2011
05142300食藥仔的規矩
食藥仔的規矩
甲：汝若會一个人senn7 tau3 tau3、軟gau3 gau3！今嘛咧比賽呢！汝嘛稍振作一下！
乙：呰歸工我真正是四肢無力，規身軀軟葛葛，行無二步仔就強卜擋勿會 椆！
甲：汝真正是「大箍好看頭」，我看汝真正是「規身軀攏死了了，gang1賰迄支喙」爾爾。
乙：有這麼嚴重嘛？（阿扁總統的台灣國語腔調）
甲：看汝一表人才，明明是「泰山的體格」，若知影汝根本就是「阿婆的身體」。
乙：汝真正是「坐轎的呣知影扛轎的艱苦」！
甲：啊汝有去予醫生(先生)看否？
乙：免啦！免啦！等我呰帖「獨門祕方」食落去，連鞭就佫是一尾活龍。（挈出袋仔內底的獨門祕方，就卜食落去。）
甲：誒！誒！誒！汝咧食什麼？
乙：人講「有燒香有保庇，有食補就有行氣」，聽講呰帖「獨門祕方」食落去，艱苦病痛攏總除。有病治病，無病嘛會當補身體。（挈出獨門祕方，就卜吞落去。）
甲：誒！（共獨門祕方搶過來。）佫食！佫食！汝呣通無病食徦有病。
乙：呸呸呸！汝迄支「烏鴉喙，胡累累」，無代誌勿愛 佇遐咒讖我患病。
甲：做人勿愛 鐵齒，食藥有食藥仔的規矩，卜食嘛愛聽先生的指示，呣通無病亂投醫。
乙：啊汝哪會「未啉假醉，未講就大心氣」，「一句話，三斤六重」。
甲：人講「食著藥，青草一葉；食呣著藥，人蔘一石」。
乙：聽汝講徦哩哩嘞嘞、比手劃刀，我是「鴨子聽雷聽攏無」；呰句話倒底是什麼意思？
甲：症頭若是無相仝，藥仔食落會無對銅，開錢無效（是）無彩工，若扑痞身體就悽慘。
乙：汝勿愛 佇遐共阮嚇驚！
甲：（共藥仔搶過來，叫乙斟酌看）汝看汝看（手指藥包），呰包藥仔頂懸什麼攏無寫，呣知影內底(成份)是匟啥？汝若食了有按怎，想卜揣人(算數)就無地查！
乙：汝是講藥袋仔頂懸就愛寫物件！
甲：（一个卜好好啊教示乙的表情）到旦汝則知。
乙：人講：「平時做好代，較贏食早齋」，食藥仔愛注意什麼則會使，汝呣就較緊講予我知。
甲：既然汝有心想卜知，一寡食藥的知識我就來紹介，汝就骹尾绁予栽，聽阮捯捯啊解釋來。
乙：詳情聽說！
甲：第一步：食藥仔進前愛看分明，藥仔卜予啥人用，姓名先共認予清，食落呣則會安心。
乙：汝是講：挈藥包的時愛看頂懸的名有寫呣著否。
甲：「規叢好好--無剉」！第二步是：用藥仔的方法按怎是，步步攏有伊的原理，內服抑外用愛看指示，卜食卜抹著注意。
乙：汝是講藥仔卜按怎食愛先看予詳細。
甲：著！著！著！第三步：卜食藥仔愛看時機，飯前飯後愛著時，藥量濟少有規矩，一工幾擺勿愛 呣著去。
乙：汝是講：食藥仔的時間藥量攏愛照規矩，呣通用呣著去。
甲：無呣著！而且卜買便藥仔嘛愛注意三个原則---品質比廣告較重要，正牌比偏方較有效，認明GMP的商標，對症落藥就有效。
乙：按呢我知啊！其實食佗一牌的藥仔根本無重要，重要的是愛有政府認證的GMP商標。
甲：人講：「健康」是人生上重要的本錢。
乙：咱咧「食藥仔」嘛愛聽先生的指示，呣通無病亂投醫。
甲&乙：望逐个身體健康有本錢，快快樂樂食百二。
(轉去主目錄)
下午好