2011
05142238阮兜彼个細漢兮
阮兜彼个細漢兮
甲：阿文
乙：阿盈
合：上台行禮
甲：唬！一冬三百六十五工，咱兩个今仔日尚好康！
乙：一冬三百六十五工，咱兩兮今仔日尚好康？阿我哪毋知是叨位咧好康？
甲：哼！汝毋知？（鄙視地看乙）抑無汝手裡提什麼物件？
乙：老師賞咱兮進口牛乳糖啊！
甲：哼－！汝敢毋知咱老師平常時是「虯擱儉」，「枵鬼兼雜唸」！今仔日擱會買遮尼貴蔘蔘兮牛乳糖來送咱。有影是「大某扑細姨－大出手」！恁講敢不是尚好康？（喜孜孜狀）
乙：誒！無影無跡擱予汝講尬對同啊對同！
甲：著是講毋！我欲較緊來餟餟咧，抑若無稍等咧轉去到厝，一定去予阮兜彼个監囚兮弟弟討去，抑我就「胡蠅嚐棕簑－吃無，NO餟」！（扯開包裝紙做好吃狀）
乙：哼！「菱角嘴，無食大心氣。」（搖頭）人我兮欲留咧予阮兜彼个細漢兮吃！（不屑狀）
甲：哈啊？留咧予恁兜彼个細漢兮吃！（手比細漢兮身高）抑是安怎就愛留予伊？伊敢識留好吃物予汝吃？
乙：不識是不識啦！毋過（提高聲調）伊識佇阮兜攏無人佇厝兮時陣和我作伴，恁敢知影？我彼時陣是驚尬皮皮銼，和伊攬作伙我才勿會驚吶！
甲：唉哟喂啊！見笑代喔！汝欲佇遮笑破人兮腹肚皮！什麼大漢兮攬細漢兮才勿會驚！抑恁阿母啊是沒生膽予汝這个大漢嬰－喔？有影是「豬毋肥，去肥到狗！」
乙：狗！狗！啊阮兜那兮細漢兮就是一─隻─狗！（得意狀）
甲：啥貨啊？
乙：三歲！（手指頭比三）三歲嘎敖大！（偷笑）
甲：唬！（做勢要打乙，乙閃躲）講歸半晡，原來恁兜兮細漢兮是一╴隻╴狗！抑無汝是甲我當作叛仔喔？（生氣狀）
乙：無啦！無啦！汝頭大面四方，行路擱有風，巧甲若孫悟空！（大聲）我哪會共恁當作是叛仔！（小聲）
甲：嗯！算汝擱不止啊有眼光！（得意點頭）是講哼恁兜那隻明明是狗，恁哪會細漢兮細漢兮叫甲親呼呼！予我掠準這个細漢兮是一个會哮擱會走兮囡仔咧！
乙：哇！我就講嘛！汝巧甲若孫悟空咧！阮兜彼隻狗有影真敖哮嘛真敖走吶！
恁敢知影，有一暝，三更佮暝半，兩个賊仔欲傱入來阮兜，阮彼隻狗，汪！汪！汪！吠甲欲斷喉！（乙做動作，甲跟著做）擱佇厝前厝後硞硞傱！彼兩个賊仔驚一下半小死，走尬離褲腳！
甲：唬！恁彼隻狗猛吶（比大拇指）！讚喔！
乙：嘿也道汝講！
甲：安呢擱和汝叫伊細漢兮啥關係？嘿，汝叫伊細－漢兮，麥輸若咧叫恁小弟咧！
乙：喔！汝有影巧！我無講汝就知影，伊就是阮小弟！汝敢知，自從彼暗了後，我就共伊當作是阮兜兮一个－－人，我尬阮兜兮人撨撨排排咧，伊就排阮兜尚細漢兮！大人無佇厝兮時，我甲阮這兮細漢兮攬作伙攏麥驚吶！
甲：喔！原來如貓！（點頭）莫怪汝共伊寶嗲嗲擱惜命命！連幾寡【一點兒】牛乳糖都欲留予伊食！
乙：到今汝才知【到現在你才知道】！汝毋知阮這个細漢兮偌呢好咧【多麼地好！】，我若欲耍球、擲飛盤、騎腳踏車。沒伊，嘿就沒好耍，我心情若鬱卒嘛會找伊開講；伊攏會坐佇邊啊惦惦聽，才勿會佮汝共款應喙應舌啦！（手指甲的頭）
甲：哼！免講伊嘛勿會應喙應舌！阿盈啊！恁毋通勿會記得伊是狗吶！毋是人－啦（加強語氣）。
乙：伊就是狗！毋是人！毋才會予人遮呢感－心！（作陶醉狀）
甲：唬！我講勿會贏汝啦！哪！（手中牛乳糖給乙）這些牛乳糖嘛提轉去予恁細漢兮食啦！我欲卡緊轉來叫阮阿爸嘛來飼一隻細漢兮－－狗（乙開心看甲）
ㄟ！（拍竹板）
乙：狗是 咱兮 好朋 友！
甲：忠心 可靠 佇厝內 守！【守著的意思】這個字唸ciu2，例如：守寡ciu2 kuann2
乙：飼狗 就愛 共伊 惜！
甲：毋通 放伊 外口四界 休！
乙：真心 對待伊 才應 該！ 合：包汝 逐工 歡喜 笑咳 咳．啊 笑-咳-咳！
(轉去主目錄)
沒有留言:
張貼留言