2010
07241641耍九連環
五六冬前，阮兜有一項tshit迌物仔叫做九連環。今仔日想著網路誠方便，就來揣看有無。真正揣有，順紲來講耍九連環的一寡想法。
阮囝自細漢的時，就愛耍有挑戰性的tshit迌物仔，差不多市面看會著的攏耍甲差不多矣。耍到國小六年畢業，無仝造型的魔術柴角仔嘛有六七粒矣。
佇伊國小的二三年的時陣，阮就買一个九連環轉來。阮囝叫我教伊耍。我就照說明書的解法，欲共九連環敨(thau2)落來(就像第一个影片仝款)。說明書干焦解到第五環落來。講賰的六、七、八、九的原理攏仝款。結果咧，我嘛才有法度做到第五環敨落來爾爾。閣來就袂曉矣。只好就照說明書的方法教阮囝教到第五環敨落來。閣來就只好交予伊去家己耍矣。
嘛毋知伊耍偌久，雄雄共我問：「閣來咧？」
我一下看，啥物？伊已經敨到第六環落來矣。這……這……這做老爸的我thah有法度教伊！毋過，想想咧，既然規則仝款，我就只好擲一句話予伊：「看你第六環按怎用落來的，原理攏仝款，家己想，繼續按呢耍就會當敨落來矣。」
時間毋知過偌久，伊就足歡喜共我叫，講伊敨落來矣。阿娘喂！我無法度的代誌伊竟然有法度做！
這馬，九連環敨落來矣，紲落去就是共九連環恢復原狀。我就閣照說明書的方法去鬥(就像第二个影片仝款)，嘛是有法度教阮囝到第五環起去爾，閣來就袂曉矣。想袂到阮囝變竅有夠緊的，伊就知影按怎共九連環恢復原狀。真正耍一睏頭仔，伊就共九連環用好矣。
紲落來幾工，我這个做老爸的，干焦會當佇邊仔用佩服(pue7-hok8)的眼神(咱看第一个影片的時想看覓彼若是咱的囡仔你的想法是按怎就知影矣)看阮囝佇遐一遍過一遍耍九連環。
到一禮拜的時陣，我決心欲共九連環敨落來，就共伊學，伊教我幾偌遍，誠無簡單，我才學起來。
耍了熟手了後，才發現伊的原理足簡單的，敨甲攏機械化去矣。
伊的原理就是共(1)佇面頂的第二个敨落來抑是掛轉去(2)共掛佇面頂的前二个仝齊敨落來抑是掛起去(3)逐个攏會曉的:共第一个敨落來抑是掛轉去。用這个的原理輪流使用就好矣。重點就是愛想辦法共想欲敨落來抑是掛起去的環變做第二个環，按呢才會當做咱欲達成敨落來抑是掛起去的目的。
會曉耍了後就無啥物矣。拄開始好耍爾爾，就像影片仝款，敨一遍就愛五分鐘，欲共伊恢復的時間會開較濟。敨落來佮恢復做一遍我差不多愛開十八分鐘的時間。實在是足了時間的，所以，變成熟手了後就無想欲耍這款物件矣。
影片一：敨九連環(會使跳咧看，無需要詳細看，知影咧創啥就好矣)
影片二：恢復九連環說明(想欲學才詳細看，嘛是講到第五環爾。)
2010-07-25 18:04:24阿妹 email給阿妹 前往阿妹的日誌
