2011
05300608嘉義好彳亍
嘉義好彳亍
江：大家好，我是江ㄟ，佇遮甲逐家請安問好。
孫：「公ㄟ」，免講嘛知仔你是「公ㄟ」。你是驚台下ㄟ觀眾朋友目睭花花 ，瓠仔看作菜瓜，甲你認作「母ㄟ」！
江：你真正是毋識字，擱沒水準。我姓「江」，長「江」ㄟ「江」，毋是「公」母ㄟ「公」。
孫：原來如此，失禮失禮。好，換我來甲觀眾朋友問好。大家好，我是孫ㄟ。
江：哈！哈！哈！乖孫ㄟ，阿公遰你來箝仔店買甘仔糖。
孫：阿公？阿公？我沒叫，你ㄚ敢應甲赫爾阿好勢，你拄才說我「毋識字，擱沒水準。」我看你是龜笑鱉無尾，鱉笑龜粗皮。我姓「孫」，「孫」悟空ㄟ「孫」，毋是「孫」仔ㄟ「孫」。
江：是安呢啊！歹勢歹勢，是我聽無好勢。我說孫ㄟ，你最近是安怎？一個面未輸從屎壆仔撈起來咧！臭摸摸，你是發生什麼大代誌？
孫：話若卜講透枝，目屎就撇未離，煞毋知仔阮阿母說頂禮拜ㄟ月考，我若是考第一名，伊就卜遰我去香港彳亍。
江：嗯！考第一名對你來說是「老鼠入牛角，穩篤篤！」哪有什麼好煩惱ㄟ。
孫：不說你不知，彼天佇考試ㄟ時陣，未輸有鬼佇拖咧！我竟然寫甲睏去！
江：遮僥悻喔！恁阿母一定足生氣。
孫：遐阿擱講，去香港是火燒罟寮無望啊，連北港嘛免痟想卜去。
江：唉喲！一遍ㄟ考試失利而已，你嘛甭赫爾啊失志。擱再講，咱嘉義就足好彳亍，毋通近廟欺神不知寶。
孫：嘉義好彳亍？有影無？我嘛想卜來去嬉騷落。
江：好！咱就同齊行。
合：行，行，無行袂出名！
江：八掌溪邊彌陀寺，佛門清幽無底比，師父慈悲心歡喜，祥和世界佇遮呢。
孫：有燒香有保庇，後遍一定也當考第一。
江：煞落來，蘭潭泛月真正媠，五彩噴水定時開，天光雲影共徘徊，真正是浪漫無底比。
孫：毋哪情侶約會也當去，闔家散步嘛真趣味。
江：蘭潭後山是樂園，民眾爬山唱山歌，膨鼠猴山仔定定有，宛如仙境愛珍惜。
孫：看人爬山真輕鬆，若你一定爬甲會咕雞袂歕火。
江：嘉義公園有大龜，記載嘉義ㄟ歷史，你來我來逐家來，毋通古蹟攏毋知。
孫：你實在是有厲害，人說大箍不離呆，但是你待逐項攏會知？
江：民權路底植物園，樹仔大欉空氣好，毋管練功抑散步，身體健康免煩惱。
孫：這遍出門有價值，呼吸清新ㄟ空氣，心頭輕鬆煩惱放乎離，管伊考了是第幾？
江：北門車頭檜木做，古色古香氣氛好，阿里山ㄟ鐵路有名聲，卜看火車碰壁，愛佇遮坐車。
孫：今日時間有卡短，卜看日出雲海著另遍。
江：文化中心人文水準高，演奏搬戲逐項有，展覽借冊免驚無，常去氣質自然好。
孫：停！停！停！你安呢沿路介紹，好聽擱攏無跳針，講甲喙角全波，嘛稍歇喘咧！我腹肚已經枵甲大腸告小腸！
江：看你瘦甲存一支骨，我遰你來文化路踅夜市，沙鍋魚頭粿仔湯，食飽食巧隨在你，想卜食甜食鹹，食乎臭跤鼻黏，我嘛無反對。
孫：笨貓爬樹，不成猴喔！咱平平是八歲，你哪會識遮濟？
江：我拄才遰你行ㄟ是嘉義八十四年票選出來ㄟ「嘉義八景」。咱平時毋哪愛甲冊讀好而已，嘛愛知地方ㄟ人文和地理。
孫：是！是！是！你講了無毋著。
合：住佇嘉義有福氣，毋免出國開大錢，就有風景赫爾媠，真正是幸福無底比。歡迎逐家相招逗相報，嘉義實在有夠好彳亍啊！好~彳~亍！
(轉去主目錄)
沒有留言:
張貼留言