2011
05211805下課十分鐘
下課十分鐘
噹~噹~噹~噹~噹~噹~噹~噹~
甲：逐家好，我是青狂楨仔。（用衝ㄟ上台）
乙：我是慢趖梅仔。（慢慢仔走上台）
合：佇遮共逐家請安問好。
乙：我說青狂楨仔，你拄才即下聽著下課ㄟ鐘仔聲，就青狂白狂衝出來，毋驚去撞到人，到時老師予你吃膨餅（食指拄對方的太陽穴），彼著真正水肥車排歸排---拖屎連啊。
甲：唉喲！腳手慢鈍，你著搶無份！你這隻慢牛，注定要吃濁水。學校ㄟ韆鞦才三个爾，腳手若無卡猛醒咧，欲耍你著noo suh。（雙手手心向上拍三下）
乙：青狂狗，你著會食無屎！你袂記得頂擺你幌韆鞦幌即下傷大下，無拄好撞到我ㄟ鼻頭，害我鼻血雙港流，即馬想起來，擱會疼想欲哮。（欲哭ㄟ款）
甲：今！你嘛好啊！十二月食菜頭，六月才轉嗽。三千年前ㄟ狗屎，你嘛抾起來講。予你講一下，欲耍嘛無心情！（失落ㄟ款）
乙：莫生氣啦！我是欲共你提醒：張遲，無蝕本。啊嘸，咱來運動埕走飆比賽，你看啥款？
甲：走飆比賽？你面仔青青，也敢允人三斗血！你真正是胡神戴龍眼殼---蓋頭蓋面，落車頭攏無探聽，參我比走飆？我看你是秀才包袱巾---包輸ㄟ。
乙：我煞無想著，伊頂回運動會走飆第一名，我寧可嘜佮伊拼輸贏。（驚覺ㄟ模樣，轉頭細聲講）啊！我雄雄想著，頂股月定定落大雨，運動埕即馬擱澹澹，咱寧可嘜，毋拄好跋倒就加害ㄟ。
甲：我看你是袂曉駛船，嫌溪隘；袂曉挨弦仔，顧絞線。哪有彼ㄟ頂股月落雨，即馬土腳猶澹澹ㄟ？我看你是驚隱痀車畚斗，食力擱歹看。
乙：講甲即爾仔 聽！好啦！你看我殕殕，我嘛看你霧霧，你ㄟ跤佮我欲平阿長，比籃球我袂卡輸面。
甲：番仔薑欲辣免大粒，番薯好吃免大條，你毋知影我ㄟ跤有湊弓仔，佮我比籃球？我看你是活人揣死路，吃紅柿配燒酒---存辦死。
乙：啊~好啊~輸人毋輸陣，輸陣歹看面，荏荏仔馬，嘛有ㄧ步踢，武ㄟ袂使哩，我就用文ㄟ佮你車拼。行棋我是巷仔內ㄟ，好！咱即馬就行棋來輸贏。即遍ㄧ定欲乎你輸甲脫褲跑袂離。
甲：膨風水雞刣無肉，你面皮卡厚過壁，大聲話毋通講傷早，頂遍我會輸你，是你即隻青暝貓拄著死老鼠，你毋通想說爛塗無刺，到時，做枷家己夯，就歹看擱無體面。
噹~噹~噹~噹~噹~噹~噹~噹~
甲：哪會遮緊就上課啊？
乙：緊ㄟ！袂赴啊啦！
甲：緊？毋著跍落去！
乙：攏嘛你！顧佮你答喙鼓，煞袂記得去便所。
合：咦~
甲：下課十分鐘
乙：咻~一下就過啊。
合：時間寶貴，千萬莫浪費。
甲：打球走飆，
乙：運動身體好；
甲：行棋話仙，
乙：心情無煩惱；
甲：看冊畫圖，
乙：氣質自然高；
合：有益ㄟ代誌，逐項嘛挺好做。
甲：冤家相打上毋好，
乙：行動安全著愛顧，
合：毋通你兄我弟，四界嚾，濫糝做。
甲：青狂楨仔
乙：慢趖梅仔
合：祝大家平安、順適、食百二。
(轉去主目錄)
沒有留言:
張貼留言