2011
05142236臆謎猜－地名
臆謎猜－地名
甲：元宵花燈照街市，逐家見景心歡喜。
滿面春風又得意，卜看花燈趁這時。
乙：吟詩、作對，我嘛會！
路上花蕊芬芳味，欣賞元宵好景致。
大大小小笑微微，卜臆謎猜緊來去。
甲：來去！來去！我卜來去踅廟寺。（用唱的）
乙：來去！來去！我卜來去臆謎真趣味。（跟著甲的調來唱）
甲：我是愛出題的－愛啼e
乙：我是愛臆謎的－罔臆e
甲：聽汝講佫喙角全全波，敢講臆謎是汝的專科。
乙：到今汝才知（學怪老子的口氣），呣信！出題做汝來。
甲：予汝臆！予汝臆！予汝臆莫著！
乙：看我無！看我無！做汝出題免囉唆！
甲：聽予真！頭一題，「阿兄扑小弟」！
乙：有代誌好參詳，起腳動手是會傷感情。
甲：喂！臆一个地名，毋是請汝來做阿娘。
乙：痞勢！痞勢！阿兄會扑小弟！這个兄哥實在有較雄－我知是「高雄啦」！
甲：巧！隨臆就對同！高雄有啥好孔，報來逐家通聞香。
乙：高雄古早叫打狗，南部上大的海口，船隻出入佇碼頭，商業發達起大樓。
甲：旗後砲台向外海，愛河划船談戀愛，西仔灣散步海風來，六合夜市通人知。
乙：原來汝嘛是住在巷仔內，對高雄加減有了解。紲落來…
甲：「主席就位」！
乙：“煮熟”當然是“食落胃”，有啥通臆！
甲：“生食”就無夠，那有通等到“煮熟”。是“主席”，看予真…
乙：簡單啦！主席卜就位著愛徛佇台仔頂的中央，用腳頭尪仔想嘛知－「台中啦」！
甲：汝的腳頭尪仔真厲害！借問咧：台中卜安怎來紹介？
乙：台中市真發展，落南上北攏利便，鳳梨酥、太陽餅，兩項攏總真出名。
甲：大甲蓆、大甲帽，梨山蘋果水蜜桃，八仙山內樹大叢，愛食海產梧棲港。
乙：唷！烏杆仔貯豆油，汝的學問嘛真優秀。請汝出題免細膩，食凊飯咧當等汝。
甲：「筍」！
乙：看是卜筍乾燉排骨、筍乾豬腳庫，我攏知滋味
甲：講徦喙瀾tshap8 tshap8 滴，汝就正經來臆起，才食著筍絲炒肉絲的氣味－箠仔枝。
乙：生氣！我毋是刁故意，實在是腹肚咧唱ㄉㄛ ㄖㄨㄟ ㄇ一，今仔我就來想予真。筍就是新發出來的竹－「新竹啦」！
甲：有智識！緊tshua7逐家來捌新竹。
乙：新竹園區科技城，電子新貴規大車，卜選囝婿就來遮，米粉貢丸伴手行。
甲：新竹風大傷目睭，客家山歌逐家唱，玻璃藝術享國際，內灣支線遊客濟。
乙：荏荏馬擱有一步踢，新竹的地理汝嘛有相捌。輸人毋輸陣，請汝題目出予真，不通來起呸面。
甲：斟酌聽！莫得驚！「九个人十个頭」！
乙：阿娘喂！九个人十个頭，害我聽徦雞母皮一直落。
甲：當頭白日，驚啥乜！有燒香有保庇，叫汝就卜定定做好代誌，才予魔神仔來膏膏纏。（教訓的口氣）
乙：我是假呣知，汝呣通傷囂掰，待我屈指算看覓。
九个人十个頭，加一个人－誰毋知「基隆啦」！
甲：實在會呵咾，啥乜難題攏考汝倒。基隆有啥好佚陶，講來逐家做參考。
乙：基隆古早叫雞籠，台灣北部的海港，百姓真濟討海人， 細雨綿綿落規冬。
甲：奇岩怪石和平島，海門天險風景好，碧砂漁港海鮮多，廟口小吃鼎邊趖。
乙：痞！痞！基隆的大大小小汝攏知，聽好出國去比賽。
甲：豈敢！豈敢！汝的頭殼實在有夠讚，考汝倒我毋干願。
乙：今仔日咱就臆到遮，另日才來拼輸贏。
甲：臆謎猜有趣味，男女老幼攏歡喜，臆有臆無無要緊，千萬不通費心神。
乙：來來來臆謎猜，天文地理來比賽，比看啥人較厲害，臆著的人上光彩。
甲、乙：臆謎猜無敗害，動動腦才得老人癡呆。
甲：我是愛出題的－愛啼e
乙：我是愛臆謎的－罔臆e
甲、乙：落台行禮
(轉去主目錄)
沒有留言:
張貼留言