2011
05032058翁仔某代
翁仔某代
（歌仔調「狀元樓」）
緣投翁：「阮是可愛的緣投翁」
媠某：「阮是妖嬌美麗的媠某」
緣投翁：「同學老師做伙來」
媠某：「逐家來聽阮佇茲答喙鼓」
齊唱：「逐家來聽阮佇茲答喙鼓」
緣投翁：我是緣投翁仔。
媠某：我是媠某仔。
合聲：逐家敖力早！
媠某：翁的喂，人我今仔日足歡喜的，拄則磅體重，減肥3公斤啊爾。
緣投翁：媠某的，he是妳猶未畫妝的關係啦。
媠某：烏白講，人我逐每攏嘛加減抹淡薄，畫妝才開三點鐘爾爾。
緣投翁：莫怪人佇咧講：「佛重扛、人重妝；三分人、七分妝」。
媠某：討厭，原來汝一點攏無愛我，較早講愛我攏是假的。
緣投翁：冤枉啊！媠某大人，我足愛汝的，汝是我第一個女朋友，嘛是我上尾一个女朋友。
媠某：汝擱講？呰聲汝龜腳趖出來。我是汝第一个、嘛是上尾一个女朋友，按呢，中央汝擱交幾百个？汝講、汝講、汝講啊？
緣投翁：媠某的，汝無通「白白布，強強欲染徦烏」，呰聲我「三條溪水嘛洗勿會 清」。唉！（細聲的、對觀眾）真正是「猛虎蹛佇房間內，半暝展威無人知」。
媠某：汝佇咧講啥？
緣投翁：無啦！無啦！
媠某：按怎？汝今每「雞喙變鴨喙」啊honn？
緣投翁：是、是，媠某的，後每我攏聽汝的就是啊！
媠某：按呢嘛較差不多。勿愛 講我無尊重汝，後每厝內的大項代誌予汝作主，細項代誌交予我處理著好。
緣投翁：媠某的，汝對我有夠好的。（用唱的）「人講一個某，較好三個天公祖」
媠某：小等下。代誌大項抑是細項，愛予我決定。
緣投翁：按呢毋是攏總汝決定的？
媠某：嗯---！汝有意見？
緣投翁：無啦！無啦！（細聲的、對觀眾）「娶得好某，較好做祖；娶得歹某，一世人艱苦」！
媠某：是講，翁的也。咱結婚遮爾久，攏猶未生徦半个囝兒。我欲來去廟裡燒金拜拜，求神明予咱一个囝仔。
緣投翁：咱頂每已經去十偌間廟燒金啊，嘛是無效。
媠某：人毋管啦！
緣投翁：好啦！好啦！呰每是欲去燒幾間？
媠某：啥物「燒幾間」？咱就毋是欲去廟裡放火燒厝佫。
緣投翁：歹勢！歹勢！我是講：咱欲去佗幾間廟燒金啦！
媠某：我聽人講：欲生後生抑是欲生查某囝，佫愛去拜無仝款的神明喔。
緣投翁：啥？敢有分徦遮清楚？
媠某：無毋對，我攏探聽好啊！若欲生查某囝，愛去拜「註生娘娘」。
緣投翁：噯，有道理喔，「註生娘娘」，一定生「娘娘」（國語）嘛！啊若欲生後生，愛去求佗一个神明？
媠某：哪欲生後生，著愛去求「包公」！
緣投翁：噯，這嘛對呢！「包公、包公」，保證一定是「公的」。媠某的，汝有夠敖力的。
媠某：到旦汝則知！
緣投翁：是講「有囝有囝命，無囝是天註定」，咱干旦煩惱嘛無路用。
媠某：翁的喂，汝講的嘛是有道理，人講「一斤肉毋值四兩蔥，一斤囝毋值四兩翁」。
緣投翁：咱做翁仔某本來就愛「三碗飯，二碗菜湯」。
媠某：啥物是「三碗飯，二碗菜湯」？咱甘有食遮禾黑 ？
緣投翁：媠某的，我是講：做翁仔某愛相偎並（動作：兩人靠在一起），互相扶持，互相偎靠。
媠某：hô，是按呢喔。無毋對，「會得雙人睏仝枕，較好露水凍花心」。
緣投翁：人講：「聽某喙，大富貴」！
媠某：「尪某二人若仝心，烏塗嘛會變黃金」！
緣投翁：千萬毋通「第一年鴛鴦水鴨，第二年粉鳥斑甲，第三年就冤家相扑」！
媠某：俗語講：「家和萬事興，家吵萬世窮」！就愛疼惜好姻緣，則會當囝孫富貴萬萬年！
（歌仔調「狀元樓」）
緣投翁：「姻緣本是天註定(tīann)」
媠某：「毋是媒人跤敖力行」
緣投翁：「同心協力來扑拼」
媠某：「鴛鴦水鴨雙人影」
齊唱：（勾手轉圈）「鴛鴦水鴨-雙--人---影」
(轉去主目錄)
沒有留言:
張貼留言