2010
07261956破衫
昔時賢文第31句有講：「貧居鬧市無人問。」第65句有「貧來親也疏。」第115句有「貧窮自在。」第201句有「貧人思眼前。」第286句「君子安貧，達人知命。」是我日常生活的寫照。
今仔日，閣穿著這領衫，予我想著差不多兩個月前一位老朋友來揣我。講老朋友毋是伊真老，伊猶減我四歲咧。佮伊真正是老朋友，自伊國小的時陣阮著算交情袂bai2矣。
自1994年轉來南部蹛佇市區，一年365工，會當講我遮360工攏無親情朋友會來遮相揣。日子嘛過甲真清閒，省去了足濟人情世事。避免了人佮人之間的是是非非。真真正正過著「貧居鬧市無人問」的生活。
兩三個月前，又閣到報稅的季節，老朋友就來阮兜拜訪。揣我？哈哈！毋是！是欲來揣阮某鬥相共共伊報稅的。
普通時仔，我的物質生活要求無濟，食有通仔食就好矣，穿有通仔穿就好矣，蹛有通仔睏的所在就好矣，甚至椅條(liau5)嘛會使睏，車咧，舊車有通仔代步就好矣，管待伊是銅管仔車。過著和顏回「一簞食，一瓢飲」仝款的生活嘛無要緊。
彼工，阮朋友來揣，我拄好穿著今仔日穿的這領衫，伊看著我的衫頷仔領已經破甲差不多矣。伊講：「你實在是有夠儉的！」我共應講：「佇厝凊彩穿就好矣。」我猶無共伊講這領衫是我大學一年的時陣就開始穿的衫。算算咧這領衫已經穿有二十外冬矣，干焦頷仔領有破爾爾，賰的攏猶好好。其實，我頷仔領有破的衫毋是干焦這領爾爾。
若想起阮爸爸in彼輩的人捌講過的話，我這馬佮in比猶算足幸福的。In定定講in細漢的時，內褲是用麵粉袋仔去做的，甚至補了閣再補，穿的衫袂輸乞食衫咧，四界攏嘛是用細塊布仔來補佇破空的所在。按呢比起來，我實在是足幸福的。無去偷、無去搶、無去共人騙，清清白白過日子，破衫就破衫，有啥物好見笑的。
講著「貧來親也疏。」自從阮囝出世到今攏欲升國中的二年矣。阮老爸攏毋捌主動來遮看過伊。這予我想著阮阿公，佇我的印象內底，阮阿公嘛是攏毋捌來看過我這个大孫，攏是阮老爸tshua7阮轉去內山予阿公看。所以到我大學一年的時，阮阿公過身，我的腦海底會記得阿公的代誌無幾項。
有一句話講：「人窮志短。」阮的一切生活真正是「貧人思眼前。」對阮來講，真正無偌大的願望，只求平安過日，三頓罔度就好矣。就像孔子公講的「富貴於我如浮雲。」無想欲求名，嘛無想欲求利，像老子講的「無為而為。」逐工攏是過著「貧窮自在」的生活。無需要像人彼官場閣愛「看人目色」過生活。
今仔日，這領破衫，抑著閣講，當然嘛會繼續陪我過「安貧樂道」的生活。
lau7 su1:
ti7 tsit4 phinn1 bun5 khuann3 tioh8 lau7 su1 e5 tsin1 sing3 tsing5,
khuann3 tioh8 li2 kan2 -phoh e5 sing1 uah8 thiat hak8,u7 kam2 tong7 tioh8!
ui5 hak8 jit8 tsing1,ui5 to7 jit8 sun2,sun2 tsi3 iu7 sun3,i2 ti3 i5 bu5,
lau7 su1 si7 siu1 hing5 tsia2 ,ti7 tshu3 li3 tshut4 ke1
自由自在樂活 無所求 乃真逍遙也
感謝分享