2011
05300600笑談布袋戲
甲：（出場）哈！哈！哈！「順我者生，逆我者亡」我是轟
動武林、驚動萬教的第一痞人－kam3頭kam3面是也。
乙：（出場）「山中有直樹，世上無直人」我是無人不知、無
人不曉的地下英雄－忍者龜是也。
甲＆乙：今仔日佇遮卜和逐家笑談布袋戲。
甲：忍者龜，汝敢知影啥麼物件上會當代表咱台灣。
乙：這嘛（想想咧）？ 啊我知影是阿里山。呣是有人咧念
1、2、3，到台灣，台灣有個阿里山。一定是阿里山
甲：(搖頭)
乙：(想想咧)抑無亞洲第一懸的山—玉山
甲：(搖頭)
乙：啊我知啦！一定是阮阿嬤定定在看的歌仔戲。
甲：(搖頭)
乙：擱呣是(抓頭想想咧雄雄想著)這回十二月肉湯—穩當
(真得意講)是台北世界上懸的101大樓。
甲：(搖頭)
乙：擱呣是(真著急) kam3頭kam3面也， 抑無汝嘛緊講啦！
到底是啥麼則會當代表咱台灣？
甲：容稟啊！
乙：汝是在唱歌仔戲呃！緊講啦！
甲：(嘻哈唸法)啥麼會當代表台灣，網路面頂有來票選，
票選的物件真濟款，布袋戲的票數上界懸。
乙：抑無汝是在[保護三藏取經—著猴]哦！
甲：汝呣知哦？這是今也上流行的-嘻哈。
乙：汝也在逮人流行。
甲：坐轎的呣知扛轎的辛苦---到擔汝才知(怪老子的口氣)。著
啦！既然布袋戲是代表咱台灣，汝敢知影伊是按怎來？
乙：遮哦！我知， 聽我說來：（準備竹板講四句聯）傳說明朝兩
書生，奔波赴京為功名，夜宿廟內夢神靈，夢中神明來獻境。
夢醒廟中抽籤詩，詩文內面有指示，功名威赫在掌上，榮華
富貴在眼前。以為功名無問題，名落孫山故鄉回，只好學堂
來教冊，學生成就幾偌个。 一日看著傀儡戲，將伊換做掌
中變，名聲有響透鄉里，才知籤詩的含意。布袋戲又叫掌中
戲，道白聲情真趣味，生旦淨末丑真怪奇，故事攏講忠孝節
義。尪仔頭角色有講究，頭戴服裝有分明，道具做徦活靈靈，
好看全靠前後場。
甲：烏干仔貯豆油—無地看，擱知影赫爾濟，莫怪人攏叫汝
博士博，汝的學問實在有夠飽。
乙：(歹勢 歹勢)是汝呣甘嫌啦！講著布袋戲，汝敢知？較
早布袋戲曾經佇電視乎人禁演過。
甲：這我知我知，（準備竹板講四句聯）聽阮阿爹來講起，
佇伊國校迄當時，上愛看的布袋戲，雲州大儒俠就是。
故事內容真趣味，內底人物通人知，播出就在中晝時，
干但看電視就止飢。開店也無卜做生理，駛車也無卜去
趁錢，逐家攏痟布袋戲，政府只好來禁止。
乙：竟然有人為著看布袋戲，無食飯、無做生理、無卜去趁
錢。這真正是火燒厝—有趣味哦！
甲：呣是干但按呢爾爾，聽講今也布袋戲嘛外銷到外國，講
英語嘛會通哦！
乙：誠實哎！想不到布袋戲呣但會當趁阿啄仔的錢，擱會當趁這
个機會徦咱台灣傳統的文化，紹介予外國人知，真正是一兼
二顧摸蠣兼洗褲。
甲：嗯！規欉好好-無錯，布袋戲確實是「半天雲內的路燈—高
明」。忍者龜，講到遮，是呣是好煞古啊？
乙：等一下，等一下，講講即爾濟，尾後幾句話，
甲：逐家來勉勵，講煞就轉回。
甲＆乙：文化是根親像寶，千萬呣通來失落，外國物件做参
考，傳統藝術要珍惜。你咱雖然年紀小，傳承文化不落
人後，親成朋友來相招，台灣文化開枝散箬。
（行禮落台）
(轉去主目錄)
沒有留言:
張貼留言