2010
08041357出路--記刺毛蟲
一群拄孵(pu7)出來的刺(蛓)毛蟲，明明就無物件通仔好食矣，是欲按怎生存落去咧？
彼是舊年的代誌。
阮兜有一欉盆栽，內底種一欉樹葡萄。每遍若有落雨天，雨落煞無幾工，攏會發現伊會發(puh)袂少的新穎(inn2)出來。
有一工，發現葉仔有缺(khih)痕，心內想講毋是草蜢(meh)仔就是佗一款會食葉仔的龜仔來食的。無看著凶首嘛毋知影是啥物來食去的。
過幾若工，我去看著兩隻刺毛蟲佇咧食葉仔，原來是in食的。
講著刺毛蟲，我天毋驚，地毋驚，就是上驚刺毛蟲，看著in我就會規身軀起雞母皮。啥叫我做囡仔的時陣去予刺毛蟲辣(luah8)甲驚著，尤其是菝仔欉頂一款規身軀青piang3-piang3的刺毛蟲，無啥會記得伊的名是叫青辣仔抑是辣kat仔。
若是較早，看著刺毛蟲食家己種的物件，我可能會想辦法攑(giah8)箠仔共伊用用予死。
毋過，這幾冬來，我就袂想欲共對咱無啥大害的刺毛蟲用予in死。理由是無想欲去破害自然界的生態。
看著彼兩隻刺毛蟲的時，其實攏已經大甲差不多欲結繭(kian2)仔矣。
了後，其中一隻就失踪去矣，毋知是去予鳥仔食去抑是別款的天敵食去。就賰一隻佇咧爾爾。
講起來，天公伯--仔嘛足gau5安排的。樹葡萄的新穎拄拄仔好食完矣。想講刺毛蟲無通仔食矣，毋知會枵(iau)死未？結果，彼隻刺毛蟲去揣一葉安穩的所在開始結繭仔。
我逐工攏去巡，想欲看伊變做啥物款的蛾(iah8)仔。
有一工的早仔，看無著蛾仔，去看著繭仔已經破去矣，邊仔留差不多成百粒的卵(奇怪，附近應該無蛾仔才著，遮的卵是按怎成形的？)。
又閣過幾若工，看著卵無啥仝款，斟酌看，才發現已經攏變做一隻一隻的刺毛蟲，實在有夠細隻的。一想著in是刺毛蟲，我雞母皮就又閣夯(gia5)起來。
看著in，我咧(teh)想，這陣(tin7)成百隻的刺毛蟲，遮爾仔細隻，樹葡萄的新穎予in的媽媽食甲攏無賰，嘛無閣發新穎通仔予in食，in是欲按怎活落去咧(leh)？
閣來的兩點鐘，我去看著奇蹟。
成百隻的刺毛蟲開始振動，看起來開始欲揣食的仝款。看著in吐蟲絲黏佇葉仔頂，順著巷仔口起的風勢，in的絲抽長，身軀綴風飛起，換落佇隔壁欉的蓮蕉花葉頂面，想講in換欲過蓮蕉花遐討食，因為蓮蕉花的葉仔看起來加較幼。佇後面的刺毛蟲就順著進前的蟲所吐的絲，一隻一隻爬過蓮蕉花。
看in佇蓮蕉花頂一直巡視，發現佇遐無通仔討食。拄好蓮蕉花嘛是上尾欉的盆栽。我咧想，閣來咧？in欲按怎做？我已經想無步矣。
這時陣，巷仔裡(--li2)的風開始起起來，無看著in吐絲，in共in的跤放開，順著風勢，看起來就若像氣球仝款，一隻一隻就按呢飛起來，攏總消失佇我的目睭前。
毋知影in順著風勢，到底會飛去外遠的所在去，我完全無法度去臆，按方向過，毋知會飛去五十外公里遠的阿里山去無？
33回應所想著的歌:蝴蝶夢飛.
文章讀完....我想著一首歌....[蝴蝶夢飛]
音樂磁場唱過....
...........................
飛啊飛
你放心啊飛
阮袂擱抓你來買賣
摧殘你無辜的美麗
飛啊飛
你放心啊飛
飛惦咱家己的山溪
飛惦咱的自由的土地
