2011
05032054先走─行照
先走─行照
甲：我是〝招財也〞。
乙：我是〝進寶也〞。
合：佇遮共逐家請安問好，逐家好。
甲：踅來踅去騎著阮的腳踏車，聽候下課陪你每工做陣行；
心情輕鬆伴著車輦腳踏聲，乎阮歡喜的希望攏寄佇遐。
乙：喂！〝招財也〞，你擱真消遙喔！那行那在唸歌唱曲。
是呣是「著樂透」﹖
甲：哦~！是〝進寶也〞喔；我哪有著樂透。
乙：哪無﹖是啥麼代誌乎你遐爾仔歡喜咧？
甲：這喔！若欲「講乎你捌，嘴鬚著好打結」。
乙：安怎講，你嘛講來乎我鼻芳咧。
甲：阿道~，下課了後我欲去找〝米魯也〞（美女）啊。
乙：騙痟的？你在「騙鬼袂食水」，啊無~你是酒鬼嚕﹖
甲：呣是啦，你誤會仔啦！
乙：五會﹖我看時機歹歹，攏加標起來卡妥當諾。
甲：嗟~你嘛捌伊（稍停頓）─啊道~彼个〝林美女〞啊。
乙：啥！是伊﹖你安怎要約她？
甲：嘿~頂禮拜阮阿兄邀我去參加亻因的同窗會，〝林美女〞亦
有參加。
乙：〝林美女〞有參加，又擱安怎？
甲：彼工，阮騎著阮阿兄彼台『小綿羊』（國語）的oo-to-bai2（機車）。
乙：『小綿羊』（國語）的oo-to-bai2（機車）又是擱安怎？
甲：參加的查甫的，愛一人負責載一個查某囡。
乙：喔~福氣啦！恁欲安怎決定啥人載啥人咧？
甲：大家查甫仔，參詳欲用每台oo-to-bai2（機車）的鎖匙
來抽籤，決定佗一位來坐；拄仔好，阮阿兄和〝美女〞
抽著〝兩光也〞彼台啦。
乙：哦~擱真有緣。趣味喔！
甲：才無咧，啥知影亻因咧那騎的時陣，煞拄著交通警察踮路
邊臨檢。
乙：呼~這聲都害囉！「好運仔著時鐘，歹運仔著番仔火枝。
甲：著是講呣，亻因彼一台騎是佇咧上落尾，警察拄好仔擋著
亻因彼台。
乙：啊嘿~警察先生安怎講？
甲：警察仔擱真客氣的問講：「少年的，載美女喔！請共你
的「駕照」擱「行照」借我看一下仔。」
乙：咦？警察那會知影你阿兄載的是〝美女〞！
甲：呼！你嘛好啊，警察是在講媠姑娘的「美女」！
乙：好啦！好啦！我袂扑斷你的話柄，「駕照」伊有紮嘸？
甲：當然嘛有！
乙：好佳哉！阿伊家己的「行照」敢會使提（the2）乎警察
咧？
甲：著是啊，伊著揮手對遠遠在看的〝兩光也〞，講：『行照
啊！行照啊！』（國語）
乙：啊嘿〝兩光也〞敢有提乎伊嘸？
甲：那有？阮阿兄無揮手講：『行照啊！行照啊！』（國語）
擱好；一講出去，〝兩光也〞聽著拼命油門催盡磅，向
頭前一直衝去啊。
乙：後來有看著〝兩光也〞嘸？
甲：有啊！〝兩光也〞載著〝肥珍也〞的彼台車，騎到半路
嘛無油啊。
乙：無油！去加油站加油著好啊。
甲：著是啊！〝兩光也〞到加油站了後，低（tom3）頭欲提
皮包仔；安全帽煞無細膩落落去，斡頭共〝肥珍也〞講：
伊欲去撿安全帽，交代〝肥珍也〞幫伊鬥加油。
乙：阿〝肥珍也〞敢有幫伊鬥加油？
甲：有啊！〝肥珍也〞就在邊仔喝講：「兩光也加油！兩光
也加油！」。
乙：哈！真正是「人若呆，看面著知」。
甲：今碼，政府推行空氣零污染，腳踏車做陣騎。
乙：嗯！騎腳踏車較健康，莫怪你的心情遐爾好，等下我嘛
欲來去騎腳踏車。
甲：我是招財也。
乙：我是進寶也。
合：今仔日著答到遮，落台行禮。
(轉去主目錄)
沒有留言:
張貼留言