2011
05041555錯亂的青、紅燈
低年級答喙鼓腳本 ＜錯亂的青、紅燈＞
甲：各位評判先生、各位老師、
乙：各位囡仔兄、囡仔姐、在座的好朋友。
甲：我是緊捷快也。
乙：我是慢步香也。
合：答喙鼓，佇遮共逐家行禮請安，逐家好！
甲：心事若無講出來，有誰人會知。(唱得很憂鬱樣)
乙：咦！緊捷快也，是安怎？發生啥代誌，你哪會面憂面結咧！
甲：唉！話若欲講透機，我目屎着撥袂離，阮阿兄蹛院啊！
乙：蹛院？伊是得著啥麼病？著SARS病喔？
甲：可─樂─病。
乙：啥！可樂病？啊~我若呣捌聽過。彼種症頭甘會共人傳（ㄊㄨㄢˊ）染？你有得著嘸？
甲：有~有你的大頭啦！人阮是凊彩講講咧，你着信─信─信。(責備的口氣)
乙：無法度，我上大的優點着是人古意擱兼條直。(得意狀)
甲：我看你哦！是「人若呆，看面着知」。無愛佮你講呀。
乙：勿賣安呢啦！阿○也，無采，咱是「食呣着藥」啊。
甲：你才食呣着藥啦！阮才無咧！(生氣狀)
乙：哎唷，人阮是講：咱二个是「換帖」兼好友。你是想對佗位去啦！恁阿兄到底是安怎？你嘛講乎我聽。
甲：唉！〈低落〉話若要講透機，我目屎就撥袂離，認真欲講著躼躼長。
乙：你無講，我哪會知？
甲：說乎你捌，我的嘴鬚就好打結。
乙：到底是安怎？〈生氣〉你不要在遐滴滴嘟嘟啊！若無~我要返去了。
甲：好啦，好啦，我講，我講啦，啊道~。
乙：啊道~什麼啦？
甲；啊道！頂禮拜六，佇十字路口遐發生車禍，伊無代無誌佮朋友去鬥鬧熱，結果走傷雄，煞去乎人撞著，規身軀是流血~流滴、跤骨是踵歪歪、目箍擱畫色彩，乎喔~一~喔~一~送去病院。
乙：啥！哪會安呢！足可憐耶！真正是「銃子扑著肚臍空」。(同情狀)
甲：啥麼意思？
乙：─註死的—。
甲：嗯！阮阿爸嘛講伊是「七月半鴨仔─呣知死活」，吃家己的米，煞來煩惱別人的代誌，真是孝飽傷閒啊！
乙：著是講咩，咦！啊遐十字路口是發生啥麼車禍？(好奇狀)
甲：聽講：是交通號誌突然失靈，青、紅燈錯亂……路口交通大亂，車攏唚做伙。
乙：哎唷！車哪會曉相唚咧。(疑惑狀)
甲：唚你的頭啦！
乙：唚我的頭？(疑惑狀)
甲：我是講：「車相挵」呣是「車相唚」。真正是剃頭店公休─無你法。
乙：著啊！最近我有佇大路看著一台砂石仔車和一台鐵馬相閃，彼台鐵馬為著閃超速的砂石仔車，煞挵去黏佇咧電火柱的頂懸！救護人員欲共伊揪落來攏揪袂落來，煞共伊的衫仔褲揪落來！害逐家攏緊張一下，掠準這聲穩死也！
甲：啊~！砂石仔車咧？
乙：砂石仔車的運將，擱佇遐「馬西馬西」，乎警察先生「酒測」、兼開「紅單」，真是趁袂赴賠。
甲：嗯~（搖頭狀）所以逐家千萬呣通啉酒駛車喔。
乙：佇遮阮欲奉勸諸位好朋友：
甲：交通號誌若失靈、逐家頭腦著愛清。
乙：十字路口看分明、才袂出事心肝凝。
甲：交通安全那無守、你的性命連乜休。
乙：安全規則著愛記、才袂了錢擱受氣。
甲：耶？逮（ㄉㄨㄟˋ）了袂禾黑喔。
乙：無影！無影！這是佮你學的。
甲：騎車愛戴安全帽、頭殼安全才有保。
乙：人講細膩無蝕本、性命留咧報親恩。
合：祝福逐家快樂出門，平平安安回家門。
甲：我是緊捷快也。
乙：我是慢步香也。
合︰今仔日答喙鼓著答到遮，落台行禮，感謝各位。
(轉去主目錄)
沒有留言:
張貼留言