……骨頭……敢真正哺會落去？看你信心十足，無試看覓咧thah會知！」
我就開始哺看覓咧，沓沓仔哺，加哺幾喙仔，湯閣啉一喙仔。「咦？真正會哺得，照這款形，閣哺幾下仔就會使呑落矣。」
「會，真正會當哺落去！」我隨共樓友講：「袂當佮伊相輸，相輸你會輸！」
就按呢，我和樓友兩个看室友一喙一喙共規塊雞排連骨頭都攏哺落去，食甲清氣噹噹。樓友嘛因為按呢相輸去輸去，願賭服輸，自按呢請室友彼(hit)頓暗頓。
自彼工開始，便若叫雞排，想講骨頭有鈣質，用按呢的方法來補充鈣質嘛袂bai2，所以，我就逐擺攏共骨頭做伙哺哺予伊落去。了後，只要燖了有夠爛的，連雞腿的骨頭嘛攏哺哺予伊落去。
若草蝦咧？伊的外殼無比雞骨較ting7，當然嘛共伊規隻攏食甲無賰！
自按呢，我嘛毋知我連骨頭都哺落去哺有幾冬，一直到有一冬我去看牙科，醫生講我的喙齒去磨萎(ui)去矣。我心內知影，一定是去哺骨頭哺甲萎去的。看完醫生了後，我就無閣再連骨頭就共伊哺落去矣！
「彼隻烏骨雞燖甲有夠爛，連骨頭都哺會落去！」哦！我這馬相信是真的，而且你若敢佮我相輸，嘿嘿！我一定會佮你相輸！保證我一定會贏！
當然，看過這篇文章的人，千萬就毋通佮人相輸，因為你一定的輸的，對方敢佮你相輸就一定有法度共規隻雞仔連骨頭規隻攏食甲無賰！只要伊有湯通仔配就有夠矣！
汝著愛甲哇，哇是呆學生，汝ㄟ氣身勞命
你看我這兩工做的知音捌字, 內底的物件, 會曉講就會曉學拼字, 會曉拼音就會曉其他的字.
舉第一的君字韻第一調來講:
你看著這排
tshun (君一出) 伸 (白) 村 春 賰 (替) 鶉 (文) tshun
其中有一字春天的春, 我想你一定會曉講春的音, 所以你看著的拼音tshun就是讀做春.
佇兩个拼音中央的字攏是讀做春. 所以欲寫伸手的伸, 村長的村, 賰錢的賰就攏有矣, 按呢就知影欲寫佗一字矣. 甚至咱罕得用著的鶉字就知影伊佇台語嘛讀春.
用這款方法, 就會當家己學著足濟其他的台語寫法矣.