2011
05032104愛拚才會贏
愛拚則會贏
甲：人講：「一枝草，一點露」，天無絕人的生路。
乙：「二个人，若仝心，烏塗嘛會變黃金」。
甲：三更火，五更雞，扑拚就有出頭的機會。
乙：七腳戲，報萬兵，捷捷上台就有信心。
甲：雖然，今仔日逐个佇茲是「仙拚仙，拚死猴齊天」。
乙：呣佫，阮「頷頸生瘤—拄著啊」，嘛著愛「十二月屎桶—盡拚」。
甲：看逐个頭拄仔上台的表現，攏是「鎮守古廟—老神在在」。
乙：逐个人的表現真正是「烏矸仔儲（te2）豆油--無地看」！
甲：呣佫今仔日「頭剃落去啊，無洗嘛勿會 使」。
乙：阮絕對嘛是「閻羅王開酒店—呣驚死的做汝來」。
甲：著啦！著啦！人講：「人生親像大舞臺，笑科苦齣攏公開」。
乙：像今嘛有人拄著失敗，就講是台灣的景氣禾黑 ，呣佫嘛有人趁錢趁徦笑咳咳，差別佇佗咱嘛愛瞭解。
甲：有人規工gang7想講會當得著「樂透彩」，一擺就會當大發財。
乙：he1是比予雷公摃著較困難！(戲弄恥笑的口氣)
甲：無就是向望「股票」會起徦萬點來，工課無做嘛會使！
乙：我看抑是「睏罔睏，勿會 眠夢」！(戲弄恥笑的口氣)
甲：出門穿紮gang7卜比名牌，量傷討債一直開！
乙：誒！就是按呢呣則會有一堆人咧bonn7卡債！(戲弄恥笑的口氣)
甲：食飯就愛山珍海味則會使，粗菜薄酒inn1無愛。
乙：其實食落腹肚底連鞭就放出來，若就佫浪費遐的錢財！(戲弄恥笑的口氣)
甲：人講：「刀無雙頭利，人無雙條財」，成功勿會 ui5天頂跋落來，就愛認真扑拚則會使。
乙：「年頭若無飼雞栽，年尾若有通做月內」。
甲：食頭路gang7想卜薪水好，工課攏予別人做，頭家勿會 使傷囉嗦，歇睏會當準時去逸陶。
乙：若是會當「食好做輕可」，頭家若就佫倩薪勞。(揶揄的口氣)
甲：逐工「食若牛，做若龜」，「做無一湯匙，食卜規畚箕」，一年換卜二十四个頭家。
乙：卜佫倩呰種薪勞，頭家就規氣家己做，呣免佇遐「倩鬼挈藥單」。(揶揄的口氣)
甲：所以，人講：「樹頭若是踦予在，就呣驚樹尾做風颱」，咱工課若無認真來安排，事業發展是會有阻礙。
乙：無呣著！「若是樹頭踦無在，呣免風颱嘛會家己敗」。
甲：所以講：學習勿會 使傷凊彩，腳踏實地則應該，若是一步一步來，工夫總有一工會出師(司)。
乙：司傅，拜託汝來我公司共我搭三工。(頭家挈錢佮聘書請伊去)
甲：人講：狗蟻爬樹呣驚高，有心學習就呣驚困難，工夫若學會完全，行行攏會出狀元。
乙：著！著！著！咱若是會當共「食苦當做食補」，呣驚艱苦，一定會當行出一條光明的路。
甲：上重要的是做人就愛腳踏實地，人講：「飽穗的稻仔攏嘛頭犁犁」。
乙：咱呣通親像「膨風水雞」，猶未學行就卜先學飛。
甲：就愛一步一跤印，千萬呣通「食無三把蕹菜，就想卜上仙天」。
乙：無，人會笑咱是「七月半鴨仔，呣知影死活」。
甲：「規叢好好—無錯」！人講「做牛就拖，做人就磨」，只有「少年就來扑拚，食老則有好名聲」。
乙：若是做代誌會當堅持到底，「有好頭嘛愛有好尾」，把握每一擺的機會，「戲棚骹踦久就是咱的」。
甲：今仔阮佇逐个面頭前答喙鼓，勿會 輸是佇「關公面頭前弄大刀」。
乙：望恁無棄嫌，加減來參考，人生的路途會當有好結果。
甲：只要咱跤踏實地來扑拚，就會當改變咱未來的運命。
甲&乙：所以講：運命是(唱)「三分天註定，七分靠扑拚，愛拚則會贏」。
(轉去主目錄)
沒有留言:
張貼留言