2011
05142242疼惜地球靠逐家
疼惜地球靠逐家
甲＆乙:（摃鑼行出來）來、來、來，聽著阮的鑼仔聲，逐家金銀規大廳。
甲：我是豆油也的兄哥－豆油膏。
乙:我是雞卵兮的兄哥－雞卵糕。
甲＆乙:在座的朋友逐家好(行禮)。
甲:今仔日阮來(ㄔ各)貴寶地，呣是揹冊包，來讀冊。嘛呣
是卜來遮放風吹。
乙:嗯！抑無咱是來遮創啥貨？
甲:哦！咱有要緊話，來遮講詳細，疼惜地球靠逐家。
乙:看汝年紀即爾細，敢講大聲話。
甲:論我年紀細罔細，家私頭仔尖銳銳，天文地理捌誠濟，
真濟代誌我攏會。
乙:家己謳，較(勿會)臭火烙。緊講緊講(勿愛)囉唆。
甲:聽阮阿爸講：「立法院有三寶，大寶、二寶佮三寶。」
乙:哼！電視報紙有聽講。
甲:抑我看咱地球有三好。
乙:佗三好？
甲:青山綠水環境好、天清地靈空氣好、溪水透清水質好。
乙:啊！我看汝(勿會)輸老人咧！
甲:啥意思？
乙:坐咧就哈欷，見講講過去。汝講的迄種地球已經是過去
囉！地球今也的環境若是叫做有三好，我看狗屎聽好炖
米糕。
甲:有那麼嚴重嗎？(用陳水扁總統的氣口講) 抑無汝的看
法是？？？
乙:唉(嘆一口氣)！我看地球今也是無三好，有三多。
甲:啊！我知，我知，是鉸刀、菜刀、剃頭刀。
乙:我則牛刀、 關刀 、西瓜刀咧 ！七、八歲爻奶帕仔！
甲: 七、八歲是囡仔人，那會爻奶帕仔！
乙: 聽汝佇遐烏白嘮！我是講汝呣捌假知，(勿會)博假博
啦！人我講的三多是地球的垃圾多、廢氣多、污染多。
甲:是honnh4！ 聽阮老師講，地球因為咱(勿會)曉好好疼
惜，樹仔一直剉、廢氣一直倒，伊的面皮已經沓沓仔破，
所以今也雨若落，就水崩山；雨若無，就涸旱，後每叫
艱苦是免驚無。
乙: 汝講的真正是葫蘆墩白米－無錯(糙)。地球已經病徦半
小死，北極的冰山溶(勿會)離，面皮若佫繼續破落去，
逐家佫無來共伊醫，地球真正會空手掠魚－無望。呣佫
咱小小的年紀，是卜逮佗位來做起？
甲:千萬呣通看輕咱家己，就對身邊小事來做起。外食拒絕
衛生箸，自備碗箸無嫌遲，出外若是卜買物，袋仔就要
來傳畢；若是會當按呢生，樹仔減剉幾偌枝，土地加用
咧幾偌年。
乙:聽汝按呢講佫真有道理， 一人智，呣值兩人議，我嘛卜
來出一下仔主意。減少垃圾分類起，資源回收有意義，
回收物件佫再變，環境清氣佫趁錢。
甲:「輸人呣輸陣，輸陣痞看面。」今也換我講，汽車機車
放臭屁，濫落空氣真痞味，逐家若欲出門去，火車公車
真便利；空氣品質卜改進，青色的樹仔種濟濟，廢氣替
咱嗍離離，身體健康食百二。
乙:看汝呰支破雨傘－興展，我哪無展兩步七啊！想講我無
匟發粉－無法(無發)咧！ 今仔日我就做美容師－予汝
好看，聽詳細哦。廢水嘛要做處理，呣通河川流落去，
毒害魚蝦免幾滴，若無張持啉落去，呣但害人佫害家己。
甲:喂！喂！喂！今仔日來遮呣是卜來拚功夫，抑無汝是隱
痀兮跋落海－冤仇誠深的款，啥麼講卜予我好看。
乙:汝誤會啊啦！
甲:我則咧六會七會咧！
乙:痞勢啦！ 汝就知，我就臭頭包布－風神，話愈講愈绁拍，
骹擋手擋绁黨袂椆，佇遮共汝會失禮，汝(勿愛)受氣啦！
甲:（噗嗤笑出來）騙汝喂！我無受氣啦！啥人叫汝赫興展。
乙:汝汝汝 ……
甲:(勿愛)佫佇遐汝… 我…啊，人講:「開花滿天芳，結子
則驚人。」講講即爾濟，照講照做，呣通落人喙唇皮。咱
愛認真去做較有影。
乙:規欉好好－無錯，「一句定著，兩句臭sioh8。」(勿愛)
佫囉嗦緊來做。
甲:豆油膏
乙:雞卵糕
甲:向望裁判手紗舁較懸，予恁囝孫個個中狀元。
乙:辛苦的先生，幸福永遠逮身邊。
甲:巧巧的囝仔兄，考試攏考第一名。
乙:在座的大大細細，錢銀趁徦滿厝宅。
甲＆乙:疼惜地球靠逐家。多謝（行禮落台）。
(轉去主目錄)
沒有留言:
張貼留言