2011
05142254春嬌仔揣頭路
春嬌仔揣頭路
春嬌：各位評審老師，各位觀眾逐家好！我是春嬌仔啦！恁有看見無？我今仔日是特別化妝的喔，有媠無？（台跤應聲：「有喔」！）多謝，有夠歹勢。（春嬌繼續拿出小面鏡，做出詳細化妝的款。）
（呰个時陣志明惦惦行到春嬌身邊，春嬌專心在化妝，毋知志明就佇身邊。）
志明：喂！（大叫）
春嬌：（規個人掣一趒）無汝是moh壁鬼是否?偎來抑攏無出聲，欲驚死人ní7 !
志明：哪有，是汝規心在「道路施工」，毋則會予我驚著。
春嬌：啥物「道路施工」？人我是在「化妝」ne1！
志明：汝挖粉土，把面抹平，毋是在道路施工，無是在創啥？好啦，咱勿愛 「犀牛照角--見面就觸」。是講，汝今仔日裝遮媠，是欲去刁位？
春嬌：人我欲來去「揣頭路」。
志明：汝是欲去揣啥物款的頭路？
春嬌：真濟啊，像講導遊（豆油）啊、護士啊。
志明：豆油？我在豆腐咧，豆油。是「導遊」！連一句「講」就未曉「話」。
春嬌：啊聽有就好啊啦！
志明：像汝呰扮的，台語講勿會 輪轉，是欲按怎去作導遊？來來來，練習一每啊予我聽看mai7咧，則知影會通過否？
春嬌：好啊，我就講一遍仔予汝鼻芳的，汝則知影我的利害。
志明：準講呰擺汝tshua一陣阿公阿媽去逸陶，遊覽車駛到位的時欲按怎講？
春嬌：這毋則簡單。「各位公媽，咱的墓地已經到啊，落車的時，請恁毋通勿會記ci8家己的牲禮。」
志明：唉喲，夭壽喔！人阿公阿媽逐個攏勇健健，會走會跳，汝烏白共人叫做「公媽」。佫再講，汝做導遊是按怎共人tshua去墓地？
春嬌：毋是啦，是「目的地」（華語）！
志明：hoh，汝嘛較拜託咧，彼是念做「目的地」（台語）啦。啥物墓地，驚死人。猶有，汝是按怎叫人毋通勿會記家己的「牲禮」？
春嬌：無啦，無啦，我是講「行李」（華語）！
志明：彼是念做「行李」（台語）。台語攏勿會曉講，也想欲去作導遊，真正是「胡蠅戴著龍眼殼--蓋頭蓋面」。
春嬌：抑無，我來去進修讀冊，以後來去作護士。
志明：勿會禾黑，有志氣。今嘛我準作是病人，汝來作實習的護士。
春嬌：好啊，好啊。開始喔。「阿伯，汝好，我來共汝量體溫（度看mai咧）。」
志明：（假影老人的聲）汝欲共我度看mai7咧喔，好啊，感恩喔。
春嬌：欲量「肛溫」（華語）？嘛會使，「來，阿伯汝褲褪落來。」
（做動作欲拉志明的褲）
志明：（雙手tuí褲頭揪咧）小姐（台灣國語），汝欲創啥？
春嬌：欲共汝量體溫啊！
志明：騙痟的，是按怎量體溫就愛佫褪褲？老伙仔人吃到七十偌，嘛毋bat聽過呰款代誌。
春嬌：汝毋是欲量「肛溫」（國語）？褲無褪落來，度針是欲按怎tshiâm 尻川？
志明：小姐（台灣國語），我是共汝講「感恩」！汝攏聽無清楚，佫烏白扳話。真正是「十二月風吹-痟徦無尾」。我看汝欲做護士，按呢嘛是勿會通過。
春嬌：抑無，我去作病院服務台的人，應該無問題。
志明：好，我換準做是人客。（假影老人的聲）「小姐，借問一下，阮老牽手仔手術了後，今嘛毋知影佇啥物所在?」
春嬌：阿伯，阮病院手術了的病人，攏會佇「棺材室」歇睏。
志明：哪會按呢！毋是講開盲腸是小手術爾爾，哪會出來就隨送去「棺材室」。「老的啊，老的啊，汝有按怎否.....」（大哭出聲，斡頭一直叫）
春嬌：阿伯、阿伯，汝聽毋著去啊，我是講「觀察室」（華語）。
志明：春嬌仔，汝嘛幫幫忙，「觀察室」佮「棺材室」是「一丈差九尺」！汝烏白講是會害死人喔。啥人敢叫汝去顧病院，就呣是咧「倩鬼挈藥單－自揣死路gong1」。
春嬌：人啊毋是刁工的，只是台語講勿會輪轉爾爾。
志明：所以講：毋管汝是欲創業抑是揣頭路，三百六十行欲食佗一途，台語攏愛學予好，後擺則勿會 出差錯。
春嬌：汝講了真著，我一定欲好好來學台語，才勿會佫出槌。
志明：是啊！「母語是文化的根本，會聽會講咱本分；用心保留無議論，釘根生湠傳子孫」。
春嬌：無毋著，「祖先經驗予咱靠，智慧豐富根基好；台語文化咱的寶，傳承發揚有福報。」
志明＆春嬌：（作夥講）「台語文化咱的寶，傳承發揚有福報。」
春嬌：春嬌
志明：志明
春嬌&志明：落台行禮，多謝逐个。
(轉去主目錄)
沒有留言:
張貼留言