2011
05142240台灣向前行
台灣向前行
甲：(唱歌入場)「啊--啊--啊--啊什麼攏呣驚！向前行。」
(呰个時陣，乙拖一跤皮箱從對面行過來，面腔無屆好看)
甲：(感覺掣一趒)汝捾徦大包細包，準備卜出國佚陶是否？
乙：呣是啦！呣是啦！
甲：唉喲！汝呰个人嘛誠ann3肚(藏私)，連卜出國去佚陶就驚人知！
乙：無啦！無啦！我無迄个意思啦。
甲：著嘛！會當出國去佚陶是好代誌，哪就佫驚人知？啊借問一下，汝呰擺佫卜去佗位？
乙：去美國啦！
甲：啊汝呣是頂個月則去美國一迮爾爾，若無換一下仔所在，爽一下啊無仝的？
乙：習慣就好啊！
甲：汝呰擺出門偌久則卜轉來？
乙：我呰擺出國了後就卜蹛佇遐，無卜轉來啊！
甲：汝是卜去留學是否？按呢後擺一定有出脫。
乙：我呣是卜去留學！汝真正是「人呆，看面就知」，
甲：抑是汝著樂透的頭彩，卜去環遊世界？
乙：汝真正是「胡蠅戴著龍眼殼—蓋頭蓋面」，我是準備卜「移民」！無卜轉來台灣啊啦！
甲：hann5！(唱歌—一隻鳥仔號啾啾曲調)汝……汝……汝是講汝卜離開台灣，準備「移民」去外國，揣幸福，hoo7 嘿hoo7！
乙：「規叢好好—無錯(剉)」！
甲：啊…汝…汝…汝(唱歌—一條手巾仔曲調)「為按怎汝卜離開？」、「予阮聽了有夠傷悲？」…………
乙：(唱歌—一條手巾仔曲調)「既然阮決定卜離開」，「汝愛保重汝自己」…………
甲：(唱歌)為什麼？為什麼？為---什麼？
乙：這講起來話頭長，若是卜「講予汝捌，喙鬚恐驚就扑結」！
甲：呣佫，汝嘛是愛講予阮了解，予阮量早扑算家己的將來。
乙：唉！汝咁無聽過人講：「台灣無三日的好光景」，我若無今嘛緊按算，後擺若卜走就傷過慢嘍。
甲：呣佫我嘛聽人講古早「臺灣錢淹骹目」，今嘛是已經淹徦肚臍佫淹目眉。所以咱若是「甘願做牛，免驚無犁通拖」。
乙：呣佫人講：「有夢上媠，希望相隨」，我聽人講：美國有真濟台灣逮袂著的所在，生活自由佫自在，予我想卜去看mai7。
甲：汝講台灣有什麼所在逮美國袂著？
乙：美國寒天會落雪，景色媠徦無地比！
甲：著！著！著！美國落大風雪的時，天氣寒徦卜死，四界白茫茫根本看攏無，高速公路不時連環大車禍，幾百台車撞做夥的代誌台灣絕對無！
乙：呸！呸！呸！汝真正是「一隻喙，胡蕊蕊」。
甲：「見講攏對對」！
乙：啊咱台灣熱人不時就做風颱，定定造成嚴重的災害。平地做大水、排水溝消袂利，山區水崩山，橋斷厝破連路就無地行。
甲：今嘛的氣象科技已經會當知影做風颱的日子，可惜的是gann7會當預防猶佫無法度阻止；呰種可憐的代誌，予人聽著心稀微！
乙：按呢汝無話通講啊hoo7！
甲：台灣雖然有風颱的影響，呣佫總比美國不時發生絞螺仔風(龍捲風)，造成規十个城市百姓生命財產的傷亡較好啊！
乙：嘿！嘿！這講起來嘛有淡薄仔道理。(躊躇一旦久仔)啊人美國有帝國大廈？
甲：汝呣通袂記ci8台灣有世界第一懸的101大樓。
乙：呣佫美國有棒球大聯盟！
甲：咱台灣嘛有上贊的王建民！
乙：美國NIKE的鞋子上好穿！
甲：因為赫是台灣彰化的鞋廠幫伊代工的啊！
乙：真的抑假的？
甲：汝真正是「古井水雞」，我看hoo3恁茲的人攏是抱著「近廟欺神」的心理，想講外國的月娘有較圓，外國的水就較甜，煞來看輕咱家己。
乙：無人哪會講「北港媽祖--興外地」！
甲：啊汝今嘛佫卜移民否？
乙：哪按呢我無卜移民啊，我卜留落來共逐个做夥扑拚！
甲：所以講：(唱歌—留傘調)台灣寶島臺灣的未來，掌握佇逐个的手內，國家利益愛堅持，政治的立場先共匟一邊。
乙：(唱歌—留傘調)望咱無分族群佮黨派，對呰地土地付出關懷付出愛，予咱社會擱較和諧，共同來創造寶島的將來。
甲&乙：向望逐个作夥來扑拚，予咱台灣繼續勇敢向前行。
(甲、乙落台行禮)
甲&乙：(唱歌退場)「啊--啊--啊--啊什麼攏呣驚！向前行。」
(轉去主目錄)
沒有留言:
張貼留言