2011
05032110答喙鼓：滿分的爸母
答喙鼓：滿分的爸母
a:天大地大我上大
b:我聽你佇咧唱歌
a:讚！
b:抑無, 阿婕--仔，你是咧講啥物讚？
a:阿忻--仔，講甲予你捌，喙鬚好拍結。這馬咱人徛佇遮，裁判觀眾攏佇遐。
b:著愛好禮相借問，情份才會長長長。
a:阿婕--仔……
b:阿忻--仔……
a&b:上台行禮。
b:緊咧啦，你莫閣遲宕矣啦。
a:烏白講，我無去予箸撞著。
b:毋是啦，你拄才是講啥讚。
a:我是講：我的爸母上蓋讚。
b:真正是：家己褒較袂臭臊。好，咱來拚啥較好。我的爸母上蓋好。毋是我咧臭彈烏白褒。
a:講著這：你絕對是無地比，你若輸我無稀奇。
b:按呢咱就來比試，我是絕對袂輸你。
a:你是講：你有滿分的爸母？
b:規欉好好--無錯。
a：逐工為你來做牛？
b:你按呢講有較輸。爸母疼咱是天安排，毋通共in當奴才。
a:按呢你輸矣。你看我，逐工透早欲讀冊，頭鬃阿母共我梳；冊包阿母共我揹(phainn7)，阿爸駛車共我載；爸母疼我共我愛，這件代誌通人知。抑你咧？
b:按呢我無輸。你看我，逐工透早來讀冊，頭鬃我著家己梳；冊包嘛是家己揹，家己行路無人載；爸母確實共我愛，這款道理你毋知。
a:聽你佇咧烏白講，按呢實在講袂通。
b:這款代誌你毋捌，大漢食苦你就知。
a:你看我，逐遍考試第一名，爸母時時疼命命；講我大漢好名聲，出門坐車攏免行。
b:我看你，考試雖然第一名，爸母這馬疼命命；毋捌禮數歹名聲，出門半步無地行。
a:唬！
b:虎佇內山。
a:你是毋捌看過赤查某。
b:我是毋捌看過恁阿姑。
a:好矣啦，莫閣練痟話矣啦。你看，我頭鬃、冊包、去學校，逐項代誌，阮爸母攏總發落甲好勢好勢，我干焦負責讀冊考試考滿分，提第一名的就好矣，賰的攏毋免管。按呢毋才是滿分的父母。
b:看我，家己梳頭是教我愛會曉生活，家己照顧家己，揹冊包是叫我愛知影擔責任，家己責任家己擔，行路去學校是教我講人生的路家己行。
a:若是拄著透風落雨欲按怎？
b:按呢教我愛勇敢毋驚困難，拄著問題愛去面對問題，想辦法解決問題，培養我拄著問題會變竅，父母按呢教我，予我學會曉顧家己、擔責任等等足濟代誌。按呢毋才是滿分的父母。你咧？你會曉啥？
a:我哦？我就出一枝喙。
b:我問你：你佇學校布鞋鞋帶仔冗去欲按怎？
a:簡單。手機仔敲轉去，叫媽媽來共我縛。
b:藝文課愛用著針線鉸刀，你按怎做？
a:簡單。收收起來提轉來予媽媽替我做。
b:我咧……你真正有影出一枝喙，你想看覓咧，結果你啥物攏袂曉！我看，你的爸母是無分的爸母。
a:你講了有道理。
a&b：父母疼囝著教囝，囝有才情恁好命；文武雙全好名聲，佮人比並才會贏。
b:阿忻--仔。
a:阿婕--仔。
a&b：落台行禮。
(轉去主目錄)
真有意思兮作品，點出現代序大郎兮問題！
感謝你兮提醒～