2011
05022205飯食七分飽 歲數到一百
答喙鼓------------飯食七分飽 歲數到一百 韓倩怡
（二個人對二爿邊仔上台，先行禮。）
甲：妹仔，緊緊緊。
乙：緊？緊就跍（khu5）落去啊。
甲：喂！無禮貌。我是講遮爾濟人，趕緊佮逐家相借問一下！
乙：哇！遮鬧熱。逐家好，食飽仔未。（那喝那搖手）
甲：我是叫你佮逐家相借問，佮逐家食飽有啥牽連？
乙：唬！「講佮予你識，喙鬚欲拍結」。人阮阿公、阿媽那拄到厝邊頭尾、親情五十、朋友八十常常嘛問人「食飽未」？
甲：啊呦！你阿公、阿媽嘛真怪奇，即馬是什物時代啊，猶有人食未飽？我正爿看、倒爿看；頭前看，閣後壁看。看來看去嘛無一個看起來親像食無飽，顛倒是有人食尚飽。（伸手摸乙的腹肚）
乙：啊---！痟豬哥！
甲：（驚到的表情）你嘛較細聲咧！你莫「大紅花毋知禾黑，圓仔花禾黑毋知」。親像你即範（pan7）的----，唉！（晃頭）
乙：我即範的是安怎？人我那目睭gio2一下，嘛有真濟人予我電佮唉唉叫。
甲：嘔－－－！（欲吐的表情）
乙：你真正是佮「珍珠當做鳥鼠屎」，人講：「頭大面四方，肚大居財王」（手拍家己的腹肚）。逐家一看嘛知影我真正是好命囝。
甲：對對對，看你即種「阿不倒」的身材就知影。好命囝，恁兜伙食勿會禾黑唬，你阿母一定真敖煮食。
乙：那講到阮阿母的手路，真正是「頂港有名聲，下港尚出名，中部無人毋知影」，無底比耶啦！
甲：這呢敖！無嘛講一寡啊來鼻芳咧！
乙：昨昏阮阿母煮一項菜，（拍一下呼呃（khoo7 uh4）仔）我食到即馬嚨喉空猶閣滇滇滇。
甲：煮什物山珍海味，著----好食。
乙：我尚愛食的料理叫做「逐家攏歡喜」。
甲：啊當是什物腥臊耶？
乙：阮阿母昨昏傳一條菜瓜，半斤蚶仔準備欲煮湯。
甲：哇！菜瓜甜，蚶仔鮮，好食好食。
乙：無想到菜當落鼎。鈴！鈴！鈴！（電話的鈴仔聲）
甲：有人拍電話來啊！
乙：阮阿母的小弟的囝的某拍電話來。
甲：序細拍電話來佮序大請安問好。勿會 禾黑！勿會 禾黑！
乙：什物問好！亻因二個那一開講就「講天講地，講鱟稀講飯篱」那無三點鐘是勿會收煞耶！
甲：感情這呢好！三－－點－－鐘？（驚到的表情）啊！蚶仔菜瓜湯？
乙：唉！（晃頭）歸個鼎仔變火灰，阮阿媽驚佮強欲叫水龍車。
甲：安呢，「逐家攏歡喜」咧？
乙：阮阿爸看到即款，那晃頭那講：「下暗外口食。」就安呢一家伙仔chua7去食【199吃到飽】。頭家看到阮一捾十外個，笑佮喙仔裂獅獅 ；啊阮大人、囡仔會使食到豐沛的大餐，起毛真正是su pu ling giang 。
甲：就安呢！這項菜叫做「逐家攏歡喜」？
乙：「歸欉好好－－－沒錯」。毋過－－－－，唉－－－！（吐大氣）
甲：食這好，閣喘大氣。
乙：你毋識聽別人講：「爽（sang2）勢無落衰（sui7）的久」。阮想講錢攏交去啊，無食予伻（phenn1）本那會使。就安呢，大人、囡仔攏嘛扒欲十外碗。
甲：哇！這敖食。這聲頭家面仔憂糾糾，歡喜勿會起來囉！
乙：毋那頭家勿會歡喜，連阮歸家伙仔嘛唉爸叫母。
甲：啊！是發生什物事誌？
乙：唉！阮阿公食即咧傷過濟，煞心臟怦碰喘。
甲：壞啊！壞啊！心臟病發作啊！
乙：阮阿媽血壓攑佮二百。囡仔人食燒透冷，便所走未煞。
甲：這聲「逐家攏歡喜」變成「病院大團圓」囉！
乙：我都衰佮那梨仔啊！你閣「一句話三尖六角」，一點仔同情心就無。
甲：毋是我無同情心。人講「食睏無分寸」，就算講久久才食一頓腥臊，嘛未使食這濟。親像恁安呢，毋那無救本，顛倒是「雞無掠著，閣了一把米」，安怎算嘛勿會和。
乙：本成阮是想講交赫爾濟錢，應該就親像「鳥鼠跋落潘（phun1）桶仝款」，會使安心仔sut4，那知影會這呢淒慘！
甲：來！徛予好，斟酌聽！想欲健康無煩惱，果子青菜毋當無。
乙：大魚大肉愛節（cat4）量，性命才會有保障。
甲：飯後相招罔散步，八十土豆嘛會哺。
乙：逐頓尚好七分飽，歲數一定到一百啊到一百！
甲、乙：咦---！喙空重要，健康閣卡重要喔！
今仔日阮的答喙鼓就表演到遮，多謝逐家！
（行禮 落台）
※ 【】的所在請念華語。
(轉去主目錄)
2011-05-03 12:38:57min email給min 前往min的日誌
