2011
05142251囡仔人的心聲
囡仔人的心聲
乙：(唱歌:風真透曲調)今仔日風真透，阿母的面臭臭，逐遍就罵我什麼攏袂曉，總有一工我會跳樓。
甲：誒！誒！誒！今仔日咱是來參加答喙鼓比賽，看頭前的人表演赫精彩，咱嘛袂使傷凊彩。呣管成績好抑禾黑 ，嘛就愛歡喜來上台。
乙：唉！既然就已經來到茲，「頭剃落去矣，無洗嘛勿會 使」（無奈狀）。
甲：古意仔！
乙：耗呆仔！
甲&乙：上台行禮！
甲：我看汝生著古錐啊古錐、肥軟(nui2)啊肥軟(nui2)…，tha1拄啊哪會「未啉假醉，未講就大心氣」。猶未開始就講卜去「跳樓」揣死，到底是什麼代誌予汝想袂開？
乙：（大哭）啊……***！我無想卜活啊啦！（做出卜去跳樓的扮勢）
甲：（較緊共乙扭著咧）汝慢慢啊講啦！呣通想袂開。
乙：汝勿愛共我扭啦！
甲：無汝倒底是按怎？若會面懊面臭，一支喙翹翹翹，勿會 輸是乞食搏輸繳，財產輸了了。
乙：唉！「講起來是話頭長」。
甲：我看汝逐工攏歡歡喜喜，食飯佫攏配雞腿，暗時嘛會使看電視，三不五時佫有麥當勞、肯德基，無像阮兜散圮圮，愛什麼無什麼，佫有什麼汝袂滿意？
乙：汝看！（現出身上的傷痕）昨晏阮阿母佫請我食「竹仔枝炒肉絲」。
甲：真正是「苦瓜燉鰱魚—苦憐」哦！恁老母哪會共汝扑徦按呢？
乙：唉！(唱歌:歡喜就好曲調)「阮母看我的考試紙，看我無一百，箠仔揭起來共我扑，予我身疼痛；怪我呣知影咧考啥，讀冊無扑拚，害伊看了血壓高，面子削了了」。
甲：聽汝佇遐咧「青盲的放炮—亂誕」。恁母仔哪有赫枵壽？無一百分就共汝扑，汝就有影則通講！
乙：呰擺的考試，我考了有較禾黑 ！
甲：我就知影汝又佫咧「蟾蜍展氣功—膨風」。
乙：呣佫，我啊呣是刁工的！我呣是刁工的！（大哭）
甲：誰教汝「四書五經讀透透」，「呣捌一个黿鼇龜鼈鼉」，「讀冊讀六冬，捌無一塊屎礐枋」！
乙：唉！(唱歌仔戲:狀元樓曲調)考試滿分人人愛，滿篇紅字是見笑代，成績無好真無奈，愛怪遺傳則應該。
甲：考了無好就愛檢討家己，呣通佇遐咧勿會 生牽拖厝邊。
乙：汝若按呢共我恥笑？無彩咱二個是死忠兼換帖的。
甲：誰叫汝「讀冊攏讀從骹脊骿去」。
乙：我阿爸規工gang7顧伊的生理，阿母是不時揭箠仔共我修理，今嘛連汝就看我無起，我活佇咧呰个世間佫有什麼意義？我抑是去死死的較快活！（做出卜去跳樓的扮勢）
甲：（較緊共乙扭著咧）誒！汝千萬呣通按呢想！我永遠攏是汝的朋友；其實讀冊本來就半生成，今嘛考了按怎嘛無代表未來的成就。
乙：就是講呣！
甲：講實在的，大人gang7會曉講咱今嘛的囡仔食好做輕可，煞呣無知影咱心內的煩惱！
乙：原來像汝呰扮的好學生嘛有煩惱。
甲：今嘛逐个人囡仔攏生少，一个啊一个攏當做寶，想講會當予咱物質的享受，就是父母上大的成就。
乙：阮母也嘛攏按呢想！
甲：其實什麼是幸福的模樣，阮嘛有家己的主張。像阮阿母為著愛我考會好，英文數學叫我一直補，歇喘時間攏總無，害我愈讀愈艱苦。
乙：inn1根本就呣知影敢有效果，gang7想講he1是一種心理的彌補。
甲：所以講--誒！(扑竹板)坐佇茲，恁逐个聽，聽阮囡仔的心聲，讀冊阮會來扑拚，補習較少安排寡。
乙：(扑竹板)山珍海味阮呣免食，只要恁有盈來陪我，有父母疼惜的生活，則是幸福的囡仔啊的—囡—仔」！
甲：古意仔！
乙：耗呆仔！
甲&乙：落台行禮！
(轉去主目錄)
沒有留言:
張貼留言