2011
05142244臺灣寶島好逸陶
臺灣寶島好逸陶
甲：各位觀眾朋友逐个午安逐个好！茲是環球電視台。
乙：歡迎逐个做夥來收看「世界之聲」。
甲：我是主持人「秦健康」！
乙：我是主持人「祝快樂」！
甲&乙：祝逐个健康佫快樂。
甲：阮今仔日卜紹介的所在，就是最近佇美國職業野球比賽，投球真精彩的New York Youngki 投手王建民的故鄉—台灣。
乙：臺灣佇地球的什物所在，汝呣就紹介予逐个聽看mai7！
甲：(廣告詞)「臺灣佇茲啦」(手指地球儀或地圖)！
乙：(足懷疑看輕的口氣)「若會無鼻屎大」！
甲：誒！汝呣通「目睭皮無漿泔」。呰幾十年來臺灣人用inn1搰力扑拚的精神佮態度，所創造的「臺灣奇蹟」是世界通人褒。
乙：真正是「黑矸仔儲豆油—沒地看」。
甲：呣是我佇茲「賣茶講茶芳，賣花講花紅」！臺灣是一个美麗的島嶼，自古就有FORMOSA的好名譽，伊的物產真豐富，百姓的生活是真富裕。
乙：聽人講「臺灣錢淹骹目」，今嘛是已經淹徦肚臍佫淹目眉。敢是inn1咧「蟾蜍展氣功—膨風」？
甲：誒！汝呣通看台灣『貓仔無點』。其實，臺灣賺錢機會滿滿是，若認真扑拚做代誌，用心把握好時機，人人攏會出頭天。
乙：汝的意思是講：佇台灣過生活，只要「少年肯扑拚，食老就會有好名聲」，若是「甘願做牛，免驚無犁通拖」。
甲：著！著！著！所以，台灣流行一條歌--（唱歌—愛拚則會贏曲調）「三分天註定，七分靠扑拚，愛拚則會贏」！
乙：聽起來台灣是真好趁食，連我聽了嘛想卜搬去蹛，啊台灣的建設到底是按怎，汝嘛加減講予逐个聽。
甲：（唱歌—桃花過渡曲調）台灣鐵支路暢全台，坐起來舒適佫自在，公路連貫南北佮東西，搬山過嶺(伊就)無阻礙哟。電話有線無線攏會使，教育網路基礎在，網路暢徦(伊就)全世界，二四小時(伊就)裁汝來啊(伊就)裁汝來。
乙：若按呢這交通是真正逮會著時代。啊食食方面呣知影利便否？
甲：我知影汝喙箍佫咧搐啊。
乙：汝勿愛 佇遐「牛椆內惡牛母」，共我講徦無一地仔好。
甲：台灣有四季分明的天氣，佫有種作的好地理，稻仔大粒佫飽穗，果子甘甜好氣味。
乙：有什麼果籽汝嘛紹介二項仔予阮鼻芳一下。
甲：面巾傳好便，呣通等下喙瀾滴徦規塗跤！
乙：我敢有赫「枵鬼」！
甲：（唱歌—滿山春色曲調）屏東珍珠蓮霧烏佫媠，台東釋迦大粒芳佫甜，關廟鳳梨甜蜜好滋味，花蓮西瓜正港沙佫綿。台灣果籽好食一大堆，卜買方便價數又便宜，若是卜買真正有著時，保證予汝大碗佫滿漧。
乙：另迮我若去，一定卜食予夠氣。啊聽講台灣的風景是「頂港有名聲，下港有出名」，汝呣就用淡薄仔時間紹介予逐个聽。
甲：（唱歌—留傘調）台灣阿里山上出名，火車是碰壁倒退行；日月潭古早就有名聲，風景媠徦實在沒地看。墾丁今嘛是國際化，觀光客隨時嘛插插插；逸陶物宜蘭大車拚，冬山河歇熱予恁爽 (sng2)免驚。
乙：若按呢講起來，台灣的中央有青翠的懸山，東西有美麗的海岸，四界佫有好溫泉，風景真正是媠徦無地看。
甲：無呣著！阮今仔日的節目就紹介到茲。
乙：歡迎逐个明仔載繼續收看「世界之聲」。
甲：「秦健康」！
乙：「祝快樂」！
甲&乙：祝逐个健康佫快樂。再會！
※※※※※※※※※※※※※※※※※※※※※※※※※※※
乙：啊汝若會知影茲爾濟？
甲：因為我佮王建民是仝鄉的啊！
乙：汝是講----？
甲：我從台灣來的啊！
(乙感覺去予乙騙去，足受氣的共甲的頭sat4 ui5另外一爿去！)
(轉去主目錄)
沒有留言:
張貼留言