落第

 2011

09031935落第

217心路篇

「實在有夠飯桶，讀甲落第。」

啥叫我少年袂曉想，攏毋知影成績若欲好就愛讀冊。

彼冬，高一升高二的，因為英語佮數學兩科無過，補考嘛考無過。就愛重讀高一的。

讀甲落第，我的心內嘛是足艱苦的。家己嘛是感覺足無面子的。同學攏順利升起去二年的，賰我猶佇咧讀一年的。

自落第了後，我變甲足自卑的，感覺無面子見同學。原本佮同學做伙仝款通車讀冊的我，開始換騎跤踏車讀冊。

逐工透早，猶未六點，我就騎車出門。彼个時間其實比早班(pang)車較早。

會遐爾早出門，就是無愛去拄著同學，予同學看著。

按厝裡到學校，路程是十二公里有較加。早起(tsai2)時閃同學。放學咧？放學嘛仝款，毋是趕緊走就是足晏才走。

放學較早走，就是佮公車拚時間。跤手較猛的同學，攏會趕看坐會著4:40的車無？我所拚的時間就是欲比彼班車較早到厝。

放學較晏走，就是等到6:00的車走過矣的時間才會騎轉去厝。因為6:00彼班車是有一寡同學一定愛坐的車。in蹛的所在車班較少，一工攏總三班車爾爾。嘛有一寡同學較愛坐彼班車，因為彼班車加較冗(ling7)。

就按呢，逐工來回騎。三冬的時間就按呢過矣。

落第的自卑感並無因為高中畢業來消失。伊一直共我綴牢牢。綴我到我讀研究所畢業了後猶綴我幾若冬。前後算算咧落第的自卑感綴我綴十四冬。

讀甲落第，只怪家己無夠巧。真正憨甲袂耙癢。

其實，落第抑無啥物啊。重要的是按怎去處理這件代誌。

了後，落第的制度取消矣。我的看法是，落第的制度實在無應該取消。看著這馬的囡仔程度愈來愈差，大學聯考18分嘛有通仔讀。看著這款報導，我足懷疑，咱的教育是咧創啥物咧？18分就會當讀矣，按呢讀國小到高中是欲創啥？

有落第，囡仔加減就較會拍拚，嘛較袂凊彩過日子。

落第，愛做的代誌是囡仔的心理建設，予伊了解，事實無法度改變，予伊有目標通好拍拚，予伊離開心內的鬱卒佮自卑，予伊離開消極的生活態度。

落第，對個人有真大的負面影響，毋過，這款負面的影響是有法度經過輔導佮關懷來做補救。對整體的教育是有正面意義的，咱的囡仔的程度會加足好的，社會才會有真大的進步。

尤其，這馬的囡仔愈來愈歹教，我甚至同意自國小就有落第的制度。予囡仔自細漢就了解，無拍拚就是愛重來。

(轉去心路篇目錄) (轉去主目錄)

回應

2011-12-22 11:08:08月媧 email給月媧 前往月媧的日誌

歡迎指教.拜讀你的大作後.感慨萬千.少有人會用台語讀法編寫.真不容易.但很有趣

於2011-12-22 16:40:13回覆

To 月媧

因為台語是咱的母語, 我干焦用母語去寫咱生活中的代誌. 嘛希望會當有愈來愈濟人來用母語寫文章:)感謝你的支持.祝你平安快樂:)

2011-09-05 00:14:04myway email給myway 前往myway的日誌

描寫生動，言之有物，佳作也!

於2011-09-05 00:17:50回覆

To myway

感謝賜教, 小技之作, 慚愧也!

2011-09-04 21:49:01帥安 email給帥安 前往帥安的日誌

落第取消但是要補學分呀

我擔心的是12年國教以後情形更糟

於2011-09-04 22:15:43回覆

To 帥安

是啊, 彼是一定的, 囡仔袂曉想, 貧惰成性是一定的. 除非國教有法度辦甲足理想的. 其實, 咱自九年義務教育以來就變䆀去矣. 想想咧日本時代, 國小畢業就會使獨當一面, 做一間工廠的廠長矣, 啊咱咧??連縛鞋帶仔就袂曉!!!!

2011-09-04 17:10:28min email給min 前往min的日誌

我是蹛在足山頂尾溜的所在啦　坐車走路攏要浪費足濟時間　所以我攏利用通勤的時間在車頂讀冊　結果　造成大近視兼散光的嚴重後重

於2011-09-04 17:14:48回覆

To min

我通車的時陣嘛是有咧看冊, 毋過, 我大部分的時間是用背的, 按呢較袂傷目睭. 所以, 我是佇車頂背英語的. 我是到大學畢業才掛目鏡的.

2011-09-04 07:50:01AA email給AA 前往AA的日誌

早 ~~~~

於2011-09-04 08:09:29回覆

To AA

嘛共骨力拍拚的你講gau5早:)

2011-09-04 06:03:49min email給min 前往min的日誌

看班車時間好像我讀書時的情形哦　早上一定要坐６：３０的早班車　下午一定是４：４０的　如有課輔就只剩５：４０這班能坐　錯過就要哭死了

於2011-09-04 08:07:16回覆

To min

是啊, 坐無著車, 彼就真正足費氣的代誌矣. 佳哉, 阮蹛的所在有四條路線的公車經過, 所以基本上坐無著車就閣等後班車就好矣. 是講, 讀大學了後, 欲轉去故鄉, 上驚高速公路塞車, 若是超過尾班車的時間就無通仔坐囉.
看起來min較早嘛是蹛佇足庄跤的所在. 我這馬才想著, 阮遐四條路線的尾班車分別是4:40; 5:00; 6:00 佮 9:30.  阮國中的時, 有同學就是通勤, 伊的尾班車就是4:40彼班, 到阮遐是5:00, 所以第八節課伊攏愛猶未下課就先走去趕車矣.

2011-09-04 00:05:04Lip email給Lip 前往Lip的日誌

歹勢, 袂曉用, 留言重複, 請你替我刪除, 多謝

於2011-09-04 07:39:11回覆

To Lip

拄耍母錄(blog)攏會拄著這款的問題, 就算講是熟手矣, 有當時仔, 電腦系統反應較慢, 叫是送無出去, 嘛是會因為加揤(tshih8)幾若下變成重複送出. 毋免歹勢. lip的拼音拄好是英語, 嘛是台語, 台語是趇, 佮逐字仝意思.

2011-09-04 00:03:38Lip email給Lip 前往Lip的日誌

我感覺這困難, 因為這馬學生少, 學校濟, 政府嘛無彼款氣魄將不良的學校關掉, 嘛無家長希望家己的囡仔落第, 怹袂想講按呢做是繼續咧thun踏囡仔的未來, 嘛是咧破壞台灣的社會結構, 所以台灣的升學制度著按呢害了了,擱免講其他關於教育的問題.

這是我淡薄仔的看法

於2011-09-04 07:29:12回覆

To Lip

看lip寫台語文的功夫嘛袂䆀, 足歡喜閣看著會曉寫台語文的人來鬥陣做母錄(blog), 期待lip會使佇母錄內底開墾一塊母語的花園.
"怹袂想講按呢做是繼續咧thun踏囡仔的未來" 這句是毋是有講了毋著去? 是毋是講 "怹會想講按呢做是繼續咧thun踏囡仔的未來"??
其實, 落第了後, 上害的是四周圍的人的落井下石的心態, 講的話是鹹鹹澀澀, 剾剾洗洗, 冷言冷語的加幾若重(ting5)的傷害.

2011-09-03 23:54:25劉志祥老師 email給劉志祥老師 前往劉志祥老師的日誌

落第制度愛存在 冊讀了歹閣重來 程度才袂是愈歹 毋知教育創啥代  

於2011-09-04 07:12:08回覆

To 劉志祥老師

教育重要教後代
教了無好社會歹
社會烏暗僫重來
囡仔教育著拍在