2011
05041553好笑神，得人疼
好笑神，得人疼
甲：白拋拋！
乙：烏趖趖！
甲＆乙：上台行禮。 (乙揭頭的時一个面腔氣搐搐)
甲：啊汝是按怎？哪會面懊面臭，一支喙翹翹翹？
乙：（受氣）白拋拋！汝勿愛佫假啊啦！汝一定有什麼代誌無共我講！
甲：汝哪會「未啉假醉，未講就大心氣」。倒底發生什麼代誌？
乙：（大哭）啊……！我呣管啦我呣管啦！呰遍汝一定愛還我一个公道。
甲：汝倒底是咧講按怎，我若會聽徦花撒撒？
乙：是按怎逐个人攏疼汝無疼我，我若會遮歹命？（大哭）啊……！
甲：汝勿愛 佫號（哭）啦！今嘛比賽徦一半，汝按呢是有夠痞看！問題出佇佗，汝無就講予清楚。
乙：我問汝，頂遍考試汝考第幾名？
甲：頂遍我是「青盲貓去踏著死貓鼠」，有淡薄仔好運氣，一時下無細膩，考著第二名實在是有一點仔註死註死！
乙：啊汝敢知影啥人考第一名？
甲：我gang7佮我家己比，啥人第一名，我實在是無注意。
乙：汝真正是「目睭皮無漿泔」，當做阮「貓仔無點」。迄个第一名就是我「烏趖趖」。
甲：歹勢歹勢！我真正是「胡蠅戴著龍眼殼—蓋頭蓋面」，竟然敢佇「關公面頭前弄大刀」。
乙：猶有咧，頂擺畫圖比賽，汝挈著第幾名？
甲：迄擺畫圖我猶「排無十二生肖」。
乙：啊汝敢知影第一名是啥人？
甲：我知我知，一定是汝，著呣著？
乙：算汝猶佫有淡薄仔理解，無將「珍珠當做貓鼠仔屎」。
甲：若按呢，汝遮爾敖力畫圖佫敖力讀冊，頭拄仔受氣是為啥貨？
乙：汝明明逐項就輸我，是按怎頂禮拜揀模範生，選著的人是汝呣是我？連老師嘛攏疼汝無疼我？
甲：he1可能是同學「目睭花花，瓠仔當做菜瓜」，則會「揀啊揀，揀著我呰个賣龍眼」。
乙：管伊是同學揀的，抑是電腦揀的，橫直inn1無揀我就是無公平！
甲：呰件代誌實在是有誤會，問題倒底出佇tue4，汝一定愛想予詳細，後擺卜選模範生呣則有機會！
乙：誤會！汝講誤會！若無別人選汝的原因是啥貨，汝嘛共我解說解說！
甲：卜選模範生，成績雖然是一个重要的參考，呣佫人緣品行嘛愛好，則會當人人攏呵咾！
乙：呣佫若卜予人人攏呵咾，應該愛有啥法寶？汝嘛講來予阮參考。
甲：我阿嬤講：「囡仔人呣通不時艱苦濟掛，激一个面腔予人看，就愛『好笑神』，則會當『得人疼』！」
乙：汝真正是「七月半鴨仔，呣知影死活」，這根本就是咧罵我！(開始受氣佫翹喙)
甲：我阿嬤佫講：「拄著代誌愛冷靜來處理，呣通輕無動滴就來受氣，三不五時就一枝喙翹徦半天懸。(乙聽一下緊共受氣佫翹喙的面腔收起來)別人抑無欠咱會仔錢，若就佫忍受咱的脾氣！」
乙：恁阿嬤按呢講嘛是有道理！(無意無意歹勢歹勢)
甲：所以，咱呣通小寡代誌脾氣就咧揭，喙尾挺好吊三斤豬肉，按呢呣爾家己氣身擼命，後擺嘛無朋友佫無親情！
乙：歹勢啦歹勢！我後擺呣敢啊啦。
甲&乙：所以講：「誒！好笑神，得人疼，一生攏有好運命。人生路途來扑拚，前途光明好名聲！」
甲：白拋拋！
乙：烏趖趖！
甲＆乙：落台行禮。
(轉去主目錄)
沒有留言:
張貼留言