2013
09151958愛著甲骨文
愛著甲骨文
Dyer Tung
一、講起因緣
說文：「丨，下上通也，引而上行讀若囟，引而下行讀若𨓆。」
拄看著呰段的時陣，呣知影，伊佇咧講啥麼，對「丨」我唯一知影是讀做kun2，另外攏是當做是畫表格時的一條直線。
佇猶未讀甲骨文的時陣，「丨」符號佇我卜教阮囝的識字卡上，因為卡片siunn1濟張，所以為著收卡片方便，就佇卡片的厚度頂懸畫上淡薄仔變形的台灣數字
。按爾，就會當佇規疊的卡片內底看出來伊本身的編號，卜重排順序嘛較方便。
所以佇茲「丨」所代表的意思是數字「十」的意思。
二、教然後知不足
上文字學的課，畢竟我所受過的教育訓練是西洋式的語言學理論，傳統中文學的聲韻學和文字學攏無正式接觸著。聲韻學本底就是我的專門，所以看起來會當真緊的吸收。
但是，對著文字學，偏偏講著甲骨文的時陣，因為奚是三千外冬的文字，根本就看呣捌頂面所寫的內容，極加是對照著人解譯出來的文字一字一字去看，對我來講，只不過是符號而已，根本就看無頂面所卜表達的意思。所以，為著卜了解伊所表達的意思，我的心裡就對我家己講：「後擺一定卜看捌伊的意思。」
三、對文字的好奇
當然，佇寫台語文的過程中，只要有參加過學術會議，便若講起文字的寫法，就一定會聽著無仝主張的人批評別人所寫的台語字呣著去。就親像我呰編文章的「的」字，寫台語文的人一定講呰字「的」是訓讀，佇台語根本就無「e5」的音，所以有人寫做「个」、「兮」、「丌」等等，至少有八種以上的寫法。
對台語文來講，我無想卜和人爭吵，我只是卜用文字來表達我的意思和理論，卜予人看捌我卜講的意思而已。台語用字佇戰國時代是事實，所以，用字一直無法度統一。
時間過了真緊，奚已經是十幾冬前的代誌矣。
呣佫，佇我的心肝底，我猶原好奇台語文的「本字」愛按怎寫，因為每一个堅持者攏chue7著伊所講的「本字」，嘛堅持伊的才是著的。呰款的「本字」的意念，經過十幾冬，猶原佇心裡繼續咧發酵。
佇呰个情形下，佇一年外前，因為有熟悉研究文字學的教授，伊的辦公室攏是文字學的冊，看著《說文解字》大徐本，就好奇借轉來看。
四、時空全然改變
想未到，《說文解字》拄還人而已，就因為
猶未接課進前，平淡的日子，拄好迷戀著扯鈴，嘛咧體會人生的變化無常，一切攏無法度預測的。迄當時，當咧練一招「平沙落雁」，向連續一百下挑戰，就是佇挑戰中咧體會人生的變化。
接課了後，無簡單課上完矣。但是，心裡深深感受著，家己猶有真濟呣捌的物件。所以，佇暑假的時陣，就去共迄个教授借《說文解字校正》和《甲骨文文字學》的冊轉來研究。
五、心靈的交會
掀開《甲骨文文字學》，開始展開神密的旅行，未輸去穿越時空仝款，倒轉去三千年前世界，予我看著咱的文字的演變路線，尤其是甲骨文的文字會當講攏是象形字去組合的。所以，對照隷定了的楷書，會當真緊熟悉未少的甲骨文。
當我看著甲骨文的數字表示方法，竟然有五個數字是和我畫的變形台灣數字仝款，尤其是「丨」。想未到，竟然嘛是數字「十」，予我感覺著不可思議的心靈相會的感覺，更加予我相信我會當去了解每一個甲骨文所卜表達的意思。
暑假，竟然是我食到迹爾大漢上界認真讀冊的時陣。較早，做學生的時陣，寒暑假從來就呣捌迹認真讀過冊。
六、意義何在
經過四個外月了後，有國中囡仔看著我咧看冊，好奇看我咧看啥麼物件。結果，看著我咧看甲骨文，怹仝齊問講我看這到底是有啥麼意義咧？
是啊，我呰四個外月來，甲骨文嘛已經差不多捌有四百外字矣。對現實的生活角度來看，我完全無法度去運用茲的物件來趁食。身在台灣，甲骨文會當講是完全無路用的物件。就親像我的專業是台語聲韻學，對語言文化的角度來看，我真驕傲我對家己母語的了解無輸別人，真歡喜我無做「母語的文盲」。但是，十幾冬來，佇人海浮沉，所學無用，予我後悔讀呰款學來無法致其用的台語聲韻學。根本就無度靠呰來飼某囝，深深感受著「無以為家」的痛苦。
佫向以後看，縱使我後擺有法度佇台灣是甲骨文第一勇的人嘛是無效，畢竟，佇大陸，猶有真濟研究甲骨文的學者，和遐的人比起來，我只不過是排未著等的無名小卒仔。
七、茫然
隨著日子的推捒，讀文字學方面的資料愈來愈濟，對文字的形體變化嘛愈來愈了解。我嘛了解著較早的真濟疑問，像親「成」字，佇《康熙字典》和《姓名學》之類的冊，攏共伊算做七劃。原來「成」內底是「丁」字，而且佇甲骨文時代和「丁」是仝音字。
以前寫著「我」字的時，攏想無 是按怎正爿的一半是「戈」？我今仔嘛了解「我」字原來是一个借形字，是一種的武器，像西遊記內底迄个豬八戒舁的九齒釘耙，只不過「我」佇甲骨文是劃三齒，有可能「我」原來就是三齒的釘耙。
我嘛知影「豕」字才是原來的「豬」字，嘛知影走相逐的「逐」字，是按怎是「辵」字加上「豕」。
就像
本字，我嘛仝款知影真濟台語的本字。呣佫，讀《說文解字》和甲骨文等相關的冊了後。
一般的人chue7台語的本字，有的對歌仔冊去chue7，因為奚是寫台語文的源頭。一般學者chue7的本字是《廣韻》的字。上界根源就是chue7《說文解字》的字來做台語的本字。猶有一寡人去chue7《論語》、〈楚辭〉等等，用的方法無仝，結果就無仝。
面對著「形變」，許慎免不了只會當「望文生義」，因為「形變」致使著「語感變」，所以免不了「以文生義」的解說文字的意思，所產生的解說就會「錯誤百出」。因此，《中國字例》內底就指出真濟《說文解字》呣著的所在。
佇看著裁玉裁的《說文解字注》了後，假使以《說文解字》和《說文解字注》的文字標準來看，咱目前所寫的字，會當講是「錯字連篇」。提「韻」字來講，原字是「均」，了後用「韵」，現在用「韻」。以「標準」來看，「均」是「正確」的，賰的兩字是「錯字」。佇我來看，這攏是因為「音變」和「意變」所產生的「形變」。
所以，佇看著資料愈濟，我愈感覺「茫然」。
八、行出家己的路
看過甲骨文、金文、籀文、篆文、隸書、楷書等文字的變化了後，漸漸了解「火星文」的出現有伊產生的內在原動力。佇我看來「火星文」只不過是另外一種的「甲骨文」而已。
因為漢字會當講二千年來就無改變著，但是語音的改變已經產生真大的分化。提「良」、「浪」、「娘」、「踉」、「郎」、「朗」來講，茲的字攏總有「良」字，相信佇漢朝許慎的時陣是仝音字的。但是對咱來講，等於每一字的音攏愛背落來。
本來是82%的「形聲」字，對咱來講，不再是純正的「形聲」字，華語「江」無讀「工」；「河」無讀「可」。按爾的情形凊采chue7就是。莫怪咱的「中文程度」嚴重的差。
咱受著「漢字是表意文字」的觀念嚴重影響，未記得「文字是記錄語言的符號」，伊的根據來源是「語音」，「心」讀作「心」是因為語音就是講「心」。「漢字的本質本來就是記音的文字」，只不過字形本身有「表意」的特徵而已。甲骨文的「心」畫一粒「心臟」的形，若是無經過解說，咱現代人嘛無法度知影奚代表「心」字，因為有人解讀成「貝」字，起因是甲骨文的「貝」和「心」字形類似。
所以，佇台語文字猶是戰國時代的時期，猶未統一的時，何不行出咱家己的路，大聲講出「咱台灣人愛寫出咱台灣人家己的文字。」咱是文字的主人，咱是用文字來記錄咱的思想、咱的語言。予文字恢復伊本來單純記錄語言的角色，重新塑造咱家己語感的形聲字。
九、為興趣而興趣
是啊，「媠bai2無底比，愛著較慘死。」「有人興燒酒，有人興豆腐。」只不過因為讀甲骨文會當解開長久以來對漢字寫法的疑問，嘛予我看著無仝款的思想角度，更加予我對文字更加有生命的感覺，看著「隻」字，不再是單純的「量詞」，我看著「一肢手掠一隻鳥仔」的情景。看著「逐」字不再是動作「追」而已。我看著「一个人咧逐一隻豬仔」的情景。想著三千外年前的世界有一个人掠著一隻鳥仔，逐著一隻豬仔的歡喜情景。
對我來講，文字是活的，只不過是咱受著文字的束縛，顛倒無法度自由運用伊。甲骨文干但有三千五百字左右，讀甲骨文予我對文字有重新的認識。
讀甲骨文，無為著任何的目的，純粹好奇卜知影文字的起源，純粹是因為無形中的心靈交會，致使著我去愛著伊。無啥麼理由，只是為興趣而讀，更加無去想伊對我會有啥麼款有價值的意義。
2007.01.02 pm 11:28
晚安! 過格來行踏.問好。
阮佇11月初就搬徙好矣，文章相片有一寡走精
去， 需要時間koh調整，操作猶咧認捌適應中，
哈~ 過來隨意窩若入迷宮咧 !
汝的部落格整理得誠讚!