2011
05300603袂閣叫我第一名
答喙鼓---袂閣叫我第一名
甲：哈-------！（大聲哈氣）
乙：唬！驚死人！你昨暝是去做賊哦，透早就哈氣哈盍這-大聲。
甲：什物做賊，攏嘛阮阿母，講我歸工那扣掉食飯佮peh4（爬）枕頭山的時間，偆的就是和電腦相攬、和電視相相（siong3）。講我一粒鰇魚肚是越來越大，那親像有身七個月仝款。叫我著要趕緊去運動，毋才會悿（tham2）盍安呢。
乙：原來如貓，不二過你阿母講的嘛沒毋對。我看你最近真正有較肨（hang3）奶，有影是愛注意一下啊。
甲：唉呦！人講：「頭大面四方，肚大是居財王。」小寡仔大箍那有什物要緊，那著遮呢大驚小怪。
乙：你真正是「大紅花毋知bai2（醜），圓仔花bai2（醜）毋知」什物居財王，我看是鯧（chng3）仔王。你彼粒腹肚樣欲和阿扁會比得囉！
甲：啊，有那麼嚴重嘛！（學阿扁的口氣）
乙：當然嘛嚴重，大箍毋爾歹看，有時陣閣會影響著咱的健康，所以猶是注意咧較好。你甘毋知影最近報紙刊一項有關嘉義市得到全國第一名的代誌？
甲：全國第一名！
甲,乙：嘿！真敖！真敖！全國比賽。得冠軍，提金牌，光榮倒轉來。
乙：好啊！袂閣鬧啊。這個第一名是一點仔都沒光榮。
甲：那有人得第一名沒光榮吔？到底是得到什物第一名？
乙：啊著全國過頭大箍的學生囡仔嘉義市是排頭名的。
甲：此事當真！
乙：當然是真的。
甲：感謝天，感謝地，感謝老母佮老爸。一頓三碗沒嫌濟，四秀仔食完各配紅茶。食飽我就邊仔thenn1（躺），腹肚越來就越大個。
乙：你嘛好啊，家己興thui1閣牽拖恁阿爸阿母予你食相濟 。人講「囡仔食到畏，才有當落公婆喙」咱嘉義的囡仔實在有夠幸福耶，厝裡毋爾有阿爸阿母共咱疼，閣有阿公阿媽惜命命。隨個攏食佮肥軟啊肥軟，袂像「阿不倒」咧。
甲：人講「十個肥九個富」，咱遮e囡仔食佫即爾膨皮，咱的阿爸、阿母才會予人呵咾誠有才調。
乙：是哦！我看是「十個大箍九個呆」，逐家攏是「大箍好看頭」爾爾。運動埕那走二輾仔就面仔紅佫那關公，peh4（爬）二層仔樓梯就喘佫那得痚齁仝款，你想安呢甘有得咧呵咾。
甲：你真正是「一言驚醒夢中人」，共我的症頭節佫準、準、準。啊即嘛是要安怎處理卡好。
乙：就像你阿母講的，趕緊來去運動啊！
甲：唬！想到運動我就頭殼楞（gong5），一二三佮四五六，心臟連鞭就蹦蹦惝（thang2）！
乙：親像你這種三晡身體，沒好好訓練一下那會使。
甲：啊是要安怎訓練咧！
乙：佇學校老師毋是攏有教咱跳健康操。咱那會使逐工透早透晚攏跳一擺，四秀仔和飲料減食寡仔，我想效果應該袂bai2（醜）才對。
甲：有理哦！「罕得底時天會落紅雨」即嘛著佫撨落去。
甲，乙：聽講Lucy時常做運動，身體健康精神好。Lucy你是哪會這呢敖，身體健康精神好，規律運動不可少，沒事常做健身操，全身運動功效好。喂！同學，規禮拜的運動怎樣來安排，要聽我就報予你知come on everybody 同齊來，無就一三五，無就二四六，實在真厲害，逐家同齊來。（跳一小段健康操）
甲：有影哩！小寡仔運動一下，流淡薄仔汗，人規個攏輕鬆起來。
乙：安呢你就要逐工練，身體連鞭就勇佫那一尾活龍啊！
甲,乙：為著欲要身體好，四秀仔飲料毋當多，逐工認真做體操，身材變好人呵咾。身體那想欲會勇健，青菜果子毋當嫌，運動絕對是袂使減，逐家袂閣叫我第一名。
甲：對今仔日開始咱逐家著認真做運動，身體練予伊勇！
甲,乙：對！千萬袂閣予人叫咱第一名。
甲，乙：阮今仔日的表演就到遮，多謝逐家的欣賞。
（下台鞠躬）
(轉去主目錄)
肥不離呆
無呆就狀元才