2011
05211802啥人較好
啥人卡好
作者：嘉義市嘉北國校鄉土語言支援教師賴麗蓉
甲女：大家好我是×××（行禮）
乙男：大家好我是×××（行禮）
甲：×××今仔日呣免讀冊，你敢有要去佗位踅踅。
乙：我想要去文化中心踅踅，順紲去看冊。
甲：看你个面憨面憨面，擱會想要去看冊面哦！（恥笑个表情）
乙：喂！你講啥物冊面，你「識一，呣識二」我是要來去裡面，看冊
兼聞冊味。
甲：你看，我着講你「憨頭憨面」，你着是呣承認，文化中心呔有冊味
啊──我知、你是要提火來去燒冊，呣才會有冊味。
乙：喂！你卡恬咧，你嘛卡細聲咧「講話，無關後尾門」be7輸「矮
人爬厝頂」欠推哦！（講呣對話怕人聽著个表情）
甲：啊無是啥物冊味，你嘛講予我聞。（好奇个表情）
乙：哦！我若「講予你識，你个嘴鬚着好打結」，啊！莫講冊味啊！昨
昏我共我个阿姊有講起，阿爸是卡疼我也是卡疼伊，啥人是阿爸
个好子兒。
甲：唉呦！恁嘛真無聊，遮嘛咧ciau5。
乙：你呣知，阮著是要看是恁查某卡gau5个是阮查甫卡gau5。
甲：我看是阮查某卡gau5，你敢知。佇大約一千六百年前个南北朝，（扑竹板仔、木魚）
有一个查某伊真gau5， 伊个老爸是有卡老，
be7使做兵穿戰袍， 女扮男裝為着有孝，
替老爸做兵來出頭， 是啥物人，遮呢gau5啊！遮─呢gau5？
乙：用跤頭趺想嘛知，這是真出名个故事花木蘭嘛，卡通嘛有咧做。
甲：哦！那按呢花木蘭是查甫仔啊是查某仔。
乙：你嘛好啊！女扮男裝當然嘛是查某仔。好！換我問你，佇明朝大同廣昌，
（扑竹板仔、木魚）
有一个老母真偉大， 欲追一隻牛倒轉來，
煞去予猛虎共伊害， 猛虎共伊咬佇嘴內，
伊个好後生趕緊來， 用棍仔、石頭共虎刣，
共老母對嘴內救出來， 你講啥人遮厲害呀！遮──厲害？
甲：我知影啦！是拍虎救母个謝定住嘛。（自信个表情）
乙：要有禮貌是謝先生定住兄。
甲：啊好啦！我知啦！若是查甫著稱呼先生亦是兄，若是查某著稱呼
啥物姐啊！好，我擱講一个，
（扑竹板仔、木魚）
佇宋朝有一个好忠臣， 一直向望為國來效命，
呣甘離開老母來進前， 後來老師周侗來說明，
才決定前往來去做兵， 伊个老母為著欲予伊，
永遠記得為國來效命， 佇伊个加脊骿用力，
刺着四字「盡忠報國」， 向望伊記得遮使命，
你敢知是啥人？
乙：我知，伊是岳先生，阿飛兄，一个好男兒。（自信个表情）
甲：我呣是講岳飛，我是咧講，刺字彼个，偉大个女性，（國語唱）世
上只有媽媽好。
乙：啥物人佇嗎嗎哮啊？我講（國語唱）哥哥爸爸真偉大，哥哥爸爸
則是卡偉大啦！
甲：啊好啦！啊好啦！咱莫擱佇這咧練siau2話，趕緊來去文化中心
看冊着知詳細。
甲：我是×××
乙：我是×××
甲＆乙：多謝大家。（落台行禮）
(轉去主目錄)
沒有留言:
張貼留言