2011
05142248來去減肥
來去減肥
作者：嘉義市嘉北國校鄉土語言支援教師賴麗蓉
甲：大家好，我是嘉豪，外號叫做阿不倒，因為我大箍啊予你挨be7倒。（搖手行禮）
乙：大家好，我叫明智，外號叫做肥豬，（搖手行禮）
甲：哦───！是彼隻看到查某着豬哥瀾嘈嘈津个肥豬哦。
乙：你呣才是，
小胖哥愛吃臊，
肥豬肉燖米糕，
一頓三碗不算多，
飯後擱加一塊雞卵糕，
予你个肥肉增加多－多－多。（扑手盤）
甲：喂！你佮我「一个半斤一个八兩」呔著佇彼咧「龜笑鱉無尾」。
乙：我看你才是「鱉笑龜厚皮」。
甲：咱兩人「兩角找五仙」著要覺悟，作伙來去揣撇步，予咱be7擱
再大箍。
乙：老師有講起，學校辦个體重減輕班，參加攏呣免錢，擱會予你真
滿意。
甲：真个哦！按呢咱著趕緊來去減肥。
乙：e5！你看，共咱「同穿一領褲个」擱真濟哦！（驚一趒个表情）
甲：啥物啊「同穿一領褲」，你講啥？
乙：無啦！我是講共咱仝款來減肥个，擱be7少哦！你看老師个頭一
直搖是不是叫咱呣通來這佚陶，你看，即馬頭擱一直tong3 是不
是欲共咱摃，手擱一直踅，歸身全姿勢，咱呣通擱佇這坐，趕緊
來去轉較好適。（會驚个表情）
甲：哦！你真正是「棚頂做kah4流汗，棚腳嫌歹看」遮是運動前个暖
身操，予你等咧，較个放心予老師操，操kah4予你个汗一直流，
減肥才有效。（乙：姿勢一）
乙：啊！啊！啊！我！我！我个腰啦！要斷去啊！（艱苦个表情）
甲：你是佇哀啥貨？
乙：阮个腰遮呢細，老師擱叫阮激遮種姿勢，根本是欲予阮一擺着好
勢。
甲：你彼咧腰叫做細，be7輸水蛙伯仔个大腰肚，會唱歌擱會當扑鼓。
（乙：姿勢二）
乙：啊！共我啊扭一下，共我啊扭一下。（艱苦个表情）
甲：你又擱是按怎？
乙：我个腳搐一下搐一下，be7輸搐筋結規丸，擱搐落去着要來去找
藥丸。
甲：哦！你彼支腳肥泏泏，若是會使刖落來煮排骨，大家一定食共歡
喜but4 but4。（乙：姿勢三）
乙：救護車、救護車，趕緊共我叫救護車，我強欲昏倒佇遮。
（艱苦个表情）
甲：欲昏倒擱講遮濟，你真正是黑白花，到底是為啥貨。
乙：老師講吸氣吐氣，動作擱愛做予sui2，按呢着會當減肥，結果我
會記吐氣，煞be7記吸氣，呣則be7喘氣。
甲：哦！你真正是「苦瓜燉鰱魚」──可憐哦！（搖頭）
乙：e5！「艱苦頭，快活尾」有卡輕鬆哦。
甲：嗯！我嘛有感覺哦，咱佇be7變成，（歡喜个表情）
甲＆乙唱：（鈴鼓）阮就是排骨仔隊 你嘛是排骨仔隊
胸坎哪樓梯 ， 腹肚哪水櫃，
雙枝手仔金光錚， 雙枝跤仔草蜢腿，
人人攏叫阮是排骨仔隊。
甲：我是嘉豪
乙：我是明智
甲＆乙：歡迎大家作伙來減肥，多謝大家。落台行禮
※姿勢一、二、三按照內容自由發揮
(轉去主目錄)
沒有留言:
張貼留言