2011
05032051算 命
算 命
甲：我歹命啊！我歹命（模仿孟姜女哭倒長城之喉糖廣告）！
唉！人講：「『一个人，一款命』，運命是天註定」，自細漢阮阿母就講我是『剪刀柄，鐵掃帚』，八字歹徦會驚死人，命中註定愛衰尾一世人。
乙：來哦！抽靈籤，卜聖卦！解破汝前世的運命，看汝未來的運勢會按怎行，命好就愛計認真來扑拚，命歹就愛較緊改運命！
甲：誒，我看汝「火燒豬頭--面熟面熟」！汝是迄个迄个--「頂港有名聲，下港有出名」，轟動桃仔城，驚動城隍爺的算命先--「唬濫伯」！
乙：哼哼哼！(無啥歡喜的暗示)我是算命先「胡萬白」，呣是「唬濫伯」！請汝話愛講清楚，無若別人聽了有差錯，是會害我連生理就無通做！
甲：歹勢！歹勢！各位觀眾請恁聽詳細，是我講話漏風的關係，面頭前呰个，就是「人看人呵咾，鬼看鬼跋倒」的算命先--「胡萬白」！
乙：按呢嘛較差不多！
甲：拄cia4汝講會當改運是有影抑沒影？敢是汝咧膨風佮臭誕？
乙：汝真正呣知影我的本事有偌大，今仔汝有緣來徦茲，就予我將汝的問題來解破，改變汝後半世人的運命。
甲：(一面偷笑，一面斡頭對觀眾講) 我就趁著呰个機會，來瞭解家己的命底，算看問題倒底出佇tue4？敢真正一世人攏就這衰尾？
乙：(偷偷的對觀眾講)人講：「看先生(醫生)就愛食藥，會問人就有呣著」，伊一定是最近運氣無屆好，則會來算命揣因果。
甲：算命先的，我最近遇著一寡問題，想卜請汝共我解說解說，呣知禮數愛偌濟？
乙：今仔咱二人初相會，生理免做來交陪，算命改運做夥挈，黃金三兩當做見面禮。
甲：人講：「若是有一个好命底，較贏三代咧儉家賄。」這淡薄仔錢無偌濟，當然嘛愛把握呰个機會。
乙：恁看，我講了無呣著，「看先生(醫生)就愛食藥，會問人就有呣著」，伊連鞭就會來揣我算命嘍！
甲：算命先也，呰三兩黃金是禮數，請汝無棄嫌來照顧，望恁好心來相助，共阮開破是啥緣故？
乙：這哪有什麼問題！我早就已經攢好勢，等汝來共詳情說，我一定開破予詳細，予恁有化解的機會。
甲：人講：「人若咧衰，種瓠仔就會生菜瓜」，我是種鳳梨發西瓜，種玫瑰佫勿會 開花，食頭路拄著倒店走路的頭家，家己做生理是三暝三日無人來買賣，恁講我有衰抑無衰。
乙：照按呢算起來，汝是『命底生帶骨，利刀削勿會禿』，一切攏是命中來註定，我看汝抑是「鴨卵tan3過山--看破」！
甲：呣佫，汝拄cia4呣是講汝會當將我的問題來解破，改變我後半世人的運命？
乙：呣佫，這講起來是話頭長，今仔日時間有限制，我就簡單啊講一下。如此如此--這般這般--。
甲：誒！汝呰支「算命也喙」「胡蕊蕊」，講的根本就攏屁話。
乙：我誠實是「做徦流汗，予人嫌徦流瀾」；請汝共我的話講予觀眾聽，看我講的有影抑無影？
甲：好！我就請逐个來做公親。「唬濫伯也」講「愛拚則會贏」！
乙：著啊！「少年若是無扑拚，食老哪會有好名聲」。若是無扑拚，若會當改變汝的運命？我講的敢無影？
甲：呰句算汝贏！啊「飯後行百步，較好行藥鋪。」呰句有啥幫助？
乙：呣是我咧「膨風水雞亂講話」！佇呰个競爭的社會，做工課就愛有睏尾，若無健康的身體，連卜扑拚就無機會」。我講的敢呣著？
甲：啊若「荏荏馬嘛有一步踢」咧，呰句話佫算啥貨？
乙：人講：「人不可貌相，海水不可斗量」，「天生我材必有用，小卒有時嘛會變英雄」。只要咱好好啊發揮家己的專長，搰力扑拚就一定會成功。
甲：無汝嘛講看汝呰枝「算命也喙」「胡蕊蕊」，是成功佇佗位？
乙：自細漢阮老師就講我是：一喙掛雙舌，真敖歕雞閨，所以我來做算命先也上合味。
甲：汝講的嘛是有道理。我看若欲改變家己的運命，絕對呣通靠算命，上好抑是「家己種一叢，較贏看別人。」
(轉去主目錄)
沒有留言:
張貼留言